Biblia/Vetule Testamento/Deuteronomio/Deuteronomio 30

←Deuteronomio 29

La Bibia in Interlingua Deuteronomio

Deuteronomio 31→

Deuteronomio

30

Appello a retornar al Senior

¹In le futuro, quando tu habera facite le experientia de tote iste cosas, tanto del benedictiones quanto del maledictiones, que io te prospiceva, tu reflectera^[1] super illos inter le nationes ubi le Senior te habera exiliate^[2]. ²Si in ille tempore tu e tu descendentes va reverter vos al Senior tu Deo e le va obedir de tote corde e anima, justo como io te commanda hodie, ³alora le Senior tu Deo revertera tu captivitate e habera pietate de te. Ille te facera retornar e te congregara de novo ex tote le populos inter le quales ille te habera dispergite. ⁴Mesmo si tu exiliatos essera in le terras le plus distante^[3], inde le Senior tu Deo te retrahera e te facera retornar. ⁵Ille te facera retornar al terra que pertineva a tu ancestres, e tu possedera de novo ille terra. Tunc ille te facera mesmo plus prospere e numerose que tu ancestres!

⁶Le Senior tu Deo alsi purificara^[4] tu corde e le corde de tote tu descendentes, ut vos va amar le de tote corde e anima, ut vos pote viver. ⁷Alora le Senior tu Deo infligera tote iste maledictiones super tu inimicos e super illes que te odia e te perseque. ⁸Alora tu obedira de novo al voce del Senior e observara tote su commandamentos, illos que io te prescribe hodie. ⁹Le Senior tu Deo te rendera succedite in tote lo que tu facera. Ille te dara multe infantes e numerose bestial, e ille facera producer abundantemente tu agros, quia le Senior se allegrara de novo in dar te omne cosas bon, como ille lo faceva con tu ancestres. ¹⁰Le Senior tu Deo se delectara in te si tu obedi a su voce e observa le commandamentos e le preceptos scripte in iste Libro del Lege, e si tu reverte te de tote corde e anima al Senior tu Deo.

Le selection de vita o de morte

¹¹Le commandamento que io te injunge hodie non es nimis difficile pro te^[5], ni tro procul a attinger. ¹²Illo non es detenite in celo, tanto distante que tu poterea dicer: “Qui pote unquam ascender pro nos al celo e portar lo a nos ut nos lo audir e lo obedi?”. ¹³Nec illo es detenite trans le mar, tanto distante que tu poterea dicer: “Qui pote transversar pro nos le mar e portar lo a nos ut nos lo audi e lo obedi?”. ¹⁴No, le message es juxta te e valde in tu ore e in tu corde, ut tu pote obedir a illo.

¹⁵Considera que hodie io poneva ante te de un latere le vita e le bon^[6] del altere latere le morte e le mal^[7]. ¹⁶Lo que io hodie te prescribe es de amar le Senior tu Deo, de camminar in su vias e de custodiar su commandamentos, preceptos e judicios. Si tu lo face, tu vivera e multiplicara, e le Senior tu Deo benedicera te e le terra que tu es sur le puncto de entrar in illo e occupar lo^[8]. ¹⁷Si, tamen, tu corde se averte e tu refusa audir, e si tu te lassa seducer^[9] e va adorar deos estranie, ¹⁸io te declara^[10] que hodie mesmo tu certo va perir! Tu non extendera tu tempore sur le terra que, transiente le fluvio Jordan, tu va acceder e posseder lo. ¹⁹A testificar contra vos io invoca hodie le celo e le terra que io poneva ante vos le vita e le morte, le benediction e le malediction. Elige ergo le vita, a que tu e tu descendentes va viver! ²⁰Io te exhorta a amar le Senior tu Deo, a obedir le e a esser le fidel, proque solmente ille pote dar te le vita e longor de vita in le terra que le Senior tu Deo promitteva dar a tu ancestres Abraham, Isaac e Jacob.

Notas

1. Litt. “e tu los facera retornar super tu corde”.
2. O “te dispergeva”.
3. O “in le angulos le plus distante del celo”.
4. Litt. “circumcidera”.
5. O “supra te”.
6. O “prosperitate”
7. O “disastro”.
8. O “posseder”.
9. O “deciper”.
10. O “predice”.