Biblia/Vetule Testamento/Cantico/Cantico 2

←Cantico 1

Le Biblia in Interlingua Cantico

Cantico 3→

Le Cantico del canticos

2

Le lilio inter le spinas e le pomiero in le foresta

[Le amata a su amante] ¹Io es un flor de campo ab Sharon^[1], un lilio ab le valleas.

[Le amante a su amata] ²Sicut un lilio inter spinas, assi es mi amica inter le juvene feminas.

[Le amata re su amante] ³Sicut un pomiero inter le arbores del foresta, assi es mi amante inter le juvene homines. Io sede sub su umbra delectabile e su fructos es dulce in mi bucca.

Le sala del banchetto pro le inamorates

[Le amata re su amante] ⁴Ille me portava a in le sala del banchetto e me reguardava con amor. ⁵Corrobora me con tortas de uva, refresca me con pomos, quia io langue de amor.

Le duple refrain: imbraciamento e adjuration

⁶Su mano leve es sub mi capite e su mano dextere me imbracia.

[Le amante al juvenettas] ⁷Io adjura vos, o puerettas de Jerusalem, per le gazellas e per le cervas del campos: que vos non evelia ni suscita le amor donec illa non lo desira^[2]!

Le arrivata del amante

[Le amata re su amante] ⁸Audi le voce de mi amante! Ecce, ille veni! Ille sali sur le montes. Ille salta sur le colles! ⁹Mi amante es simile a un gazella o juvene cervo. Reguarda, ecce, ille sta retro le muro, respiciente per le fenestra, prospiciente per le cancello.

Le saison del amor e le canto del columba

[Le amante a su amata] ¹⁰Mi amata me parlava dicente: “Leva te, amica mie, columba mie, belle mie! E veni con me! ¹¹Jam le hiberno passava e le pluvias hibernal recedeva e partiva. ¹²Flores appareva in terra, e le saison del aves cantante adveniva. In nostre terra se audi le voce del columbas. ¹³Le fichiero ha maturate su ficos, e le vinias florente fragra de agradabile odor. Leva te, amica mie, belle mie, e veni con me!

Le columba in le fissuras de En-Gedi

[Le amante a su amata] ¹⁴Oh columba mie, in le fissuras del petras, in le cavernas del roccas prominente del montanias, ostende me tu facie, que tu voce sona in mi aures, quia tu voce es dulce e tu facie es amabile.

Le vulpes in le vinia

[Le amata a su amante] ¹⁵Attrappa le vulpes, le vulpettas que ruina le vinias, quia nostre vinias es florescente.

Refrain poetic: possession mutual

[Le amata re su amante] ¹⁶Mi amante es mie e io es sue. Ille pasce inter lilios.

Le gazella e le montanias rude

[Le amata a su amante] ¹⁷Ante que veni le alba e le umbras dispare, retorna a me, mi amor, como un gazella o un cervo juvene sur le rude montes.

Notas

1. Isto es rendite traditionalmente como “le rosa de Sharon”. Le plana de Sharon es un region in le plana costari del terra de Israel.
2. O “Non eveliar le amor donec illo es preste”.