Biblia/Nove Testamento/Johannes Epistolas/2Johannes

←1 Johannes 5

Le Biblia in Interlingua Epistolas de Johannes

3 Epistola de Johannes→

Secunde epistola de Johannes

Salutation

¹Del presbytero^[1] a un seniora, le Electe, e a su filios, que io ama in le veritate (e non solmente io, ma omnes qui attingeva al cognoscentia del veritate^[2]), ²propter le veritate que permane in nos e essera con nos in sempiterno. ³Gratia, misericordia e pace essera con nos de Deo le Patre e de Jesus Christo, le Filio del Patre, in veritate e amor.

Veritate e amor

⁴Me ha plenate de gaudio vider alicun de tu filios que vive^[3] conforme al veritate, justo como le Patre ha commandate nos. ⁵Ma nunc io te roga, seniora, que nos ama le unes le alteres. Isto non es un commandamento nove ma le commandamento que nos recipeva ab initio. ⁶Amar significa isto: comportar se^[4] secundo su commandamentos. Isto es le commandamento, justo como vos lo audiva ab initio; ergo: vive in obedientia a illo. ⁷Pois que multe seductores^[5] sortiva per le mundo. Illes non confessa que Jesus es le Christo que veniva in carne. Qui non lo confessa es un seductor e un antichristo. ⁸Sia ergo vigilante! Non va perder le fructo de nostre opera, e un die vos recipera un plen recompensa. ⁹Omnes qui procede in ultra e non remane^[6] in le doctrina de Christo non ha^[7] Deo; qui non remane in iste doctrina non ha ni le Patre, ni le Filio. ¹⁰Si alicuno veni ad vos e non porta iste doctrina, non le recipe in vostre casa ni saluta le como un confratre^[8], ¹¹proque qui le saluta in tal maniera se rende complice^[9] de su obras maligne.

Conclusion

¹²Io haberea multe altere cosas a scriber vos, ma io prefere non dicer los per papiro e tinta. Io spera venir de persona a visitar vos e parlar con vos facie a facie; assi nostre gaudio essera complete. ¹³Le filios de tu soror eligite te saluta.

Notas

1. O “ancian”, titulo del persona responsabile de un ecclesia local. Le author demonstra reticentia in identificar se ipse e le destinatario del epistola. Isto lo rende un message universal.
2. Tote le ver christianos que se tene firmemente al Christologia apostolic ante le oppositores secessionista describite in 1 Johannes.
3. Let. “ambula”.
4. Let. “ambular”.
5. O “deceptores”.
6. Non se limita, non seque.
7. Non es in communion con Deo.
8. Let. “non le saluta”, non recipe ille como un confratre.
9. O “participa”.