Ban/Gaguritan Bhimaniyu
Deskripsi[edit]
Bahasa Indonesia[edit]
Bahasa Inggris[edit]
Naskah[edit]
[ 1 ]Nomor: 3/70/u
Judul : Gaguritan Bhimaniyu
Lampiran I-12
Ukuran: P.41 cm, L.3,5 cm
[ ᭑ 1A]
No:~
᭚᭜᭚ ᬕᬕᬸᬭᬶᬢᬦ᭄ᬪᬶᬫᬦ᭄ᬬᬸ᭚᭜᭚
Lampiran 1-12 [ 2 ][ ᭑ 1B]
᭑᭞᭛᭜᭛ᬒᬁᬅᬯᬶᬖ᭄ᬦᬫᬵᬲ᭄ᬢᬸ᭛ᬇᬓᬶ᭞ᬗ᭞ᬕᬕᬸᬭᬶᬢᬦ᭄ᬪᬶᬫᬵᬦ᭄ᬬᬸ᭚᭜᭚ᬧᬸᬧᬸᬄᬤᭂᬫᬸᬂ᭚᭜᭚ᬭᬶᬂᬧᬰ᭄ᬭᬫᬦ᭄ᬬᬸᬬᬸᬧᬢᬶᬓᬧᬢᬦᬦ᭄᭞ᬧᬹᬃᬯᬂᬳᬯᬦ᭄ᬓ᭄ᬭᬫᬓᬶᬤᬸᬮ᭄᭞ᬧᬲᬶᬲᬸᬭᬂᬦᬶᬮᬶᬲ᭄᭞ᬗᬸᬦ᭄ᬢᬸᬮ᭄ᬓᬯᬶᬢ᭄ᬦ᭄ᬬᬗᬯᬾᬕᬸᬭᬶᬢ᭄᭞ᬓᬵᬮᬤᬶᬦᬯᬺᬳᬧᬢ᭄ᬬ᭞ᬢᬵᬭᬮᬗ᭄ᬓᬶᬃᬢᬗ᭄ᬕᬮ᭄ᬲᬢᬸ᭞ᬩᬸᬮᬦ᭄ᬫᬾ
ᬳᬶᬢᬳᬸᬦ᭄ᬤᬾᬓ᭞ᬦᬵᬯᬲᬧ᭄ᬝᬧᬜ᭄ᬘᬫᭂᬢᬶᬓ᭄᭞ᬗᭂᬢᬸᬲ᭄ᬲᬢ᭄ᬯᬘᬘᬦ᭄ᬢᬸᬗᬦ᭄᭞ᬓᬮᬭᬦ᭄ᬲᬂᬪᬶᬫᬵᬦ᭄ᬬᬸ᭟ᬓᬮᬯᬦ᭄ᬲᬸᬩᬤ᭄ᬭᬤᬾᬯᬷ᭞ᬳᬶᬩᬸᬦ᭄ᬳᬶᬤ᭞ᬭᬶᬂᬤ᭄ᬬᬭᬯᬢᬶᬳᬸᬫᬸᬗ᭄ᬕᬸᬄ᭞ᬜᬶᬯᬶᬲᬂᬓᬺᬱ᭄ᬡᬧ᭄ᬭᬪᬸ᭞ᬤᬾᬦᬶᬂᬳᬶᬤᬲᬂᬓᬶᬭᬶᬢᬶ᭞ᬧᬜ᭄ᬘᬧᬵᬡ᭄ᬥᬯᬲᬫ᭄ᬬᬦ᭄᭞ᬫᬗ᭄ᬕᭂᬄᬬᬬᬄᬢᭂᬮᬲ᭄ᬭᬭᬸᬤ᭄᭞ᬫᬜᬸᬲᬸᬧ᭄ᬭᬶᬂᬕᬸᬦᬸᬂ
ᬳᬮᬲ᭄᭞ᬭᭀᬭᬲ᭄ᬬᬃᬱᬭᬸᬜᬶᬮᬶᬩ᭄᭞ᬤᬾᬦᬶᬂᬓᬲᭀᬭᬦ᭄ᬳᬦᬶᬢ᭞ᬦᬾᬗᬯᬶᬦᬂᬦᬦ᭄ᬤᬂᬓᭂᬩᬸᬲ᭄᭟ᬓᬭᬢᭀᬦ᭄ᬮᬦ᭄ᬚᬕᬢ᭄ᬲᬫᬶ᭞ᬭᬵᬚᬯᬶᬪᬯ᭞ᬲᬃᬯᬫᬸᬮᬾᬢᭂᬮᬲ᭄ᬲᬫ᭄ᬧᬸᬦ᭄᭞ᬓᬯᬯᭂᬂᬲᬂᬓᬸᬭᬸᬦᬣ᭞ᬳᬫᬢ᭄ᬭᬮ᭄ᬢᬦ᭄ᬯᭂᬮᬲ᭄ᬳᬲᬶᬄ᭞ᬳᬲᬦᬓ᭄ᬮᬯᬦ᭄ᬧᬵᬡ᭄ᬤᬯ᭞ᬦᬾᬳᭀᬕ᭄ᬬᬧᬕᭂᬄᬫᬶᬓᬸᬓᬸᬄ᭞ᬩᬶ
ᬦᬮᬶᬓ᭄ᬗᬯᬾᬩᬜ᭄ᬘᬦ᭞ᬲᬢᬢᬫᬗᭂᬯᬾᬢ᭄ᬧᬢᬶ᭞ᬤᬸᬃᬦᬶᬢᬶᬦᬾᬢᬦ᭄ᬧᬢᬦ᭄ᬤᬶᬗᬦ᭄᭞ᬯ᭄ᬫᭀᬳᬳᬸᬫᬤᭂᬕ᭄ᬳᬕᬸᬂ᭟ᬫᬶᬭᬶᬩ᭄ᬢᭀᬂᬳᬤᬤᬾᬯᬯᬶᬥᬶ᭞ᬳ᭄ᬬᬂᬇᬰ᭄ᬯᬭ᭞ᬲᬭᬰ᭄ᬯᬢᬷᬦᬾᬳᬦ᭄ᬤᬸᬮᬸ᭞ᬓᬂᬧᬰ᭄ᬘᬤ᭄ᬭᬶᬂᬳᬮᬳᬬᬸ᭞ᬲᬳᬫ᭄ᬩᭂᬓ᭄ᬲᬃᬯᬦᬺᬱ᭄ᬝᬶ᭞ᬦᬗ᭄ᬳᬶᬂᬤᬯᭂᬕ᭄ᬕᬸᬂᬳᬫ᭄ᬧᬸᬭ᭞ᬦᬾᬫᬗᬸᬭᬶᬢ᭄ᬳᬶᬤᬚᬸᬕᬸᬮ᭄᭞
[ ᭒ 2A]
ᬢᬸᬳᬸᬢᬸᬯᬄᬫᬜᬩᬢᬄ᭞ᬢᬦ᭄ᬧᬓᬤᬂᬰᬵᬲ᭄ᬢ᭄ᬭᬅᬚᬶ᭞ᬫᭀᬕᬢᬦ᭄ᬓᭂᬦᬾᬂᬓᬸᬢᬶᬮ᭞ᬧᬗ᭄ᬓᬄᬗᬯᬶᬢᬦ᭄ᬧᬳᬸᬦ᭄ᬤᬸᬓ᭄᭚᭜᭚ᬧᬸᬧᬸᬄᬲᬶᬦᭀᬫ᭄᭚᭜᭚ᬮᭀᬩᬦ᭄ᬫᬦᬳᬾᬫᬓᬤ᭞ᬫᬮᬚᬄᬫᬗᬭᬂᬜᬜᬶ᭞ᬫᬶᬮᬸᬫᬦᬲᬶᬓᬶᬦ᭄ᬲᬵᬕᬭ᭞ᬫᬩᭂᬢ᭄ᬚᬫ᭄ᬧ᭄ᬭᬄᬳᬯᬓ᭄ᬩᭂᬗᬶᬮ᭄᭞ᬦᬶᬗ᭄ᬕᬭᬂᬘᬘᬤ᭄ᬭᬶᬂᬕᬸᬭᬶᬢ᭄᭞
