Biblia/Nove Testamento/Romanos/Romanos 11

Romanos

11

Le rejection de Israel non esseva complete ni final

¹Alora io dice: Esque Deo rejectava su populo? Absolutemente no! Pois que io mesme es un israelita, un descendente de Abraham, del tribo de Benjamin. ²Deo non rejectava su populo, que ille precognosceva^[1]! Esque vos non sape lo que le Scriptura dice in re Elias, in qual maniera ille supplicava Deo contra Israel: ³“Senior, illes occideva tu prophetas, demoliva tu altares. Io solmente remaneva e illes attenta a mi vita^[2]”. ⁴Qual responsa, tamen, Deo le dava? “Io reservava pro me septe milles personas qui non se genuflecteva ante Baal^[3]”.

⁵Assi, in le mesme maniera, in le tempore presente, il ha un residuo eligite per gratia^[4]. ⁶E si il es per gratia, il non es plus per^[5] obras, alteremente le gratia non esserea plus gratia. ⁷Alora que? Israel non obteneva lo que illa cercava diligentemente, ma lo obteneva le electos. Le resto esseva indurate, ⁸sicut il es scribite: “Deo les dava usque le die de hodie un spirito de torpor^[6], oculos que non vide, aures que non audi”. ⁹E David dice: “Lor banquetto^[7] deveni pro illes un insidia e un trappa, un petra que les face impinger e un retribution. ¹⁰Se obscura lor oculos de sorta que illes non vide plus, e flecte lor dorsos pro semper^[8]”.

¹¹Io alora demanda, esque illes impingeva e cadeva irrevocabilemente? Absolutemente no! Per lor transgression, tamen, le salvation ha pervenite al Gentiles, pro render jelose Israel. ¹²Ora, si lor transgression significa ricchessas pro le mundo e lor disfacta significa ricchessas pro le Gentiles, quanto plus portera lor plen restauration^[9].

¹³Ora io parla a vos Gentiles. Durante que io es un apostolo del Gentiles, io magnifica^[10] mi ministerio ¹⁴si io solmente poterea provocar mi populo^[11] a jelosia e salvar alcun de illes. ¹⁵Pois que lor rejection significava^[12] le reconciliation del mundo, que esserea lor readmission si non vita ex le mortos? ¹⁶Si le prime portion del pasta offerite es sancte, alora le integre lot^[13] es sancte, e si le radice es sancte, alsi lo es le ramos.

¹⁷Ora, si alcun del ramos esseva rumpite, e tu, planton de olivo silvatic, esseva graffate inter illos e perveniva assi a participar al ric radice del olivo, ¹⁸non va vantar te con arrogantia super le altere ramos. Si tu, tamen, te vanta, rememora que tu non supporta le radice, ma le radice supporta te. ¹⁹Alora tu dicera: “Le ramos esseva secate^[14] a que io esseva graffate in lor placia”. ²⁰Tu ha ration^[15]. Illos esseva secate a causa de lor incredulitate, ma tu remane firme per tu fide. Alora, non sia arrogante, ma time! ²¹Pois que si Deo non sparniava le ramos natural, forsan ille non sparniara mesmo te. ²²Remarca, alora, le bontate e le severitate de Deo - severitate verso illes qui cadeva, ma le bontate de Deo verso te, proviste que tu permane in su bontate, alteremente mesmo tu essera secate^{[16] 23}Mesmo illes - si illes non permane in lor incredulitate - essera regraffate, proque Deo pote graffar les de novo. ²⁴Pois que si tu esseva secate de lo que es per natura un olivo silvatic, e, graffate, contra natura, in un olivo cultivate, quanto plus iste ramos natural essera regraffate in lor proprie olivo?

²⁵Pois que io non vole que vos ignora iste mysterio, fratres e sorores, de sorta que vos non sia vangloriose^[17]: un induration partial eveniva in Israel usque habera entrate le numero complete^[18] del Gentiles, ²⁶e assi tote Israel essera salvate, sicut il es scribite: “Le liberator exira de Sion, ille removera le iniquitate de Jacob. ²⁷E isto es mi pacto con illes^[19] quando io porta via lor peccatos^[20]”.

²⁸Quanto al Evangelio, illes es inimicos pro vostre avantage^[21], ma quanto al election, illes es multo amate in consideration de lor ancestres^[22], ²⁹pois que le donos e le vocation de Deo es irrevocabile. ³⁰Sicut vos esseva previemente disobediente a Deo, ma nunc vos recipeva misericordia a causa de lor disobedientia, ³¹assi illes esseva disobediente a fin que, per le misericordia date a vos, illes alsi potera nunc reciper misericordia. ³²Pois que Deo imprisionava omnes in lor disobedientia pro monstrar su misericordia a omne sorta de personas^[23].

³³Oh profunditate del ricchessa e del sapientia e del cognoscentia de Deo! Quanto insondabile es su judicios e quanto inscrutabile es su vias! ³⁴Pois que “Qui comprehendeva le mente del Senior, o qui esseva su consiliero^[24]? ³⁵O qui primo dava a Deo de sorta que Deo deberea restituer lo^[25]?” ³⁶Pois que de ille e pro ille es tote le cosas. A ille sia le gloria pro semper! Amen.

Notas

1. O “cognosceva anteriormente”.
2. Citation de 1 Reges 19:10,14.
3. Citation de 1 Reges 19:18.
4. O “conformemente al election del gratia de Deo”.
5. O “sur le base de”.
6. O “insensibilitate”.
7. O “tabula”.
8. Citation del Psalmo 69:22-23.
9. O “lor plenitude”, o “plen inclusion”.
10. O “honora”.
11. O “compatriotas”.
12. O “es”.
13. O “massa”.
14. O “rumpite”.
15. O “ben”, o “certemente”.
16. O “rumpite”.
17. O “estima vos mesme sage”.
18. O “plenitude”.
19. Citation de Isaia 59:20-21.
20. O “retrahera”, “portara via”. Citation de Isaia 27:9; Jeremia 31:33-34.
21. O "a causa de vos".
22. O "a causa de vostre patres".
23. O “a totes”.
24. Citation de Isaia 40:13.
25. O “recompensar le”. Citation de Job 41:11.