Biblia/Vetule Testamento/Deuteronomio/Deuteronomio 5

←Deuteronomio 4

La Bibia in Interlingua Deuteronomio

Deuteronomio 6→

Deuteronomio

5

Exhortation de apertura

¹Moses convocava tote le populo de Israel e les diceva: “Audi, Israel, le decretos e le prescriptiones que hodie io vos communica. Apprehende los e pone los diligentemente in practica. ²Le Senior, nostre Deo, concludeva con nos un pacto^[1] al Horeb. ³Ille non entrava in iste pacto con nostre patres, ma con nos omnes que vive hodie. ⁴Le Senior parlava facie a facie con vos sur le monte Sinai ex le medio del foco. ⁵(Io me trovava tunc inter ille e vos, pro annunciar vos su commandamento, proque vos habeva pavor de ille foco e vos non ascendeva al monte). Ille diceva:

Le Dece Commandamentos^[2]

⁶“Io es le Senior tu Deo, qui te faceva sortir del pais de Egypto, le terra de servitude. ⁷Non va haber ulle altere deo coram me. ⁸Non va facer te ulle similitude^[3] de lo que es in le celo supra, que es in le terra subtus, o in le aquas que es infra le terra. ⁹Non va adorar^[4] nec coler^[5] los, quia io, le Senior tu Deo, es un Deo jelose. Io responde^[6] al transgressiones^[7] del patres puniente lor filios usque al tertie e quarte generation de illes que me repudia^[8], ¹⁰ma io imparti mi amor loyal^[9] per mille generationes de illes que me ama e observa mi commandamentos.

¹¹Non va emplear impropriemente le nomine del Senior^[10] proque ille non lassara impunite quicunque face un uso improprie de Su nomine.

¹²Sia diligente in observar^[11] le Die del Sabbato e sanctifica lo, sicut te commandava le Senior tu Deo. ¹³Tu debe laborar e complir tote tu occupationes durante sex dies, ¹ma le septime die es le Sabbato del Senior tu Deo. In ille die non va facer alcun labor, ni tu, ni tu filio, ni tu filia, ni tu servitor, ni tu servitrice, ni tu bove, ni tu asino, ni qualcunque altere animal domestic, ni le estraniero que vive con te, a que tu servitores e servitrices pote reposar se como te. ¹⁵Memora que tu anque tu esseva servo in Egypto e que le Senior, tu Deo, te faceva sortir de ibi con mano forte e brachio extendite: pro iste ration le Senior, tu Deo, te comanda de respectar le Die del Sabbato.

¹⁶Va honorar tu patre e tu matre, como le Senior tu Deo te commandava facer, a que tu vive per longe tempore^[12] e que toto te vade ben in le terra que ille es sur le puncto de dar te.

¹⁷Non va assassinar.

¹⁸Non va committer adulterio.

¹⁹Non va robar.

²⁰Non va offerer false testimonio contra tu proximo.

²¹Non va concupiscer^[13] le uxor de tu proximo. Non concupisce le casa de tu proximo, ni su campo, ni su servitor, ni su servitrice, ni su bove, ni su asino, ni qualcunque altere cosa que pertine a tu proximo.

Le narration del revelation al Sinai e le responsa de Israel

²²Le Senior diceva iste cosas^[14] a vostre integre assemblea sur le monte Sinai ex le medio del foco, del nebula e del tenebras e in alte voce nihil altere addente. Pois ille inscribeva le parolas sur duo tabulas de lapide e me los dava.

²³Postquam vos audiva le voce ex le medio del tenebras durante que le monte esseva in flammas, tote vostre leader del tribos e le ancianos me approchava. ²⁴Illes diceva: “Le Senior, nostre Deo, faceva nos vider su majestate^[15] e su grandeur e nos le audiva parlar ex le medio del foco. Assi nos hodie probava que Deo pote parlar a humanos e continuar a viver. ²⁵Ma nunc quare deberea nos morir, proque iste intense foco va devorar nos! Si nos continua audir le voce del Senior nostre Deo, nos va morir! ²⁶Quia, qual homine^[16] poterea ancora viver, de post haber audite, como nos faceva, le voce del Deo vivente que parla ex le medio del foco? ²⁷Approxima te solmente, Moses, e audi toto lo que le Senior nostre Deo te dice, e pois tu communicara nos quecunque ille te dice: alora nos te prestara attention e lo complira”.

²⁸Quando le Senior audiva que vos me parlava assi, ille me diceva: “Io audiva lo que iste populo te diceva - illes parlava ben. ²⁹Si solmente il esserea lor desiderio de reverer me e obedir a tote mi commandamentos in omne tempore, assi que pro illes e lor descendentes toto vadera ben pro sempre! ³⁰Va a dicer les: “Retorna a vostre tentas!”. ³¹Pro lo que te reguarda, remane hic con me e io te communicara tote le commandamentos, le decretos e le prescriptiones que tu les debe docer, a que illes pote complir los in le terra que io les dona in possession”.

³²Sia ergo diligente a poner in practica quid le Senior, vostre Deo, ha commandate. Non disvia ni a dextera ni ad sinistra, ³³Seque le cammino que le Senior, vostre Deo, prescriveva vos: assi vos vivera longemente in le terra que vos es sur le puncto de posseder.

Notas

1. Le pacto al qual se refere hic Moses (v. 2) non es le Pacto Abrahamitic, ma le Pacto Mosaic. Lo que seque es un renovation del Pacto Mosaic pro le nove generation que es super le puncto de entrar in le Terra Promittite.
2. Le version de Exodo 20
3. Le parola תְּמוּנָה (tmunah) refere se a modello mental del qual le פֶּסֶל (pesel) es fabricate; illlo pote esser similitude real o imaginate. Isto pote render se: “Non va facer te ulle imagine sculpite, ni va conciper un forma” pro le culto; o “Non va fabricar te un idolo in le forma de…”.
4. O “prosterner te ante illos”.
5. O “servir los”, render los un servicio religiose.
6. O “visita”.
7. O “culpas”.
8. O “odia”, in le senso del pacto, illo es: repeller, disobedir.
9. O “misericordia”, litteralmente: “faciente amor loyal” (עֹשֶׂה חֶסֶד, ʿoseh khesed). Iste concepto refere se al fidelitate de Deo al promissas que ille inscribeva in le pacto que ille establiva con su populo, su amor fidel a illes que es le sue. Istes es le membros del pacto, le recipientes de su gratia, que Deo serva e protege del mal e de su effectos. Iste benediction se extende grandemente pro illes que, in le mesme maniera, se monstra fidel a Deo.
10. O “illicite”, “usara in van”.
11. O “sanctificar”, “render sancte”, poner lo a parte como un die special.
12. Litt. “a que tu dies sia extendite”
13. O “desiderar ardorosemente”.
14. O “parolas”
15. O “grande gloria”.
16. Litt. “de omne carne”