ᬫᬕ᭄ᬤᭀᬄᬬᬓᬲᬶᬤᬦᬼᬗᬸᬢ᭄᭞ᬗᬮᬾᬤᬗᬶᬦ᭄ᬲᬂᬫᬶᬳᬃᬱ᭞ᬫᬫᬘᬫᬶᬯᬄᬫᬯᭀᬲᬶᬦ᭄᭞ᬬᬤᬶᬦ᭄ᬳᬤᬸᬦ᭄᭞ᬲᬫ᭄ᬧᬸᬭᬲᬫ᭄ᬧᬸᬦᬂᬳᬤᬸᬓ᭟ᬲᬢ᭄ᬯᬦᬾᬚ᭄ᬯᬢᬢᬲᬂ᭞ᬲᬶᬂᬜᬲᬕᬾᬢ᭄ᬯᬾᬦ᭄ᬢᭂᬦ᭄ᬫᬡᬶᬓ᭄᭞ᬲᬶᬤ᭄ᬤᬦᬸᬓ᭄ᬱᭂᬫᬾᬂᬰᬭᬷᬭ᭞ᬗᬮᬸᬓᬢ᭄ᬫᬮᬦᬶᬂᬫᬶᬸᬳᬢᬶ᭞ᬫ᭄ᬯᬲ᭄ᬢᬸᬫᬸᬃᬤᬶᬧᬶᬗ᭄ᬕᬶᬄ᭞ᬕᭂᬮᬭᬦ᭄ᬲᬧ
ᬭᬦ᭄ᬤᬸᬦᬸᬂ᭞ᬫᭀᬕᬯᬺᬤᬶᬓᭂᬃᬢᬶᬬᬱ᭞ᬫᬧ᭄ᬯᬭᬳᬬᬸᬢᭂᬃᬤᬶ᭞ᬳᬲᬶᬂᬭᬸᬗᬸ᭞ᬲᬶᬦᬸᬭᬸᬧᬦ᭄ᬲᬃᬯᬫᬸᬮ᭄ᬬ᭟ᬓᬾᬢᭀᬫᬸᬓ᭄ᬬᬦᬾᬓᬲᬸᬭᬢ᭄᭞ᬕᭂᬦ᭄ᬤᬶᬂᬳᬗ᭄ᬕᬾᬦ᭄ᬫᬦᬸᬦ᭄ᬤᬸᬦᬶᬦ᭄᭞ᬲᬲᬶᬫ᭄ᬩᬶᬂᬕᬕᬫᬜᬤ᭄ᬫ᭞ᬫᬮᬚᬳᬶᬓ᭄ᬱᬂᬳ᭄ᬬᬂᬅᬚᬶ᭞ᬫᬤᬓ᭄ᬲᬶᬤᬫᬦᬸᬢ᭄ᬳᬶᬦ᭄ᬤᬶᬓ᭄᭞ᬮᬶᬗᬶᬂᬰᬵᬲ᭄ᬢ᭄ᬭᬫᬶᬯᬄᬢᬸᬢᬸᬃ᭞ᬲᬃᬯ
ᬰᬵᬲᬦᬅᬕᬫ᭞ᬧᬸᬱ᭄ᬝᬓᬓᬶᬤᬸᬂᬓᬓᬯᬶᬦ᭄᭞ᬫᬗ᭄ᬕᭂᬄᬕᬸᬭᬸ᭞ᬲᬸᬮᬸᬄᬢᬳ᭄ᬬᬤ᭄ᬬᬢ᭄ᬫᬶᬓ᭟ᬲᬂᬪᬶᬫᬦ᭄ᬬᬸᬘᬭᬶᬢ᭞ᬧᬸᬢ᭄ᬭᬦ᭄ᬳᬶᬤᬲᬂᬓᬶᬭᬶᬢᬶᬤᬫ᭄ᬧᬢᬶᬭᬶᬂᬲᬂᬲᬸᬩᬤ᭄ᬭ᭞ᬳᬭᬶᬦ᭄ᬲᬂᬓᬺᬱ᭄ᬡᬪᬸᬧᬢᬶ᭞ᬢᭂᬮᬲ᭄ᬳᬦᭂᬫ᭄ᬩᬕᬸᬲ᭄ᬕᭂᬜ᭄ᬚᬶᬂ᭞ᬲᬵᬭᬶᬦ᭄ᬫᬡᬶᬓ᭄ᬧᬸᬭᬶᬳᬕᬸᬂ᭞ᬓᬲᭀᬩ᭄ᬭᬶᬂᬅᬱ᭄ᬝᬶᬦᬧᬸᬭ᭞ᬢᬲᬓ᭄ᬳᬶᬂᬬᭀ [ 3 ][ ᭒ 2B]
᭒᭞ᬕᬲᬫᬥᬶ᭞ᬢᬸᬃᬭᬳᬬᬸ᭞ᬢᭂᬓᬦ᭄ᬳᬶᬂᬧᬥᬦᬸᬃᬤᬭᬦ᭄᭟ᬤᬾᬦᬶᬂᬲᬫ᭄ᬧᬸᬦ᭄ᬧᬕᭂᬦ᭄ᬢᭀᬲᬦ᭄᭞ᬓᬳᬬᭀᬦᬾᬯᬲ᭄ᬢᬸᬫᬩᬮᬶᬓ᭄᭞ᬓᬤᬶᬘᬓ᭄ᬭᬦᬶᬂᬕᬶᬮᬶᬗᬦ᭄᭞ᬍᬫᬄᬯᭂᬢᭂᬂᬧᬢᬶᬉᬭᬶᬧ᭄᭞ᬳᭂᬜᭀᬦ᭄ᬚ᭄ᬯᬩᬶᬲᬗᬶᬫ᭄ᬧᬲᬶᬦ᭄᭞ᬚᭂᬮᬾᬦᬾᬧᬂᬩᬸᬯᬸᬂᬢᭂᬧᬸᬓ᭄᭞ᬫᬓᬤᬶᬧᬜ᭄ᬘᬧᬵᬡ᭄ᬥᬯ᭞ᬲᬓᬤᬂᬯᬃᬕᬦᬾᬲᬫᬶ
ᬧᬦᭂᬲ᭄ᬓᭂᬩᬸᬲ᭄᭞ᬮᬕᬩᬬᬓᬦᬭᬓᬦ᭄᭟ᬳᭂᬦ᭄ᬢᭀᬦᬾᬢᬸᬯᬄᬫᬓᬤ᭞ᬲᬂᬩᬶᬫᬵᬦ᭄ᬬᬸᬦᬾᬫᬗ᭄ᬓᬶᬦ᭄᭞ᬗᬤ᭄ᬧᬥᬭᬶᬂᬲᬂᬓᬺᬱ᭄ᬡ᭞ᬤᬾᬯᬶᬲᬸᬩᬤ᭄ᬭᬦᬸᬮᬸᬭᬶᬦ᭄᭞ᬫᬗᭂᬫ᭄ᬧᬶᬭᬶᬂᬤ᭄ᬯᬭᬯᬢᬶ᭞ᬫᬦᬤᬶᬧᬋᬓᬦ᭄ᬳᬕᬸᬂ᭞ᬲᬬᬗᬾᬢᭀᬂᬳᬤᬧᬤ᭞ᬯᬶᬦᬭᬳᬦ᭄ᬲᬃᬯᬧᬶᬗᬶᬢ᭄᭞ᬯᬸᬲ᭄ᬭᬶᬦᬗ᭄ᬲᬸᬓ᭄᭞ᬲᬳᬦᬦ᭄ᬢ
ᬢ᭄ᬯᬉᬢ᭄ᬢᬫ᭟ᬲᬂᬓᬺᬱ᭄ᬡᬢᬦ᭄ᬚᬗ᭄ᬓᬬᬦ᭄᭞ᬫᬧᬯᬶᬲᬶᬓ᭄ᬲᬶᬬᬂᬮᬢ᭄ᬭᬶ᭞ᬭᬶᬂᬳᬶᬤᬲᬂᬧᬃᬣᬲᬸᬢ᭞ᬦᬾᬗᬯᬶᬦᬂᬲᬬᬦ᭄ᬗᭂᬦ᭄ᬤᬶᬄ᭞ᬲᬂᬪᬶᬫᬵᬦ᭄ᬬᬸᬫᬜᬶᬯᬶ᭞ᬢᬦ᭄ᬧᭂᬕᬢ᭄ᬢᬢᭂᬂᬮᬸᬗ᭄ᬕᬸᬄ᭞ᬗᭂᬮᬭᬂᬥᬃᬫᬲᬦ᭄ᬢᬶᬓ᭞ᬳᬫ᭄ᬩᭂᬓᬾᬢᭂᬧᭂᬢ᭄ᬫᬜᬶᬯᬶ᭞ᬲᭂᬩᭂᬂᬜᬸᬜᬸᬃᬲᬶᬂᬲᭀᬮᬳᬂᬦᬸᬤᬸᬢ᭄ᬘᬶᬢ᭚᭜᭚ᬧᬸᬧᬸᬄᬕᬶᬦᬤ
᭚ᬤ᭄ᬯᬭᬯᬢᬷᬦᬾᬓᬯᬃᬡ᭞ᬲᬂᬓᬾᬰᬯᬫᬦᭂᬤᬸᬗᬶᬦ᭄᭞ᬓᬲᭀᬩ᭄ᬫᬸᬗ᭄ᬕ᭄ᬯᬶᬂᬲ᭄ᬯᬩᬯ᭞ᬢᬾᬚᬦ᭄ᬧᬸᬭᬶᬩ᭄ᬭᬫᬸᬭᬸᬩ᭄᭞ᬗᬸᬘᬶᬯᬬᬂᬲᬸᬯᬮᬬ᭞ᬤᬾᬦᬶᬂᬭᬯᬶᬢ᭄᭞ᬗᬯᬾᬳᬸᬮᬧ᭄ᬲᬂᬫᬜᬶᬗᬓ᭄᭟ᬲᬃᬯᬩᬬᭀᬢᬦ᭄ᬧᬭᬯᬢ᭄᭞ᬢᭂᬮᬲ᭄ᬩᬸᬗ᭄ᬓᬄᬚ᭄ᬭᬶᬄᬗᬶᬮᬶ᭞ᬓᭂᬫ᭄ᬩᬸᬳᬦ᭄ᬲᬂᬩᬮᬤᬾᬯ᭞ᬭᬓ
[ ᭓ 3A]
