Belhs m'es l'estius el temps floritz

From Wikisource
Jump to navigation Jump to search
Belhs m'es l'estius el temps floritz
by Jaufre Rudel
Old orthography: Belhs m'es l'estius e'l temps floritz

Belhs m’es l’estius e·l temps floritz
Quan l’auzelh chanton sotz la flor,
Mas ieu tenc l’ivern per gensor
Quar mais de joy m’i es cobitz,
Et quant hom ve son jauzimen
Es ben razos e d’avinen
Qu’om sia plus coyndes e guays.

Er ai ieu joy e suy jauzitz
E restauratz en ma valor,
E non iray jamai alhor
Ni non querrai autrui conquistz,
Qu’eras say ben az escien
Que selh es savis qui aten
E selh es fols qui trop s’irays.

Lonc temps ai estat en dolor
E de tot mon afar marritz,
Qu’anc no fuy tant fort endurmitz
Que no·m rissides de paor.
Mas aras vey e pes e sen
Que passat ai aquelh turmen,
E non hi vuelh tornar ja mays.

Mout mi tenon a gran honor
Tug silh cui ieu n’ey obeditz
Quar a mon joi suy revertitz :
E laus en lieys e Dieu e lor,
Qu’er an lur grat e lur prezen,
E, que ieu m’en anes dizen,
Lai mi remanh e lay m’apays.

Mas per so m’en sui encharzitz,
Ja no·n creyrai lauzenjador,
Qu’anc no fuy tan lunhatz d’amor
Qu’er no·n sia sals e gueritz.
Plus savis hom de mi mespren,
Per qu’ieu sai ben az escien
Qu’anc fin’amors home non trays.

Mielhs mi fora jazer vestitz
Que despolhatz sotz cobertor
E puesc vos en traire auctor
La nueyt quant ieu fuy assalhitz.
Totz temps n’aurai mon cor dolen,
Quar aissi·s n’aneron rizen,
Qu’enquer en sospir e·n pantays.

Mais d’una re soi en error
E·n estai mos cors esbaïtz
Que tot can lo fraire·m desditz
Aug autrejar a la seror ;
E nulhs hom non a tan de sen,
Que puesc’aver cominalmen,
Que ves calque part non biais.

El mes d’abril e de pascor
Can l’auzel movon lur dous critz,
Adoncs vuelh mos chans si’auzitz,
Et aprendetz lo, chantador !
E sapchatz tug cominalmen
Qu’ie·m tenc per ric e per manen
Car soi descargatz de fol fais.


This work was published before January 1, 1929, and is in the public domain worldwide because the author died at least 100 years ago.