Biblia/Nove Testamento/Marco/Marco 13

←Marco 12

Le Biblia in Interlingua Marco

Marco 14→

Marco

13

Prediction del destruction del Templo

¹Ora, durante que Jesus quitava ille die le Templo, un de su discipulos le diceva: “Magistro, respice que lapides e que structuras!”. ²Jesus replicava: “Si, sin dubita illos es edificios magnific, ma non mesmo un de iste lapides essera lassate sur le altere! Un die, toto essera destruite!”.

³Plus tarde, Jesus sedeva sur le Monte del Olivos contra le Templo. Petro, Jacobo, Johannes e Andreas le questionava separatemente e le demandava: ⁴“Dice nos: quando evenira iste cosas? Qual signos nos videra que indicara que tal cosas es sur le puncto de accomplir se? ⁵Jesus incipeva dicer les: “Sia alerte a fin que nemo vos seduce! ⁶Multes venira in mi nomine, dicente: “Io es le Messia^[1]” e illes seducera multes. ⁷Vos audira de guerras e de menacias de guerra, ma non time! Iste cosas debera evenir^[2], ma le fin non consequera immediatemente.⁸Un nation surgera guerrear contra un altere, e regno pugnara contra un altere regno. Il habera tremores de terra in multe locos e fames. Istos, tamen essera solmente le initio del dolores de parto: multe alteres venira.

⁹Sia vos alerte! Vos essera livrate a consilios municipal e verberate in synagogas. Propter me, vos debera presentar vos pro esser judicate coram governatores e reges. Istos essera pro vos opportunitates pro dicer les concernente me^[3]. ¹⁰Quia le bon nova del Evangelio debe primo esser predicate a omne gentes. ¹¹Quando, tamen, vos essera arrestate e portate ante le judices, non sia in anxia^[4] concernente quid dicer. Justo dice lo que Deo vos suggerera in ille momento, quia il non essera vos a parlar, ma le Spirito Sancte. ¹²Un fratre delivrara su fratre a morir, un patre traira su proprie filio, e filios surgera insimul contra lor genitores e causara lor condemnation a morte. ¹³Omnes odiara vos quia vos es mi adherentes^[5]. Qui, tamen, sustenera isto usque al fin, essera salvate.

¹⁴Quando, tamen, vos videra le abomination del desolation stante ubi illo non deberea esser (lector: face attention a isto), tunc qui se trova in Judea que ille fugi al montes. ¹⁵Qui se trova sur le terrassa de su domo, non descende e intra ut prender quid de su domo; ¹⁷e qui se trovara in le agros, que non retorna a domo mesmo pro prender su mantello. ¹⁷Guai a illas qui es pregnante e a illas qui allacta in ille dies! ¹⁸E preca ut vostre fuga non eveni in hiberno. ¹⁹Quia tunc il habera un tal tribulation nunquam evenite antea desde le creation del mundo e tanto grande que nunquam plus il habera uno simile a illo. ²⁰De facto, nisi le Senior abbrevia ille tempore de calamitate, non un singule persona superviverea. Sed, propter le electos, que ille seligeva, Deo abbreviava ille dies. ²¹Tunc, si qualcuno dice vos: “Ecce, le Christo es hic”, o “Ille es ibi”, non lo crede. ²²Quia surgera false christos e false prophetas^[6] e facera tal signos e prodigios apte a seducer, si possibile, mesmo le electos de Deo. ²³Ergo, sia alerte! Io vos prediceva toto.

Le advenimento del Filio del Homine

²⁴Sed in ille dies, post ille tribulation, le Sol se obscurara e le Luna non dara plus su splendor; ²⁵le stellas cadera del celo, e le potentias que es in le celos essera succutite. ²⁶Tunc omnes videra le Filio del Homine veniente in le nubes con grande potentia e gloria. ²⁷E tunc ille mandera angelos e illes congregara su electos ubicunque illes se trova^[7], mesmo si illes essera al confinios del terra o del celo.

Le Parabola del fichiero

²⁸Apprende le significato del parabola re le fichiero. Quandocunque su brancas deveni tenere e germina su folios, vos comprende que le estate es proxime. ²⁹Assi anque vos, quando vos vide evenir iste cosas eveni, que vos sape que ille es proxime a venir, justo al porta! ³⁰Io vos dice le veritate, iste generation non passara, donec toto se complira. ³¹Celo e terra disparera, ma mi parolas nunquam disparera.

Sia preste!

³²Concernente le die o le hora quando iste cosas evenira: nemo los sape - ni le angelos in celo, ni le Filio, ma solmente le Patre los sape. ³³Presta attention! Sia alerte! Quia vos non sape quando su tempore venira. ³⁴Isto es sicut un homine qui parti pro un viage. Ille quitava su domo e lassava su servitores a superintender lo, assignante a cata uno de illes su carga e ille commandava al portero de vigilar. ²⁵Vigila, ergo, quia vos non sape quando le senior venira - si a medienocte o al canto del gallo, mane! ³⁶Alteremente, ille poterea trovar vos dormiente quando ille retorna subito. ³⁷Quid io vos dice, io lo dice a omnes: Vigila!

Notas

1. Litt. “Io es ille”.
2. O “Iste cosas essera necesse”.
3. O “opportunitates de testimonio”.
4. O “Non pensa anxiosemente in avantia”.
5. Litt. “propter mi nomine”.
6. Litt. “pseudo-christos e preudo-prophetas”.
7. Litt. “Ab le quatro ventos”.