ᬦ᭄ᬳᬶᬤᬫᬤᭂᬕ᭄ᬳᬕᬸᬂ᭞ᬗᬯᬾᬯᬶᬩᬸᬳᬶᬂᬦᬕᬭ᭞ᬢᬦ᭄ᬧᬲᬶᬭᬶᬂ᭞ᬧᬸᬭᬶᬦᬾᬳᬢᭂᬧ᭄ᬫᬚᬚᬃ᭟ᬫᬯᬲ᭄ᬢᬸᬲᬬᬦ᭄ᬤᬸᬫᬶᬮᬄ᭞ᬢᬾᬚᬦ᭄ᬧᬸᬭᬶᬫᬸᬭᬸᬩ᭄ᬗᭂᬦ᭄ᬤᬶᬄ᭞ᬲᬶᬦᬸᬲᬸᬦᬦ᭄ᬧᬭᬶᬦ᭄ᬓᬾᬦ᭄ᬤ᭄ᬭᬦ᭄᭞ᬓᬲᬸᬂᬲᬸᬂᬭᬶᬂᬧᬸᬭᬶᬳᬕᬸᬂ᭞ᬧᬸᬢ᭄ᬭᬶᬦ᭄ᬳᬶᬤᬲᬂᬓᬺᬱ᭄ᬡ᭞ᬚᭂᬕᬾᬕ᭄ᬩᬗ᭄ᬓᬶᬢ᭄᭞ᬲᬶᬢᬶᬲᬸᬡ᭄ᬥᬭᬶᬪᬶᬱᬾᬓ᭟ᬤ᭄ᬬᬄᬭᬸᬓ᭄ᬫᬶᬡᬶᬳᬶᬩᬸᬦ᭄ᬳᬶᬤ᭞ᬦᬾ
ᬫᬗ᭄ᬕᭂᬄᬧ᭄ᬭᬫᬾᬰ᭄ᬯᬭᬶ᭞ᬲᬭᬸᬲᬩᬓ᭄ᬢᬶᬲᬢᬢ᭞ᬲᬶᬂᬲᭀᬮᬳᬂᬦᬸᬤᬸᬢ᭄ᬓᬳ᭄ᬬᬸᬦ᭄᭞ᬗᬯᬶᬦᬂᬳᬶᬤᬲᬂᬦᬣ᭞ᬮᬸᬮᬸᬢ᭄ᬳᬲᬶᬄ᭞ᬢᬦ᭄ᬧᬾᬦ᭄ᬤᬄᬲᬸᬃᬬᬲᬲᬗ᭄ᬓ᭟ᬓᬳᬬᭀᬦ᭄ᬲᬂᬧᬸᬢ᭄ᬭᬶᬇᬓ᭞ᬢᬦ᭄ᬧᬾᬦ᭄ᬤᬄᬳ᭄ᬬᬂᬤᬾᬯᬷᬭᬢᬶᬄ᭞ᬭᭀᬫᬦᬾᬫᭂᬓ᭄ᬫᭂᬓ᭄ᬫᬧᬜ᭄ᬚᬂ᭞ᬮᬗ᭄ᬲᬶᬂᬮᬜ᭄ᬚᬃᬫᭂᬮᭀᬓ᭄ᬮᬸᬫ᭄ᬮᬸᬫ᭄᭞ᬢᬦ᭄ᬤᬂᬍᬫᬸᬄᬫ
ᬕᭀᬮᬾᬭᬦ᭄᭞ᬲᬸᬲᬸᬜᬗ᭄ᬓᬶᬄ᭞ᬮᬶᬬᬢᬾᬗᭂᬜᬕᬂᬫᬦᬄ᭟ᬧᬜ᭄ᬚᬂᬬᬦ᭄ᬲᬫᬶᬢᬸᬢᬸᬭᬂ᭞ᬓᬳᬬᭀᬦ᭄ᬲᬂᬓᬤᬶᬭᬢᬶᬄ᭞ᬲ᭄ᬫᬭᬦᬮᬦᬾᬫᬭᬯᬢ᭄᭞ᬗᬯᬶᬦᬂᬳᬶᬤᬲᬂᬧ᭄ᬭᬪᬸ᭞ᬫᬄᬬᬸᬦ᭄ᬧᬘᬂᬫᬦᬸᬕ᭄ᬭᬳ᭞ᬳᬤᬫ᭄ᬧᬢᬶ᭞ᬭᬶᬂᬳᬶᬤᬲᬂᬧᬃᬣᬲᬸᬢ᭟ᬦᬗ᭄ᬳᬶᬂᬓᬭᬶᬗᬍᬫ᭄ᬗᬍᬫ᭄᭞ᬭᬶᬂᬓᬳ᭄ᬬᬸᬦ᭄ᬦᬾᬫᬫᬶ
ᬦᭂᬳᬶᬦ᭄᭞ᬧᬧᬦ᭄ᬜᬦᬾᬢᬦ᭄ᬓᬘᬶᬤ᭄ᬭᬦ᭄᭞ᬤᬾᬬᬦ᭄ᬦᬾᬫᬗ᭄ᬕᬶᬄᬢᬦ᭄ᬮᬸᬯᬸᬂ᭞ᬗᬶᬫ᭄ᬧᬲᬶᬦ᭄ᬰᬲᬦᬕᬫ᭞ᬦᬾᬓᬶᬦᭂᬫᬶᬢ᭄᭞ᬓᬲᬸᬂᬲᬸᬂᬓᬬᬂᬓᬯᭂᬓᬲ᭄᭟ᬳᭂᬦ᭄ᬢᭀᬦᬾᬢᬸᬳᬸᬗᬯᬶᬦᬂ᭞ᬧᬓᬳ᭄ᬬᬸᬦᬾᬓᬭᬕ᭄ᬓᬶᬭᬶᬕ᭄᭞ᬫᬯᬲ᭄ᬢᬸᬗᬮᬶᬄᬤᬮᬶᬳᬦ᭄᭞ᬲᬂᬦᬣᬫᬧᬶᬢᬦ᭄ᬭᬸᬗᬸ᭞ᬭᬶᬂᬳᬶᬦ᭄ᬤᬶᬓ᭄ᬲᬂᬓᭂᬦᬾᬂᬭᬶ [ 4 ][ ᭓ 3B]
᭓᭞
ᬫᬂ᭞ᬮᬸᬮᬸᬢ᭄ᬳᬲᬶᬄ᭞ᬦᬾᬫᬸᬮᬢᭀᬂᬤᬤᬶᬧᬲᬄ᭚᭜᭚ᬧᬸᬧᬸᬄᬧᬗ᭄ᬓᬸᬃ᭚᭜᭚ᬓᭀᬘᬧ᭄ᬫᬱᬓᬃᬢᬶᬓ᭞ᬢᬗ᭄ᬕᬮ᭄ᬧᬶᬂᬭᭀᬭᬲ᭄᭞ᬲᬂᬳᬬᬸᬲᬶᬢᬶᬲᬸᬡ᭄ᬥᬭᬶ᭞ᬗᬶᬭᬶᬂᬳᬶᬤᬲᬂᬧ᭄ᬭᬪᬸ᭞ᬧ᭄ᬭᬫᬶᬰ᭄ᬯᬭᬶᬫ᭄ᬯᬄᬯᬚ᭄ᬭᭀ᭞ᬦᬶᬓᬲᬫᬶ᭞ᬤᬯᬸᬄᬦᭂᬫ᭄ᬲᬫ᭄ᬧᬸᬦ᭄ᬮᬸᬫᬓᬸ᭞ᬫᬯᬶᬮᬲᬭᬶᬂᬲᬕᬭ᭞ᬗᬮᭀᬦ᭄ᬮᭀᬦ᭄ᬢᭂᬭᬂᬳᬶᬂᬰᬰᬶᬄ᭟ᬳᬸ
ᬮᬗᬸᬦ᭄ᬢᬦ᭄ᬧᬧᬤ᭞ᬳᬲᬶᬂᬘᬶᬗᬓ᭄᭞ᬫᬶᬭᬶᬩ᭄ᬗᬬᬧ᭄ᬢᬸᬃᬗᬜ᭄ᬚᬮᬶ᭞ᬳᬸᬫᬢᬸᬭᬶᬂᬲᬂᬧ᭄ᬭᬪᬸ᭞ᬦᬾᬲᬯᬢ᭄ᬓᬢᭀᬦ᭄ᬦᬭᬯᬂ᭞ᬧᬓᬤᬶᬧ᭄ᬤᬶᬧ᭄᭞ᬧᬸᬢᬶᬄᬜᬮᬂᬫᬶᬯᬄᬳᬸᬗᬸ᭞ᬗᬮᬾᬜ᭄ᬘᭀᬓ᭄ᬫᬓᬤᬶᬭᬢ᭄ᬦ᭞ᬧᬤᬶᬩᭂᬗᭀᬂᬫᬜᬶᬗᬓᬶᬦ᭄᭟ᬕᬸᬯᬦᬾᬭᬶᬂᬧᬶᬗ᭄ᬕᬶᬃᬚᬸᬭᬂ᭞ᬕᭂᬤᬾᬮᬶᬗ᭄ᬕᬄ᭞ᬫᬧᬜ᭄ᬘᬸᬭᬦ᭄ᬓᬦᬦ᭄ᬓᬾᬭᬶ᭞ᬢᭀ
ᬬᬦ᭄ᬜᬫᬳᬫ᭄ᬩᬸᬳᬭᬸᬫ᭄᭞ᬭᬶᬂᬧᬶᬗ᭄ᬕᬶᬃᬯᬾᬦ᭄ᬢᭂᬦ᭄ᬳᬗ᭄ᬲᭀᬓ᭞ᬓᭂᬜᬸᬂᬫᬦᬶᬲ᭄᭞ᬓᭂᬤᬧᬦᬾᬓᭂᬤᭂᬂᬮᬸᬫ᭄ᬮᬸᬫ᭄᭞ᬓᬲᬦ᭄ᬤᬶᬗᬶᬦ᭄ᬲᬶᬮᬢᬮ᭞ᬲᬂᬳᬬᬸᬤᬶᬢᬸᬫᬮᬶᬗ᭄ᬕᬶᬄ᭟ᬲᬂᬪᬶᬫᬦ᭄ᬬᬸᬧ᭄ᬭᬧ᭄ᬢ᭞ᬫᬓ᭄ᬢᬧᬶᬓᬢ᭄᭞ᬭᬶᬂᬲᬂᬦᬣᬜᬸᬚᬸᬃᬢᬗ᭄ᬓᬶᬮ᭄᭞ᬚᬸᬭᬸᬤᬾᬬᬲᬳᬤᬸᬮᬸᬃ᭞ᬦᭂᬕᭂᬦ᭄ᬧᬓ᭄ᬱᬶᬲᬤᬓᬢᬄ᭞ᬧᬓ᭄ᬱᬶ
