Biblia/Nove Testamento/Actos/Actos 17

←Actos 16

Le Biblia in Interlingua Actos

Actos 18→

Actos

17

Paulo e Silas a Thessalonica

¹Postquam haber ambulate per le citates de Amphipolis e Apollonia, Paulo e Silas perveniva a Thessalonica, ubi il habeva un synagoga del Judeos. ²Secundo su consuetude, Paulo entrava in illo e per tres sabbatos ille dissertava con illes del Scripturas, ³explicante e demonstrante que il esseva necesse que le Christo pativa e resurgeva del mortos. Ille les diceva: “Iste Jesus qui io annuncia vos es le Christo^[1]”. ⁴Alicunes inter illes esseva persuadite^[2] per su parolas e se jungeva a Paulo e Silas insimul a un grande numero de Grecos devote^[3] e non pauc feminas eminente^[4]. ⁵Le Judeos, tamen, deveniva jelose de isto; assi illes congregava alicun malfactores^[5] ex le canalia del mercato, illes formava un turba e excitava un tumulto in le citate. Illes attaccava le domo de Jason, querente Paulo e Silas ut traher les coram le assemblea del populo. ⁶Non trovante les ibi, illes traheva foras Jason e altere credentes coram le officieros del citate, clamante: “Le homines^[6] que jam seditionava^[7] in le mundo integre, ha venite hic alsi ⁷e Jason les recipeva in su proprie domo. Illes age contra le decretos del Imperator^[8] dicente que il ha un altere rege que se appella Jesus!”. ⁸Illes causava tumultos inter le turbas e inter le officieros del citate que habeva audite iste cosas. ⁹Assi, postquam haber fortiate Jason e le altere credentes^[9] a pagar un caution, le officieros del citate les dimitteva.

Paulo e Silas a Berea

¹⁰Assi le fratres, de nocte, tosto faceva partir Paulo e Sila por Berea. Quando ibi illes arrivava ille entrava in le synagoga del Judeos. ¹¹Iste Judeos-ci habeva un mente plus aperte del alteres, quia illes recipeva le message de Paulo avidemente, perscrutante quotidianmente le Scripturas, pro verificar que lo que illes audiva esseva secundo veritate. ¹²Igitur multes inter illes credeva insimul a non pauc feminas e viros eminente.

¹³Quando tamen le Judeos de Thessalonica apprendeva que Paulo habeva alsi annunciate le Parola de Deo in Berea, illes adveniva ibi, excitante commotion e turbamento in le turba. ¹⁴Alora le fratres faceva subito partir Paulo verso le mar, ma Silas e Timotheo remaneva in Berea. ¹⁵Illes qui accompaniava Paul le escortava usque ad Athenas. Deinde illes retornava ad Berea con instructiones pro Silas e Timotheo de venir le plus tosto a junger se a Paulo.

Paulo predica in Athenas

¹⁶Durante que Paulo les expectava in Athenas, su spirito esseva grandemente irritate in vider que ubicunque in le citate il habeva idolos^[10]. ¹⁷Assi ille incipeva omne die a disputar con le Judeos e le paganos devote in le synagoga e con omne illes que ille incontrava in le mercato. ¹⁸Mesmo philosophos epicuree e stoic dissereva con ille. Alicunes diceva: “Quid intende dicer iste ignorante charlatan^[11]?”. Alteres diceva: “Ille pare parlar in re deos estranie!”. Illes diceva assi proque ille proclamava un message in re Jesus e Anasthasis^[12]. ¹⁹Assi illes apprehendeva Paulo e le portava al Consilio del Areopago e le diceva: “Poterea nos saper quid es iste nove doctrina que tu proclama? ²⁰Proque tu porta a nostre aures cosas surprendente, assi nos vole saper quid vole isto esser”. ²¹(Omne le Athenienses e le estranieros qui viveva ibi pareva soler passar lor tempore nisi in debatter e in audir omne le novitates del momento).

²²Paulo, ergo, stante in le medio del Areopago, diceva: “Homines de Athenas, io remarca que vos es personas in omne maniera multo religiose^[13], ²³quia, ambulante per vostre vias e vidente vostre simulacros, io trovava alsi un altar con le inscription: ‘A un deo incognite’. Quid, ergo, ignorantemente vos adora, io annuncia vos. ²⁴Deo, qui faceva le mundo e tote lo que illo contine, le qual es le Deo del celo e del terra, non habita in templos facite per manos human, ²⁵ni illo es servite per manos human como si ille necessita alique, quia ille ipse da le vita, le pneuma e toto a omnes. ²⁶Ex un sol homine ille faceva tote le nationes del humanos ut illes habitava le terra integre, definiente le terminos de lor tempores e habitation. ²⁷Su proposito pro le nationes esseva que illos quere Deo, e forsan le cerca tastante e le trova, ben que ille non es longe ab cata uno de nos. ²⁸De facto, in ille nos vive, move nos e existe, sicut alsi un de vostre poetas ha dicite: “Quia etiam nos es su genitura^[14]’. ²⁹Ergo, nam nos omnes es su genitura, nos non deberea reputar que le deitate poterea unquam esser simile a auro, argento, o lapide, facite per le maestria e imagination human. ³⁰Igitur, Deo passava super tal tempores de ignorantia e ille nunc commanda a omnes de repentir se, ³¹quia ille establiva un die in le qual ille va judicar le mundo con justitia per le medio de un homine que pro isto ille constitueva, e le confirmation que il es assi Deo lo provideva a omnes facente le resuscitar del mortos”.

³²Quando Paulo les diceva in re le resurrection del mortos, alicunes le irrideva con contempto, ma alteres diceva: “In re iste puncto nos te audira un altere vice^[15]”. ³³Assi Paulo exiva de lor medio. ³⁴Alicun personas, tamen, se jungeva a ille e credeva. Inter illes il habeva Dyonisio le Areopagita, un femina appellate Damaris, e alteres con illes.

Notas

1. O “le Messia”.
2. O “credeva”.
3. Gr. “σεβομένων Ἑλλήνων” o “de Grecos que timeva Deo”, un termino technic pro ille categoria de paganos que adorava le Deo de Israel e in multe casos observava le Lege mosaic, ma non se submitteva al circumcision e deveniva un proselyto del judaismo. Luca sovente mentiona tal personas (Actos 13:43, 50; 16:14; 17:17; 18:7).
4. O “nobile”.
5. Gr. “πονηροὺς”, o “homines sin valor”, “provocatores”.
6. Paulo e Silas.
7. O “causava molestias”.
8. Litt. “de Cesar”.
9. O “fratres”.
10. O “que le integre citate esseva devotate al idolatria”.
11. O “balbutiator”.
12. O “resurrection”, in greco “Anastasis”, que illes reputava esser le nomine de un dea.
13. Iste termino original significa alsi “superstitiose”.
14. Iste citation es ab Arato (ca. 310-245 a.c.), Phaenomena 5. Paulo assere que il existe un relation general e responsabilitate verso Deo pro tote le humanitate.
15. O “itero”.