Biblia/Nove Testamento/Mattheo/Mattheo 27

←Mattheo 26

Le Biblia in Interlingua Mattheo

Mattheo 28→

Mattheo

27

Le suicidio de Judas

¹Le principes del sacerdotes e le seniores del populo se congregava mane pro excogitar le maniera de facer condemnar Jesus a morte. ²Illes le faceva ligar, le conduceva via e le livrava a Pilato, le governator roman.

³Quando Judas, qui le habeva traite, comprendeva que Jesus habeva essite condemnate a morte, ille se compungeva e intendeva restituer le trenta monetas de argento al principes del sacerdotes e al seniores. ⁴Ille les diceva: “Io peccava proque io traiva un homine innocente^[1]”. Illes tamen replicava: “Que importa isto a nos? Illo es tu problema!”. ⁵Alora Judas projectava le monetas in le Templo, sortiva e vadeva pender se. ⁶Le principes del sacerdotes prendeva assi celle monetas e diceva: “Il non es licite poner iste monetas in le thesauro del Templo, quia illos es precio de sanguine^[2]”. ⁷De post haber se consultate, con tal monetas illes emeva le Agro del Ollero como cemeterio pro estranieros. ⁸Celle agro es ancora hodie appellate “Agro de Sanguine” pro tal ration. ⁹Isto compliva le prophetia de Jeremia, que dice: “Illes prendeva le trenta monetas de argento - le precio assi appreciate per le populo de Israel, ¹⁰e los dava pro le agro del ollero, sicut le Senior me habeva commandate facer^[3]”.

Jesus e Pilato

¹¹Ora Jesus stava ante le governator, e le governator le demandava: “Es tu le Rege del judeos?”. Jesus replicava: “Tu lo ha dicite”. ¹²Quando, tamen, le principes del sacerdotes e le seniores le accusava, Jesus respondeva nihil. ¹³Tunc Pilato le diceva: “Non audi tu quante accusationes^[4] illes porta adverso te?”. ¹⁴Jesus tamen non dava responsa a alcun del accusationes, tanto que de isto le governator esseva multo surprendite.

¹⁵Ora le governator habeva le costume de dimitter al turba un prisionero, quem illes voleva. ¹⁶Tunc il habeva un prisionero insigne appellate Barabba^[5]. ¹⁷Alora congregate le turbas ante le domo de Pilato, ille les diceva: “Quem vole vos que io vos dimitte: Barabba o Jesus, appellate le Christo?”. ¹⁸ Pilato sapeva que Jesus le habeva essite livrate per invidia.

¹⁹Justo tunc, dum Pilato sedeva sur su sede judiciari, su uxor le habeva mandate un message que diceva: “Non habe alco a que facer con celle homine innocente^[6]. Io multo pativa propter un terribile incubo que io habeva super ille le nocte passate”. ²⁰Le principes del sacerdotes e le seniores, tamen, persuadeva le turbas peter Barabba e lassar que Jesus esseva perdite. ²¹Assi le governator les demandava itero: “Quem vole vos del duo que io dimitte?”. Omne illes diceva: “Barabba!”. ²²Pilato les respondeva: “Quid igitur deberea io facer con Jesus, appellate le Christo?”. Illes diceva: “Que ille sia crucifigite!”. ²³Pilato les demandava: “Quare? Que mal ha ille facite?”. Illes tamen magis clamava dicente: “Que ille sia crucifigite!”. ²⁴Quando Pilato videva que ille non poteva facer plus alco pro Jesus, sed magis se developpava un tumulto, ille prendeva aqua e lavava su manos coram le turba dicente: “Io es innocente del sanguine de iste homine. Le responsabilitate es vostre!”. ²⁵Respondente, tote le populo diceva: “Que le responsabilitate del effusion de su sanguine sia debitate a nos e a nostre filios^[7]!”. ²⁶Tunc ille dimitteva pro illes Barabba e, habente facite flagellar Jesus, ille esseva livrate al carnifices ut esser crucifigite.

Le milites irride Jesus

²⁷Alora le milites del governator conduceva Jesus a in le pretorio e congregava le cohorte integre circa ille. ²⁸Illes le spoliava e poneva sur ille un roba vermilie. ²⁹De post haber tressate un corona de spinas, illes lo poneva super su capite. Illes poneva un pertica in su mano dextere e, genuflectente se ante ille, le irrideva dicente: “Ave, rege del judeos!”. ³⁰Illes spueva sur ille e prendeva le pertica e repetitemente le percuteva sur le capite. ³¹Quando finalmente illes cessava rider se de ille, illes le spoliava del roba vermilie e le vestiva de novo de su proprie vestimentos. Deinde illes le duceva ut esser crucifigite.

Le crucifixion

³²Sortiente, le milites trovava un homine de Cyrene appellate Simon, e le fortiava portar le cruce de Jesus. ³³Illes assi perveniva a un loco appellate Golgotha, que significa “Loco del Cranio” ³⁴e dava a Jesus a biber vino miscite con bile. Quando tamen Jesus lo gustava, ille refusava biber lo.

