Biblia/Nove Testamento/Hebreos/Introduction
Introduction[edit]
Le Epistola al Hebreos es substantialmente un appello a remaner fidel a Jesus, le sol ver Messia e Mediator inter Deo e le humanos. Illo es un predication erudite, ponite per scripto e adressate a christianos de origine hebraic que se lassava seducer per le nostalgia pro le fastose culto in le templo de Jerusalem e esseva temptate de deserer le congregationes christian pro retornar al Hebraismo. A illes le author de iste scripto, probabilemente un erudite doctor de Alexandria e bon cognoscitor del version grec del Biblia hebraic, adressa un pressante appello al perseverantia in le fide e in le vita christian. Le exhortation al fidelitate (cfr. Hebreos 10:19-13:24) es le consequentia de un discurso theologic per le qual le author emphatisa le superior dignitate del Christo (= Messia) in relation a illo del angelos (cfr. Hebreos 1-2), le superior efficacia del sacerdotio de Christo in comparation al mediation de Moses e del sacerdotio levitic (Hebreos 3-7), le superioritate del culto e del Sanctuario (cfr. Hebreos 8:1-10,18).