ᬕᬸᬭᬸ᭞ᬢᬸᬫᬸᬮᬶᬲᬫ᭄ᬧᬸᬦ᭄ᬓᬳᬸᬢᬸᬃ᭞ᬭᬶᬂᬳᬶᬤᬲᬂᬦᬣᬓᬺᬱ᭄ᬡ᭞ᬮᬾᬤᬂᬓᬳ᭄ᬬᬸᬦᬾᬢᬦ᭄ᬲᬶᬧᬶ᭟ᬤᬶᬢᬸᬧᭀᬮᬶᬄᬫᬜᬶᬗ᭄ᬲᭂᬬᬂ᭞ᬲᬂᬧᬃᬣᬲᬸᬢᬗᬮᬶᬫ᭄ᬧᭂᬂᬫᬮᬶᬬᬢ᭄ᬧᬮᬶᬂ᭞ᬲᬂᬳᬬᬸᬓᬍᬲᭀᬦ᭄ᬗᬸᬦ᭄ᬢᬸᬮ᭄᭞ᬩᭂᬗᬄᬩᭂᬗᬸᬄᬢᬦᬶᬓᬃᬯᬦ᭄᭞ᬳᬸᬮᬢ᭄ᬲᭂᬤᬶᬄ᭞ᬫᭂᬘᬶᬓ᭄ᬢᬗᬦ᭄ᬤᬳᬬᬸᬲᬸᬤ᭄᭞ᬗᬭᬲ
[ ᭔ 4A]
ᬧ᭄ᬗᬮᬶᬄᬳᬮᬶᬗᬦ᭄᭞ᬧᬚ᭄ᬭᭀᬯᬦ᭄ᬦᬾᬲᭂᬩᭂᬢ᭄ᬗᬶᬭᬶᬂ᭟ᬲᬶᬢᬶᬲᬸᬡ᭄ᬥᬭᬶᬗᬦ᭄ᬤᬶᬓ᭞ᬳᬸᬤᬸᬄᬓᬓ᭞ᬗᬸᬤᬓᬾᬦᬾᬩᬸᬓᬚᬦᬶ᭞ᬫᬦᬶᬭᬢᭀᬂᬗᭂᬮᬄᬩᬬᬸ᭞ᬫᬦᬄᬭᬸᬦ᭄ᬢᬕ᭄ᬫᬦᬭᬯᬂ᭞ᬳᬤᬦ᭄ᬫᬢᬶ᭞ᬗᬸᬤᬤᬶᬦᬶᬳᭂᬦᬸᬳᬶᬤᬸᬧ᭄᭞ᬦᬶᬃᬕᬸᬡᬦᬦ᭄ᬤᬂᬲᬗ᭄ᬲᬭ᭞ᬮᬯᬸᬢ᭄ᬢᭀᬂᬳᬤᬫᬦᭀᬮᬶᬄ᭟ᬦᬶᬲᬸᬤᬃᬧᬡᬫᬜᬸᬫ᭄ᬩᬄ᭞ᬫ
ᬢᬸᬃᬩᬦ᭄ᬩᬦ᭄᭞ᬗᬸᬤᬓᬾᬢᭀᬭᬢᬸᬕᬸᬲ᭄ᬢᬶᬦᬧᬶᬲᬸᬗ᭄ᬓᬦᬶᬂᬳᬶᬭᬢᬸ᭞ᬦᬾᬗᬯᬶᬦᬂᬢᬦ᭄ᬧᬢᬾᬚ᭞ᬓᬤᬶᬓᬦ᭄ᬢᬸ᭞ᬫᬶᬦᬩ᭄ᬓᬳ᭄ᬬᬸᬦ᭄ᬦᬾᬓᬲᬦ᭄ᬤᬸᬂ᭞ᬦ᭄ᬤᬶᬓᬬᬂᬓᬤᬭᬶᬂᬢᬶᬢ᭄ᬬᬂ᭞ᬢᬶᬢ᭄ᬬᬂᬫᬶᬲᬤ᭄ᬬᬗᬸᬮᬢᬶ᭟ᬲᬓᬶᬂᬫᬦᬶᬭᬢᬦ᭄ᬲᬦ᭄ᬤᬂ᭞ᬗᬸᬩ᭄ᬤᬫᬦᬄ᭞ᬦᭂᬩᭂᬓ᭄ᬦᭂᬩᭂᬓ᭄ᬗᬯᬾᬕ᭄ᬭᬶᬂ᭞ᬫᬋᬧ᭄ᬭᬶᬂᬲᬂᬪᬶᬫᬵᬦ᭄ᬬᬸ᭞ᬲᬦᬓ᭄ᬫᬦᬶᬭᬤᬶᬫᬶ
ᬲᬦ᭄᭞ᬦᬾᬲᬸᬚᬢᬶ᭞ᬗᬮᬶᬳᬶᬦ᭄ᬫᬗᬯᬾᬩᬶᬗᬸᬂ᭞ᬚᭂᬕ᭄ᬳᬶᬘᬮ᭄ᬢᬦ᭄ᬢᭀᬮᬶᬳᬦ᭄᭞ᬗᬸᬢᬂᬢᬶᬬᬂᬓᬤᬶᬫᬗ᭄ᬓᬶᬦ᭄᭚᭜᭚ᬧᬸᬧᬸᬄᬲᬶᬦᭀᬫ᭄᭚᭜᭚ᬤᬩ᭄ᬤᬩᬂᬭᬢᬸᬤᬩ᭄ᬤᬩᬂ᭞ᬢᬗᬸᬤᬚᭂᬕ᭄ᬗᬫᭀᬂᬓᭂᬭᬶᬲ᭄᭞ᬫᬗᬯᬾᬬᬓᭂᬤᬾᬓ᭄ᬚᬕᬢ᭄᭞ᬤᬾᬦᬶᬂᬢᬦ᭄ᬫᬦᬸᬢ᭄ᬭᬶᬂᬳᬶᬦ᭄ᬤᬶᬓ᭄᭞ᬳᬶᬭᬢᬸᬫᬭᬕᬍᬯᬶᬄ᭞ᬲᬵ
ᬭᬶᬦ᭄ᬫᬡᬶᬓ᭄ᬧᬸᬭᬶᬅᬕᬸᬂ᭞ᬲᬭᬶᬂᬭᬢᬸᬚ᭄ᬯᬩᭂᬘᬶᬓᬂ᭞ᬧᬶᬢᭂᬮᬲ᭄ᬢᬶᬢ᭄ᬬᬂᬫᬗᬶᬭᬶᬂ᭞ᬧᬘᬂᬫᬢᬸᬃ᭞ᬭᬶᬂᬳᬶᬤᬲᬂᬧᬃᬣᬲᬸᬢ᭟ᬬᬦ᭄ᬳᭂᬫ᭄ᬩᭀᬓ᭄ᬢᬸᬳᬸᬢᬺᬱ᭄ᬡ᭞ᬓᭂᬫᬳᭂᬫ᭄ᬩᭀᬓ᭄ᬚ᭄ᬯᬤᬶᬕᭂᬮᬶᬲ᭄᭞ᬦᬾᬲᬸᬭᬢᬾᬳᬢᬸᬭᬂ᭞ᬮᬯᬸᬢ᭄ᬳᬾᬗ᭄ᬕᬮᬂᬫᬯᬮᬶ᭞ᬦᬶᬲᬸᬤᬃᬧᬡᬫᬫᬃᬕᬶ᭞ᬓᬘᬭᬶᬢᬲᬫ᭄ᬧᬸᬦ᭄ᬭᬯᬸᬄ᭞ᬲᬬᬕ [ 5 ][ ᭔ 4A]
᭔᭞
ᬬᬫᬗᬢᬸᬭᬂ᭞ᬲᬂᬪᬶᬫᬦ᭄ᬬᬸᬦᬫᬶᬸᬫ᭄ᬧᬾᬦᬶᬦ᭄᭞ᬮᬯᬸᬢ᭄ᬗᬸᬦ᭄ᬢᬸᬮ᭄᭞ᬢᭀᬬᬦ᭄ᬧᬦᭀᬦᬾᬜᬧ᭄ᬘᬧ᭄᭞ᬤᬾᬤᬶᬸᬓᭂᬲ᭄ᬤᭂᬓᭂᬲ᭄ᬫᬗᬦ᭄ᬤᬶᬓ᭞ᬓᬸᬤ᭄ᬬᬂᬚᬦᬶᬫᬫᬶᬦᭂᬳᬶᬦ᭄᭞ᬢᬸᬳᬸᬬᬲᬦᬓ᭄ᬤᬶᬫᬶᬲᬦ᭄᭞ᬫᬋᬧ᭄ᬭᬶᬂᬲᬂᬓᬤᬶᬭᬢᬶᬄ᭞ᬓᬾᬦᬾᬢᬶᬢ᭄ᬬᬂᬗᬸᬦ᭄ᬢᬂᬳᬦ᭄ᬢᬶᬂ᭞ᬫᬫᬋᬓᬦ᭄ᬭᬶᬂᬧᬸᬭᬶᬳᬕᬸᬂ᭞ᬯᬲ᭄ᬢᬢᬶᬢ᭄ᬬᬂᬳᭂᬦ᭄ᬢᬸᬓ᭄ᬮᬶᬓᬤ᭄᭞