³⁵Quando illes le crucifigeva, le milites se divideva le vestimentos de Jesus jocante los a datos. ³⁶Deinde illes se sedeva ibi e le guardava. ³⁷Super su capite ille poneva un inscription que declarava le causa de su execution: “Hic es Jesus, le Rege del judeos”. ³⁸Tunc duo criminales esseva alsi crucifigite con ille: uno a su dextera e uno a su sinistra. ³⁹Gente qui transiva per celle loco le denigrava, succutente lor capites ⁴⁰e dicente: “Tu qui diceva poter destruer le Templo e reedificar lo in tres dies, salva te ipse si tu es le Filio de Deo! Descende del cruce!”.

⁴¹Similemente, mesmo le principes del sacerdotes - con le expertos in le Lege e le seniores - le denigrava dicente: ⁴²“Ille salvava alteres e non pote salvar se ipse! Ille es le Rege de Israel! Si ille descende nunc del cruce, nos credera in ille! ⁴³Ille confide in Deo - que Deo, si ille vole, le libera nunc, quia ille diceva: ‘Io es le Filio de Deo!’”. ⁴⁴Mesmo le criminales que habeva essite crucifigite con ille, le irrideva.

Le morte de Jesus

⁴⁵Ora, ab mediedie usque a tres horas^[8] tenebras descendeva super le integre region^[9]. ⁴⁶A circa tres horas Jesus clamava a alte voce dicente: “Eli, Eli, lema sabacthani?”, que significa: “Mi Deo, mi Deo, quare tu me derelinqueva^[10]?”. ⁴⁷Quando alcunes del circumstantes lo audiva, illes diceva: “Iste homine voca Elia”. ⁴⁸Immediatemente uno de illes curreva prender un spongia, le impleva de aceto, lo poneva super un pertica e le dava a biber. ⁴⁹Ma le ceteros diceva: “Expecta! Vamos vider si Elia veni salvar le^[11]!”.

⁵⁰Deinde Jesus clamava itero in alte voce e emitteva su spirito. ⁵¹In ille momento ipse le velo del Templo se scindeva in duo partes ab le summitate al fundo. Le terra se succuteva e le petras se scindeva. ⁵²Le sepulcros se aperiva e le corpores de multe personas pie^[12] qui esseva morte, esseva resuscitate. ⁵³Illes quitava le cemeterios post le resurrection de Jesus e appareva a multe gente.

⁵⁴Ora, quando le centurio e illes qui esseva con ille custodiante Jesus, videva le tremor del terra e lo que habeva evenite, esseva valde terrificate e diceva: “Iste esseva vermente le Filio de Deo!”.

⁵⁵Il habeva ibi alsi multe feminas qui habeva sequite Jesus ab Galilea e qui le habeva sustenite. Illas le spectava de longe. ⁵⁶Inter illas il habeva Maria Magdalena, Maria le matre de Jacobo e Joseph, e le matre del filios de Zebedeo.

Le inhumation de Jesus

⁵⁷Ora, quando le vespere veniva, Joseph, un homine ric ab Arimathea, qui habeva devenite un discipulo de Jesus, ⁵⁸accedeva a Pilato e peteva le corpore de Jesus. Pilato, alora, ordinava que le esseva livrate. ⁵⁹Joseph prendeva le corpore e lo involveva in un drappo munde de lino ⁶⁰e le deponeva in su nove sepulcro que ille habeva facite excavar in le petra. Deinde ille faceva rolar un grande lapide al ostio del sepulcro e se allontanava. ⁶¹Sia Maria Magdalena sia le altere Maria sedeva contra le sepulcro.

Le guarda al sepulcro

⁶²Le die sequente, que es post le Die del Preparation^[13], le principes del sacerdotes e le phariseos conveniva ante Pilato ⁶³dicente: “Domino, nos rememorava que dum celle seductor esseva in vita, ille diceva: ‘Post tres dies io resurgera’. ⁶⁴Assi nos requesta de facer custodiar le sepulcro usque al tertie die, alteremente su discipulos poterea venir e furar su corpore e pois dicer al plebe: ‘Ille resurgeva ab le mortos’, e le ultime deception esserea pejor que le prime”. ⁶⁵Pilato les diceva: “Prende un guarda de milites. Vade e rende lo tanto secur quanto vos pote”. ⁶⁶Alora illes vadeva con le milites del guarda e rendeva secur le sepulcro per sigillar le lapide que lo claudeva.

Notas

1. Litt. “sanguine”.
2. Pagamento pro un homicidio.
3. Cfr. Zacharia 11:12-13; Jeremia 32:6-9.
4. O “testimonios”.
5. Alicun manuscriptos dice hic: Jesus Barabbas; alsi in 27:17.
6. O “juste”.
7. O litt. “Que su sanguine sia super nos e super nostre filios”.
8. Litt. “Ab le sexte usque al novesime hora”.
9. O “super tote le terra”.
10. Un referentia a Psalmo 22:1.
11. Alcun manuscriptos adde. “E un altere prendeva un lancea e perciava su flanco, e  se illo flueva aqua e sanguine”. Compara Johannes 19:34.
12. O “sanctos”.
13. O "parasceve"> (gr. paraskeue, preparative): velia del sabbato in le religion judee.