Biblia/Nove Testamento/Johannes/Johannes 17

^[1]

←Johannes 16

Le Biblia in Interlingua Johannes

Johannes 18→

Johannes

17

Jesus preca ut le Patre le glorifica

¹Quando Jesus terminava dicer tote iste cosas, ille levava su oculos al celo e diceva: “Patre! Le tempore adveniva: glorifica^[2] tu Filio, ut le Filio te glorifica. ²Quia tu le dava autoritate super omnes^[3] a que ille da vita eterne a tote illes que tu le confideva. ³Ora, isto es le via que conduce al vita eterne: cognoscer te^[4], le unic e ver Deo, e cognoscer Jesus Christo^[5], que tu mandava a in le mundo. ⁴Io te glorificava super le terra per accomplir le obra que tu me dava a facer. ⁵E nunc, Patre, glorifica me apud te ipse con le gloria que jam io habeva mesmo ante a que le mundo esseva create.

Jesus preca pro su discipulos

⁶Io manifestava tu nomine al homines que tu me dava de^[6] iste mundo. Illes esseva semper le tues e tu me les dava, e illes ha obedite a tu parola. ⁷Nunc illes apprendeva^[7] que toto lo que tu me dava proveni de te, ⁸quia io les dava le parolas que tu me dava. Illes los acceptava e comprende vermente que io exiva de te, e illes crede que tu me mandava.

⁹Io roga pro illes; io non roga pro le mundo, ma pro illes que tu me confideva, quia illes te pertine. ¹⁰Tote lo que io ha te pertine, e tote lo que tu ha me pertine, e illes me glorificava^[8]. ¹¹Nunc io parti de iste mundo, ma illes remane in iste mundo, e io veni ad te. Sancte Patre, custodia les in tu nomine^[9], que tu me dava, ut illes sia in communion le unes con le alteres, sicut nos es in communion. ¹²Durante mi tempore hic, io les preservava in tu nomine, que tu me dava, e les custodiava. Non mesmo uno de illes periva, nisi ille que esseva destinate al perdition^[10], ut le Scriptura se compliva. ¹³Nunc, tamen, io veni ad te, e io dice iste cosas in le mundo, ut in illes ipse mi gaudio se compli^[11]. ¹⁴Io les dava mi parola, e le mundo les odiava, quia illes non pertine a iste mundo, sicut io non pertine a iste mundo. ¹⁵Io non te roga de remover les de iste mundo, ma que tu le preserva del Maligno. ¹⁶Illes non pertine al mundo, sicut io non pertine a iste mundo. ¹⁷Sanctifica les in le veritate; tu parola es veritate. ¹⁸Sicut tu me mandava a in iste mundo, assi io les manda a in le mundo. ¹⁹Pro illes io me sanctifica^[12] ut illes ipse sia sanctificate in le veritate.

Jesus preca pro su futur discipulos

²⁰Io non roga pro illes solmente, ma alsi pro illes que credera in me per le medio de lor parolas^[13]. ²¹Io roga ut illes sia in communion^[14], sicut tu, Patre, es in communion con me e io es in communion con te. Io roga a que illes sia in communion con nos, ut le mundo crede que tu me mandava.

²²Le gloria que tu me dava io les lo dava, ut illes sia in communion, sicut nos es in communion, ²³io con illes e tu con me. Que illes sia completemente in communion, ut le mundo va cognoscer que tu me mandava, e tu amava illes sicut tu me amava.

²⁴Patre! Io vole que illes qui tu me confideva sia va esser con me ubi io es, ut illes vide le gloria que tu me dava, quia tu me amava mesmo desde le creation del mundo! ²⁵Patre juste, le mundo non te cognosce, ma io te cognosce, e iste homines comprende que tu me mandava. ²⁶Io ha facite les cognoscer tu nomine^[15] e io continuara facer lo, ut le amor per le qual tu me amava sia in illes, e io sia in illes”.

Notas

1. O “consummar”.
2. Gr. δοξάζω = laudar, magnificar, exaltar, celebrar, honorar, render cognite, render illustre, facer que le dignitate e valor de alicuno sia manifeste e recognoscite.
3. Litt. “omne carne”.
4. O “que illes cognosce”.
5. O “Jesus, le Messia”.
6. O “ex iste mundo”, “selecte de iste mundo”.
7. O “veniva al cognoscentia”.
8. O “io esseva glorificate in illes”.
9. O “per le potentia de tu nomine”.
10. Litt. “le filio del perdition”.
11. O “a que illes pote facer le experientia de mi gaudio”.
12. Le significato de isto pote esser hic: “Io me offere pro illes quam un sancte sacrificio ut illes sia rendite sancte  per le medio de tu veritate”.
13. O “testimonio”.
14. O “ut illes sia uno”.
15. Le thema del revelation del nomine del Patre es relevate de Johannes 17:6 e se refere al revelation que Jesus faceva del nomine divin in Exodo 3:14 in su persona.