ᬲᬶᬂᬲᭀᬮᬄᬫᬦᬤᬶᬲᬶᬲᬶᬧ᭄᭞ᬬᬦ᭄ᬫᬫᬸᬯᬸᬓ᭄᭞ᬯᬮᬸᬬᬩᬸᬭᭀᬦ᭄ᬳᬮᬲᬦ᭄᭟ᬫᬦᬄᬢᬶᬢ᭄ᬬᬂᬬᬸᬓ᭄ᬢᬶᬲᬭᬢ᭄᭞ᬫᬗ᭄ᬤᬾᬦᬾᬲᬶᬤᬤᬫ᭄ᬧᬢᬶ᭞ᬲᬮᬸᬂᬮᬶᬂᬲᬩᬬᬦ᭄ᬢᬓ᭞ᬲᬮᬯᬲᬾᬭᬶᬂᬳᬶᬳᬤᬶ᭞ᬚᬸᬭᬸᬤᬾᬦᬶᬫ᭄ᬩᬮ᭄ᬤᬶᬕᭂᬮᬶᬲ᭄᭞ᬜᬮᬾᬫ᭄ᬧᭀᬄᬳᬸᬫᬢᬸᬃᬜᬸᬜᬸᬃ᭞ᬳᬗ᭄ᬳᬶᬂᬦᬯᭂᬕᬂᬲᬫ᭄ᬧᬸᬭ᭞
ᬢᬶᬢ᭄ᬬᬂᬧᬸᬭᬸᬦ᭄ᬫᬧᭂᬓᬾᬮᬶᬂ᭞ᬭᬶᬂᬳᬶᬭᬢᬸ᭞ᬇᬥᭂᬧ᭄ᬢᬫ᭄ᬩᬓᬧᭂᬢᭂᬗᬦ᭄᭟ᬢᬶᬢ᭄ᬬᬂᬚᬢᬶᬲᬓᬶᬂᬚᬚᬧ᭄᭞ᬭᬶᬂᬫᬦᬳᬾᬗᬭᬲᬦᬶᬦ᭄᭞ᬧᬫᬸᬃᬢᬶᬦ᭄ᬲᬫᬭᬦᬮ᭞ᬫᬶᬦᬩ᭄ᬧᬘᬂᬗᬯᬶᬲ᭄ᬬᬦᬶᬦ᭄᭞ᬫᬦ᭄ᬘᬦᭂᬦ᭄ᬳᬶᬤᬳᬶᬳᬭᬶ᭞ᬬᬤᬶᬦ᭄ᬭᬶᬂᬮᬶᬗ᭄ᬕᬶᬄᬳᬶᬭᬢᬸ᭞ᬤᬾᬦᬶᬂᬲᬫᬶᬓᬲᬸᬲᬸᬧᬦ᭄᭞ᬓᬤᬶᬫᬦᬶᬲᬾᬭᬶᬂ
ᬕᭂᬦ᭄ᬤᬶᬲ᭄᭞ᬩᭂᬘᬶᬓ᭄ᬭᬢᬸ᭞ᬫᬶᬢᭂᬕᭂᬲᬂᬧᬯᬘᬦ᭟ᬲᬂᬪᬶᬫᬦ᭄ᬬᬸᬫᬜᬸᬭᬢ᭄᭞ᬫᬯᭂᬯᭂᬄᬯᬘᬦᬧᬲ᭄ᬢᬶ᭞ᬢᬶᬢ᭄ᬬᬂᬜᬤ᭄ᬬᬫᬢᭂᬮᬲᬦ᭄᭞ᬫᬦᬤᬶᬩᬂᬩᬂᬳᬩᭂᬲᬶᬓ᭄᭞ᬫᬤᬓ᭄ᬢᬦ᭄ᬧᬢᬸᬗ᭄ᬓᬲ᭄ᬓᬯᬶ᭞ᬗᬯᬶᬦᬂᬢᬦ᭄ᬫᬗ᭄ᬕᬶᬄᬳᬬᬸ᭞ᬢᬶᬢ᭄ᬬᬂᬓᬭᬶᬦᬤᬩ᭄ᬫᬦᬄ᭞ᬗ᭄ᬓᭂᬢᬂᬳᬸᬧᬬᬲᬦ᭄ᬤᬶ᭞ᬓᬵᬮᬤᬶᬢᬸ
[ ᭕ 5A]
ᬢᬶᬢ᭄ᬬᬂᬜᬧᬮᬜᬶᬓᬳᬂ᭟ᬓᭂᬫᬚ᭄ᬯᬳᭂᬫ᭄ᬩᭀᬓ᭄ᬳᬾᬗ᭄ᬕᬮᬂ᭞ᬫᬫᬗᬸᬦᬶᬂᬭᬶᬂᬳᬶᬳᬤᬶ᭞ᬳᬧᬂᬳᭂᬤᬳᬶᬤᬗᬾᬦ᭄ᬤᬄ᭞ᬮᬶᬧᬸᬭᬂᬩᭂᬦ᭄ᬲᬃᬯᬕᭂᬦ᭄ᬤᬶᬂ᭞ᬢᬸᬯᬶᬓᬶᬤᬸᬂᬮᬦ᭄ᬓᬓᬯᬶᬦ᭄᭞ᬲᬭᬶᬦ᭄ᬢᬸᬢᬸᬃᬳᬗ᭄ᬕᭀᬦ᭄ᬦᬸᬦ᭄ᬢᬸᬦ᭄᭞ᬢᬶᬬᬂᬧᬲ᭄ᬢᬶᬧᬘᬂᬢᭂᬓ᭞ᬭᬶᬂᬢᬫᬦ᭄ᬬᬤᬶᬦ᭄ᬤᬶᬧᬸᬭᬶ᭞ᬬᬤᬶᬦ᭄ᬮᬫ᭄ᬧᬸᬲ᭄᭞ᬬᬦᬶᬂᬢᬶᬢ᭄ᬬᬂᬓᬢᬗᭂᬳᬦ᭄᭚ᬢᬶ
ᬗ᭄ᬓᬄᬯᬸᬮᬗᬸᬦᬾᬮᬮ᭄ᬯᬂ᭞ᬭᬶᬂᬕᬸᬦᬸᬂᬫᬶᬯᬄᬧᬲᬶᬲᬶ᭞ᬲᬂᬲᬫ᭄ᬩᬧ᭄ᬭᬤ᭄ᬬᬸᬫ᭄ᬦ᭞ᬲᬂᬕᬥᬮᬦ᭄ᬧᬭᬫᬦ᭄ᬢ᭄ᬭᬶ᭞ᬩᬢᬸᬤᬡ᭄ᬥᬧᬤᬗᬶᬭᬶᬂ᭞ᬧᬫᬦ᭄ᬢᬸᬓ᭄ᬳᬶᬤᬲᬂᬧ᭄ᬭᬪᬸ᭞ᬲᬂᬓᬺᬱ᭄ᬡᬫᬗ᭄ᬓᬶᬦ᭄ᬘᬭᬶᬢ᭞ᬫᬲᬯᬂᬧᬶᬢᭂᬮᬲ᭄ᬳᬸᬦᬶᬂ᭞ᬦᬾᬭᬶᬂᬓᬳ᭄ᬬᬸᬦ᭄᭞ᬳᬶᬦ᭄ᬤᬶᬓ᭄ᬲᬂᬭᬢ᭄ᬦᬤ᭄ᬯᬶᬢ᭟ᬓᬮᬯᬦ᭄ᬲᬂᬧᬃᬣᬲᬸᬢ᭞ᬲ᭄ᬫᬭᬦᬮᬦᬾᬫᬫᬸᬃ
ᬢᬶ᭞ᬢᭂᬮᬲ᭄ᬭᬸᬫᬓᭂᬢ᭄ᬳᬶᬂᬢᬶᬯᬲ᭄᭞ᬢᬦ᭄ᬧᬢᬗ᭄ᬕᬸᬢᬦ᭄ᬧᬯᬃᬡᬶ᭞ᬮ᭄ᬯᬶᬢᬾᬚᬦᬶᬂᬳ᭄ᬬᬂᬭᬯᬶ᭞ᬢᬸᬯᬶᬲᭂᬓᬃᬳᬯᭀᬃᬳᬶᬂᬳᬭᬸᬫ᭄᭞ᬳᭂᬜᬾᬦ᭄ᬢᬸᬦ᭄ᬤᬾᬦ᭄ᬫᬫᬲᬳᬂ᭞ᬤᭀᬬᬦ᭄ᬗᬯᬾᬲᬓᬶᬢ᭄ᬳᬢᬶ᭞ᬧᬥᬮᬫ᭄ᬧᬸᬲ᭄᭞ᬫᬓᭂᬚᬂᬮᬯᬸᬢ᭄ᬲᬗ᭄ᬲᬭ᭟᭚᭜᭚ᬧᬸᬧᬸᬄᬫᬲ᭄ᬓᬸᬫᬫ᭄ᬩᬂ᭚᭜᭚ᬲᬂᬓᬺᬱ᭄ᬡ᭞ᬢᬲ
ᬓ᭄ᬳᬶᬂᬧ᭄ᬭᬲᬤᬦᬶᬣᬶ᭞ᬬᬤᬶᬦ᭄ᬢᬢ᭄ᬯᬵᬕᬫ᭞ᬫᬶᬯᬄᬰᬵᬲ᭄ᬢ᭄ᬭᬲᬗᬾᬤᬺᬱ᭄ᬝᬶ᭞ᬓᬲᭀᬩ᭄ᬫᬸᬗ᭄ᬕ᭄ᬯᬶᬂᬚᬕᬢ᭄ᬭᬬ᭟ᬫᬤᬩ᭄ᬤᬩᬦ᭄᭞ᬲᬂᬓᬺᬱ᭄ᬡᬭᬯᬸᬄᬫᬦᬗ᭄ᬓᬶᬮ᭄᭞ᬭᬶᬂᬲᬂᬪᬮᬤᬾᬯ᭞ᬭᬶᬂᬧᬸᬭᬶᬳᬕᬸᬂᬫᬚᬶᬜ᭄ᬚᬶᬦ᭄᭞ᬫᬗᬸᬦᭂᬫᬂᬧᬓᬾᬃᬣᬶᬬᬱ᭟ᬦᬾᬧᬫᭂᬓᬲ᭄᭞ᬫᬳᬬᬸᬯᬂᬚᬕᬢ᭄ᬲᬫᬶ᭞ᬗᬯᬲ᭄ᬧᬸᬃᬯ [ 6 ][ ᭕ 5B]
᭕᭞
ᬫᬵᬮ᭞ᬓᬯᬶᬢ᭄ᬫᬸᬮᬗᬯᬶᬲ᭄ᬬᬦᬶᬦ᭄᭞ᬧᬶᬓᭂᬤᭂᬄᬫᬗ᭄ᬤᬾᬦᬾᬲᬶᬃᬡ᭟ᬓᬃᬫᬧᬮ᭞ᬤᬫᬥᬃᬫᬲᬦ᭄ᬢᬶᬓᬢᬸᬯᬶ᭞ᬳᭂᬦ᭄ᬢᭀᬦᬾᬧᬕᭂᬳᬂ᭞ᬧᬶᬮ᭄ᬧᬸᬮᬂᬢᭂᬍᬗᬶᬂᬳᬢᬶ᭞ᬫᬯᬲ᭄ᬢᬸᬰᬸᬤ᭄ᬤᬫᬮᬶᬮᬂ᭟ᬓᬢᬄᬧᬶᬲᬦ᭄ᬧᬳᬶᬗ᭄ᬓᬸᬧᬾᬦᬾᬭᬶᬂᬧᬸᬭᬶ᭞ᬳᬶᬤᬲᬂᬓᬺᬱ᭄ᬡ᭞ᬫᬸᬧᬸᬢᬂᬳᬢᬸᬃᬧᬗᬸᬦᬶᬂ᭞ᬗᬢᬸᬭᬂᬚᬕᬢ᭄ᬳᬱ᭄ᬝᬶᬡ᭟ᬫᭀᬕ
ᬮᬾᬤᬂ᭞ᬩᭂᬮᬶᬳᬕᬸᬂᬫᬦᭂᬤᬸᬗᬶᬦ᭄᭞ᬢᬶᬢ᭄ᬬᬂᬦᬗᬸᬦ᭄ᬬᬱ᭞ᬭᬶᬂᬕᬸᬦᬸᬂᬳᬮᬲ᭄ᬫᬓᬾᬃᬣᬶ᭞ᬗᬲ᭄ᬢᬶᬢᬶᬚᬕᬢ᭄ᬲᬫ᭄ᬧ᭄ᬬᬦ᭄᭟ᬳᬮᬥᬭ᭞ᬕᬃᬚᬶᬢᬕᭂᬮᬶᬲ᭄ᬜᬯᬸᬭᬶᬦ᭄᭞ᬳᬤᬶᬲᬂᬓᬺᬱ᭄ᬡ᭞ᬫᬃᬕᬶᬳᬤᬶᬩᭂᬘᬶᬓ᭄ᬩᭂᬘᬶᬓ᭄᭞ᬩᭂᬮᬶᬩᬋᬂᬗᬲ᭄ᬢᬯᬬᬂ᭚᭜᭚ᬧᬸᬧᬸᬄᬤᭂᬫᬸᬂ᭚᭜᭚ᬢᬦ᭄ᬘᬭᬶᬢᬭᬶᬂᬳᬮᬲ᭄ᬯᬸᬓᬶᬃ᭞ᬲᬂ
ᬓᬾᬰᬯ᭞ᬓᬂᬯᬃᬡᬲᬂᬧ᭄ᬭᬤᬸᬓᬸᬭᬸ᭞ᬗᬸᬢᬸᬲ᭄ᬧᬸᬭᭀᬳᬶᬢᬲᬫ᭄ᬧᬸᬦ᭄᭞ᬲᬳᬤᬦ᭄ᬧᬸᬦ᭄ᬬᬲᬫᬶ᭞ᬦᭀᬫᬄᬲᬂᬭᬢ᭄ᬦᬵᬤ᭄ᬯᬶᬢ᭞ᬲᬶᬢᬶᬲᬸᬡ᭄ᬤᬭᬶᬦᬾᬓᬲᭀᬩ᭄᭞ᬳᬬᬸᬳᬦᭀᬫ᭄ᬢᬦ᭄ᬧᬧᬤ᭞ᬧᬶᬢᬸᬳᬸᬫᬡᬶᬓᬶᬂᬧᬸᬭᬶ᭞ᬧᭂᬤᭂᬓ᭄ᬭᬶᬂᬲᬂᬪᬮᬤᬾᬯ᭞ᬲᬶᬦᬶᬯᬶᬭᬶᬂᬧᬸᬭᬶᬳᬕᬸᬂ᭟ᬳᬕᬢᬕᭀᬦ᭄ᬭᬶᬂᬲᬂᬳᬧᭂ
ᬓᬶᬓ᭄᭞ᬮᬓ᭄ᬱᬡᬓᬸᬫᬭ᭞ᬧᬸᬢ᭄ᬭᬦ᭄ᬲᬂᬦᬣᬓᬸᬭᬸ᭞ᬲᬂᬳᬮᬥᬭᬢᭂᬮᬲ᭄ᬳᬲᬸᬂ᭞ᬳᬦᬸᬕ᭄ᬭᬳᬧᬫᬶᬦᬂᬅᬚᬶ᭞ᬫᬓᬤᬶᬲᬂᬭᬢ᭄ᬦᬤᬶᬢ᭞ᬢᬦ᭄ᬤ᭄ᬯᬲᬫ᭄ᬧᬸᬦ᭄ᬓᬳᬢᬸᬃ᭞ᬭᬶᬂᬳᬶᬤᬲᬂᬥᬸᬃᬬᭀᬥᬦ᭞ᬲᬭᬮᬾᬤᬗᬾᬫᬗᬫ᭄ᬩᬶᬮ᭄᭞ᬲᬸᬓ᭄ᬱᬭᬦᬸᬗ᭄ᬕᬸᬳᬶᬂᬤᬶᬦ᭞ᬧᬯᬶᬯᬳᬦ᭄ᬦᬾᬕᬳᬬᬸ᭞ᬲᬶᬢᬶᬲᬸ
[ ᭖ 6A]
ᬮᬓ᭄ᬱᬡᬓᬸᬫᬭ᭞ᬧᬸᬢ᭄ᬭᬦ᭄ᬳᬶᬤ᭞ᬲᬂᬤᬸᬃᬬᭀᬥᬦᬪᬸᬧᬢᬶ᭞ᬲᬂᬲᬸᬤᬃᬧᬡᬗᭂᬮᬶᬲᬂ᭟ᬢᬦ᭄ᬓᬯᬃᬡᬫᬭᬶᬂᬫᬃᬕᬶ᭞ᬓᭀᬘᬧ᭄ᬢᬶᬩ᭞ᬲᬂᬪᬶᬫᬦ᭄ᬬᬸᬫᬮᬭ᭞ᬢᬶᬦ᭄ᬕᬶᬕᬶᬲ᭄ᬲᬸᬗ᭄ᬓᬦ᭄ᬓᬬᬸᬦᬾ᭞ᬓᬫᭂᬕᬦ᭄ᬜᬶᬗᬓ᭄ᬦᬾᬭᬯᬸᬄ᭞ᬲᬸᬤᬃᬫᬡᬫᬢᬸᬃᬦᬗᬶᬲ᭄᭞ᬩᬶᬗᬄᬩᬶᬗᬸᬄᬫᬳᬗ᭄ᬲᭂᬕᬦ᭄᭞ᬗᬸᬦᬶᬗᬂᬳᬶ
ᬤᬲᬂᬳᬬᬸ᭞ᬢᬫ᭄ᬩᬶᬲ᭄ᬲᬫ᭄ᬧᬸᬦ᭄ᬜᬸᬦ᭄ᬤᬸᬓ᭄ᬭᬕ᭞ᬤᬾᬦᬶᬂᬳᬶᬤ᭞ᬢᬦ᭄ᬳᬸᬭᬸᬂᬕᭂᬮᬶᬲ᭄ᬓᬳᬫ᭄ᬩᬶᬮ᭄᭞ᬳᬦ᭄ᬢᬸᬓ᭄ᬲᬂᬮᬓ᭄ᬱᬡᬓᬸᬫᬭ᭟ᬫᬓᬤᬶᬳᬶᬤᬳᬶᬳᬭᬶ᭞ᬭᬶᬂᬲᬭᬾᬦᬦ᭄᭞ᬢᬦ᭄ᬧᭂᬕᬢ᭄ᬗᬫᭀᬂᬲᬜ᭄ᬚᬢ᭞ᬚᬕ᭄ᬫᬢᭂᬮᬲᬦ᭄ᬓᬳ᭄ᬬᬸᬦᬾ᭞ᬫᬗ᭄ᬤᬾᬦᬾᬗᬶᬭᬶᬂᬳᬶᬭᬢᬸ᭞ᬬᬦ᭄ᬯᬦ᭄ᬢᬄᬳᬶᬭᬢᬸᬲᬸᬚᬢᬶ᭞ᬓᬤᬶᬲᬸ
ᬩᬬᬦᬾᬲᬸᬩ᭞ᬢᬶᬢ᭄ᬬᬂᬦᬯᭂᬕ᭄ᬭᬶᬂᬳᬶᬭᬢᬸ᭞ᬫᬗ᭄ᬤᬾᬦ᭄ᬮᬾᬤᬂᬕᭂᬮᬶᬲ᭄ᬮᬸᬗ᭄ᬳ᭞ᬗᬋᬋᬄᬳᬶᬤ᭞ᬫᬗ᭄ᬤᬾᬲᬫ᭄ᬧᬸᬦ᭄ᬫᬗᭂᬫᬲᬂᬦ᭄᭞ᬜᬤ᭄ᬬᬧᬘᬂᬫᬢᬸᬗ᭄ᬕᬮᬦ᭄᭟᭚᭜᭚ᬧᬸᬧᬸᬄᬲᬶᬦᭀᬫ᭄᭚᭜᭚ᬲᬶᬪᬶᬫᬦ᭄ᬬᬸᬓᬾᬫᭂᬗᬦ᭄᭞ᬗᬦ᭄ᬤᬶᬓᬫᬢᬸᬂᬢᬸᬂᬢᬗᬶᬲ᭄᭞ᬤᬸᬄᬳᭂᬫ᭄ᬩᭀᬓ᭄ᬲᬂᬲᬸᬤᬃᬧᬡ᭞ᬳᬂᬦ᭄ᬤ
ᬬᬂᬓᬸᬤᬧᬶᬦᭂᬳᬶᬦ᭄᭞ᬢᬶᬢ᭄ᬬᬂᬳᬸᬭᬶᬧ᭄ᬢ᭄ᬯᬄᬤᬶᬧᬸᬭᬶ᭞ᬫᬫᬜ᭄ᬚᬓ᭄ᬭᬶᬂᬧᬸᬭᬶᬳᬕᬸᬂ᭞ᬮᬯᬸᬢ᭄ᬳᬶᬳᬤᬶᬲ᭄ᬯᬾᬘ᭞ᬲᬮᬸᬮᬸᬢ᭄ᬫᬓᬤᬶᬫᬗ᭄ᬓᬶᬦ᭄᭞ᬳᬮᬳᬬᬸ᭞ᬲᬮᬸᬂᬮᬸᬂᬲᬸᬩᬬᬦ᭄ᬢᬓ᭟ᬦ᭄ᬤᬶᬓᬧᬦ᭄ᬢᬶᬢ᭄ᬬᬂᬫᬯᭂᬳᬂ᭞ᬦᬫ᭄ᬧᬾᬲᬂᬳᬶᬘᬦ᭄ᬳᬶᬳᬤᬶ᭞ᬢᬶᬢ᭄ᬬᬂᬓᬭᬶᬦᬩ᭄ᬤᬩ᭄ᬫᬦᬄᬧᬘᬂᬭᬕᬸᬳᬾᬭᬶᬂᬧᬸ [ 7 ][ ᭖ 6B]
᭖᭞
ᬩ᭄ᬤᬭᬶᬦᬾᬫᬗ᭄ᬓᬶᬦ᭄᭞ᬲᬬᬦ᭄ᬤᬸᬄᬓᬶᬢ᭞ᬭᬶᬂᬧᬢᬸᬭᭀᬦ᭄ᬲᭂᬤᬶᬄᬩᭂᬓᬸᬢ᭄᭞ᬗᬍᬫ᭄ᬓᭂᬭᬶᬲ᭄ᬲᬶᬬᬂᬤᬮᬸ᭞ᬫ᭄ᬬᬃᬱᬧᬦᭀᬫᬄᬅᬚᬶ᭞ᬫᬧᬶᬢᭂᬮᬲ᭄ᬦᬸᬯᭂᬓ᭄ᬭᬕ᭞ᬤᬾᬦᬶᬂᬢᬦ᭄ᬮᬾᬤᬂᬜᬸᬲᬸᬂ᭞ᬲᬂᬮᬓ᭄ᬱᬡᬓᬸᬫᬭ᭞ᬮᬸᬭᬸᬂᬲᬚᬢᬶᬢ᭄ᬬᬂᬫᬢᬶ᭞ᬲᬥᬃᬧᬡᬭᬯᬸᬄᬜᬕ᭄ᬚᬕ᭄᭞ᬚᭂᬚᭂᬄᬗᭂᬢᭀᬃᬫᬧᬶᬳᬸᬗᬸ
ᬧᬸᬧᬸᬄᬤᬂᬤᬂ᭚ᬧᬸᬓᬸᬮᬸᬦ᭄ᬭᬢᬸᬫᬲ᭄ᬫᬡᬶᬓ᭄᭞ᬩ᭄ᬯᬢ᭄ᬦᬢᭂᬕᬂ᭞ᬮᬾᬤᬂᬳᬸᬕᬶᬫᬶᬳᬃᬱᬬᬂ᭞ᬳᬢᬸᬃᬢᬶᬢ᭄ᬬᬂᬲᬓᬶᬂᬦᭂᬓᬾᬂ᭞ᬫᬦᬳᬾᬗᬶᬭᬶᬂᬳᬶᬭᬢᬸ᭞ᬫᬗ᭄ᬤᬾᬦ᭄ᬓᬲᬶᬤᬦ᭄ᬧᬶᬦᬸᬚᬶ᭞ᬫᬓᬤᬶᬮᬶᬂᬲᬸᬩᬬ᭞ᬫᬦ᭄ᬢᬸᬓ᭄ᬭᬶᬂᬲᬂᬪᬶᬫᬵᬦ᭄ᬬᬸ᭞ᬲᬮᬸᬂᬮᬸᬂᬲᬩᬬᬦ᭄ᬢᬓ᭞ᬚᭂᬮᬾᬫᭂᬮᬄ᭞ᬗᬸᬤᬭᬢᬸᬓᬤᬶᬫᬗ᭄ᬓᬶᬦ᭄᭞ᬫᬧᬶᬢᭂ
ᬮᬲ᭄ᬜᬸᬤᬸᬓ᭄ᬭᬕ᭟ᬦᬧᬶᬕᬸᬡᬦ᭄ᬢᬶᬢ᭄ᬬᬗᬾᬗᬶᬭᬶᬂ᭞ᬲᬓᬶᬂᬮᬯᬲ᭄᭞ᬫᬗᬤ᭄ᬧᬤᬭᬶᬂᬕ᭄ᬬᬦ᭄᭞ᬧᬫᬸᬧᬸᬢ᭄ᬳᬶᬭᬢᬸᬓᬾᬦᬾ᭞ᬜᬤ᭄ᬬᬲᬾᬤᬢᬦ᭄ᬧᬳᬸᬦ᭄ᬤᬸᬓ᭄᭞ᬢᬶᬢ᭄ᬬᬂᬦᬯᭂᬕ᭄ᬲᬦᬾᬫᬗ᭄ᬓᬶᬦ᭄᭞ᬜᬧᬮᬢᬶᬢ᭄ᬬᬂᬫᬫᬜ᭄ᬚᬓ᭄᭞ᬗᬢᬸᬭᬶᬫ᭄ᬲᬂᬪᬶᬫᬦ᭄ᬬᬸ᭞ᬲᬢᭂᬓᬦᬾᬧᬘᬂᬢᬢᬓ᭄᭞ᬬᬦᬶᬂᬲ
ᬫ᭄ᬧᬸᬦ᭄᭞ᬢᬶᬢ᭄ᬬᬂᬗᬶᬭᬶᬂᬳᬶᬫᬲ᭄ᬫᬡᬶᬓ᭄᭞ᬬᬤ᭄ᬬᬦ᭄ᬢᬶᬢ᭄ᬬᬂᬧᬘᬂᬧᭂᬚᬄ᭟ᬲᬧᬸᬦᬶᬓᬭᬢᬸᬫᬲ᭄ᬫᬡᬶᬓ᭄᭞ᬩᭂᬘᬶᬓ᭄ᬤᬩ᭄ᬤᬩᬂ᭞ᬲᬂᬳᬬᬸᬦᬶᬫ᭄ᬩᬮ᭄ᬗᬦ᭄ᬤᬶᬓ᭞ᬓᭂᬫᬚ᭄ᬯᬳᭂᬫ᭄ᬩᭀᬓ᭄ᬳᬾᬗ᭄ᬕᬮᬂ᭞ᬳᬸᬦᬶᬗᬂᬭᬶᬂᬩᭂᬮᬶᬳᬕᬸᬂ᭞ᬲᬧᬭᬶᬢᬶᬗ᭄ᬓᬳᬾᬤᬶᬦᬶ᭞ᬳᬶᬦ᭄ᬤᬶᬓ᭄ᬢᬶᬢ᭄ᬬᬂᬓᬧᬶᬲᭂᬭᬄ᭞ᬳᬦ᭄ᬢᬸᬓ᭄ᬳᬶᬤᬲᬂᬧ᭄ᬭᬪᬸ᭞ᬭᬶᬂᬲᬂ
[ ᭗ 7A]
ᬭᬶᬂ᭞ᬤᬾᬦᬶᬂᬧᬸᬭᬶᬓᬲᬸᬩ᭄ᬮᬸᬯᬶᬄ᭞ᬳᭀᬕ᭄ᬬᬢᬶᬢ᭄ᬬᬂᬜᭂᬫ᭄ᬩᬄᬜᬸᬂᬲᬸᬂ᭞ᬮᬯᬸᬢᬶᬢ᭄ᬬᬂᬗᬯᬾᬘᬘᬤ᭄᭞ᬗᬍᬢᭂᬳᬶᬦ᭄ᬲᬭᬶᬦ᭄ᬧᬸᬭᬶ᭞ᬢᬶᬢ᭄ᬬᬂᬓᬶᬫᬸᬤ᭄ᬓᬚᬃᬯᬩᬸᬭᭀᬦ᭄ᬳᬮᬲᬦ᭄᭟ᬫᬤᬓ᭄ᬳᬶᬤᬫᬜᬶᬗᬓ᭄᭞ᬗᬶᬘᬾᬦ᭄ᬢᬶᬢ᭄ᬬᬂᬫᬦᬄᬧᬶᬗᬶᬢ᭄᭞ᬢᬦ᭄ᬯᬦ᭄ᬤᬾᬢᬶᬢ᭄ᬬᬂᬗᬾᬗ᭄ᬕᬮᬂ᭞ᬓᬲᬸᬦ᭄ᬤᬸᬓ᭄ᬢᭂᬓᬾᬦ᭄ᬳᬂᬬᬤᬶ᭞ᬧᬶᬢᭂᬮ
ᬲ᭄ᬗᬳᬸᬭᬂᬉᬭᬶᬧ᭄᭞ᬤ᭄ᬬᬲ᭄ᬢᬸᬦ᭄ᬫᬦ᭄ᬤᬤᬶᬘᬭᬸ᭞ᬲᬧᬶᬳᬸᬤᬸᬄᬧᬘᬂᬢᬢᬓ᭄᭞ᬗᬶᬭᬶᬗᬂᬓᬳ᭄ᬬᬸᬦ᭄ᬳᬶᬬᬤᬶ᭞ᬢ᭄ᬯᬭᬢᬓᬸᬢ᭄᭞ᬬᬤᬶᬦ᭄ᬫᬕᬦ᭄ᬤᬶᬂᬳᬧ᭄ᬭᬂ᭟ᬭᬶᬂᬫᬦᬳᬾᬲ᭄ᬬᬩᬧ᭄ᬯᬕᬢ᭄᭞ᬢᬶᬢ᭄ᬬᬂᬬᬤ᭄ᬬᬦ᭄ᬧᬘᬂᬫᬢᬶ᭞ᬬᬦ᭄ᬢᬦ᭄ᬲᬶᬤᬫᬓᬭᭀᬦᬦ᭄᭞ᬲᬮᬸᬂᬮᬸᬂᬭᬶᬂᬳᬶᬬᬤᬶ᭞ᬓᬾᬢᭀᬳᭂᬫ᭄ᬩᭀᬓ᭄ᬫᬗ᭄ᬤᬾᬳᬸᬦᬶᬂ᭞ᬫᭂᬮᬳᬂᬤᬶ
ᬢᬸᬳᬸᬫᬢᬸᬃ᭞ᬦᬶᬲᬸᬤᬃᬧᬡᬗᬶᬜ᭄ᬘᭂᬕᬂ᭞ᬫᬧᬫᬶᬢ᭄ᬮᬯᬸᬢ᭄ᬫᬫᬃᬕᬶ᭞ᬳᬦ᭄ᬧᬗᬶᬢᬸᬂ᭞ᬳᬮᬳᬬᬸᬦᬶᬂᬮᬓ᭄ᬱᬡ᭟ᬲᬂᬪᬶᬫᬦ᭄ᬬᬸᬓᭀᬘᬧᬦ᭄᭞ᬚ᭄ᬭᬸᬤᬾᬰ᭄ᬭᬸᬲᬫᬗᬶᬭᬶᬂ᭞ᬭᬯᬸᬄᬭᬶᬂᬓᬸᬲᬶᬃᬲᬂᬓᬺᬱ᭄ᬡ᭞ᬲᬂᬧ᭄ᬭᬕᬸᬲ᭄ᬢᬳᬭᬦ᭄ᬳᬾᬓᬶ᭞ᬧᭂᬘᬓ᭄ᬓᬸᬲᬶᬃᬲᬂᬓᬶᬭᬶᬢᬶ᭞ᬦᬫ᭄ᬧᭂᬓᬶᬦ᭄ᬢᬫᬦ᭄ᬳᬸᬫᬸᬗ᭄ᬕᬸᬄ᭞ᬲᬂᬧ᭄ᬭᬕᬸᬱ᭄ᬝᬲᬳᬲᭂᬫ᭄ᬩᬄ
ᬳᬸᬫᬢᬸᬃᬭᬶᬂᬲᬂᬳᬧᭂᬓᬶᬓ᭄᭞ᬪᬶᬫᬦ᭄ᬬᬸ᭞ᬫᬯᬘᬦᬓᬲᭂᬋᬢᬦ᭄᭟ᬉᬤᬸᬄᬧᬫᬦ᭄ᬲᬂᬧ᭄ᬭᬕᬸᬱ᭄ᬝ᭞ᬕᬸᬮᬸᬗᬶᬦ᭄ᬳᬧᬂᬩᬸᬯᬸᬂᬫᬢᬶ᭞ᬫᬦᬶᬭᬓᭂᬦᬾᬂᬩᬜ᭄ᬘᬦ᭞ᬫᬩᬲ᭄ᬢᬦᭀᬭᬫᬢᬮᬶ᭞ᬭᬶᬂᬤ?ᬳᬾᬯᬶᬲᬶᬢᬶᬲᬸᬡ᭄ᬥᬭᬶ᭞ᬲᬭᬶᬦ᭄ᬫᬡᬶᬓ᭄ᬧᬸᬭᬶᬳᬕᬸᬂ᭞ᬫᬲᬧᬫᬦ᭄ᬢ᭄ᬯᬭᬦᬯᬂ᭞ᬫᬦᬶᬭᬲᬦᬓ᭄ᬫᬶᬂᬲᬶᬓᬶ᭞ [ 8 ][ ᭗ 7B]
᭗᭞
ᬳᬶᬤᬲᬸᬂᬲᬸᬢ᭄᭞ᬢᬫ᭄ᬩᬶᬲ᭄ᬲᬫ᭄ᬧᬸᬦ᭄ᬜᬸᬦ᭄ᬤᬸᬓ᭄ᬭᬕ᭟ᬧᬶᬢᭂᬮᬲ᭄ᬧᬘᬂᬫᬢᬸᬗ᭄ᬕᬮᬦ᭄᭞ᬭᬶᬂᬫᬦᬶᬭᬲᬫ᭄ᬧᬸᬦ᭄ᬧᬲ᭄ᬢᬶ᭞ᬮᬢᬸᬢ᭄ᬳᬤᬦᬾᬫᬦᭀᬫᬄ᭞ᬢᬸᬫᬸᬮᬶᬕᭂᬮᬶᬲ᭄ᬓᬳᬫ᭄ᬩᬶᬮ᭄᭞ᬮᬓ᭄ᬱᬡᬓᬸᬫᬭᬓᬲᬶᬯᬶ᭞ᬧᬸᬢ᭄ᬭᬦ᭄ᬲᬂᬦᬣᬕᬶᬸᬭᬶᬸᬓᬸᬭᬸ᭞ᬳᬶᬧ᭄ᬭᬕᬸᬱ᭄ᬝᬫᬜᬸᬮᬶᬗᬄ᭞ᬫᬶᬭᬶᬩ᭄ᬫᬶᬢᬸᬭᬸᬦᬶᬦ᭄ᬲᭂᬤᬶᬄ᭞ᬦᬗ᭄ᬳᬶᬂᬳᭂᬦ᭄ᬢᬸᬓ᭄᭞
ᬲᬶᬢᬦᬶᬂᬤᬤᬶᬧᬋᬓᬦ᭄᭟ᬳᬶᬧ᭄ᬭᬕᬸᬱ᭄ᬝᬓᬧᭂᬢᭂᬗᬦ᭄᭞ᬤᬾᬦᬶᬂᬲᬫᬶᬳᬗ᭄ᬕᬾᬦ᭄ᬕᬸᬲ᭄ᬢᬶ᭞ᬲᬂᬓᬺᬱ᭄ᬡᬮᬦ᭄ᬲᬂᬧᬃᬣ᭞ᬧᬸᬢ᭄ᬭᬦ᭄ᬳᬶᬤᬫᬓᬓᬮᬶᬄ᭞ᬓᭂᬦᬚᬭᬶᬂᬲ᭄ᬫᬭᬭᬢᬶᬄ᭞ᬓᬢᬸᬢᬸᬧᬦ᭄ᬤᬾᬦᬶᬂᬮᬸᬮᬸᬢ᭄᭞ᬫᬓᬭ᭄ᬯᬜᬤ᭄ᬬᬲᬾᬤ᭞ᬓᬸᬤ᭄ᬬᬗᬂᬚᬦᬶᬫᬓᭂᬮᬶᬤ᭄᭞ᬭᬢᬸᬳᬕᬸᬂ᭞ᬢᬶᬢ᭄ᬬᬂᬗᬶᬭᬶᬂᬫᬜᬭᬸᬯᬂ᭟ᬲᬕᬾ
ᬢ᭄ᬯᬦ᭄ᬢᭂᬦ᭄ᬫᬮᬶᬄᬲᬸᬭᬢ᭄᭞ᬲᬓᬶᬂᬲᬂᬫᬓᬤᬶᬭᬢᬶᬄ᭞ᬓᬢᬸᬃᬭᬶᬂᬲᬂᬓᬲ᭄ᬫᬭᬦ᭄᭞ᬫᬗ᭄ᬤᬾᬦ᭄ᬤᬶᬕᭂᬮᬶᬲ᭄ᬓᬧᬸᬭᬶ᭞ᬓᭀᬘᬧ᭄ᬫᬗ᭄ᬓᬶᬦ᭄ᬓᬵᬮᬗᭂᬗᬶᬲᬂᬳᬦᭀᬫ᭄ᬳᬫᭂᬧᭂᬢ᭄ᬓᬳ᭄ᬬᬸᬦ᭄᭞ᬗᬸᬧᭂᬢᬶᬳᬶᬤᬪᬝᬵᬭ᭞ᬦᬸᬳᬸᬦ᭄ᬳᬶᬘᬦ᭄ᬳᬶᬤᬳ᭄ᬬᬂᬮᬶᬘᬶᬦ᭄᭞ᬢᬦ᭄ᬳᬢᬸᬭᬸ᭞ᬲᬂᬳᬦᭀᬫ᭄ᬯᬲ᭄ᬢᬸᬜᬸᬫ᭄ᬧ᭄ᬦ᭟ᬓᬢᬸᬭᬸᬦᬦ᭄ᬳ᭄ᬬᬂ
ᬲ᭄ᬫᬭ᭞ᬲᬂᬳᬦᭀᬫ᭄ᬫᬢᬸᬃᬗᬜ᭄ᬚᬮᬶ᭞ᬳᬦᬸᬳᬸᬦ᭄ᬓᬺᬢᬦᬸᬕ᭄ᬭᬳ᭞ᬫᭀᬕᬢᬦ᭄ᬲᬮᬄᬧᬫᬶᬤᬶ᭞ᬳᬶᬤᬪᬝᬵᬭᬗᬶᬘᬾᬦᬶᬦ᭄᭞ᬩᬸᬗᬦ᭄ᬫᬦᬄᬗᭂᬦ᭄ᬤᬾᬳᬬᬸ᭞ᬜᬗ᭄ᬲᬭᬢᭂᬮᬲ᭄ᬫᬢᬶᬮᬃ᭞ᬳ᭄ᬬᬂᬭᬢᬶᬄᬫᬮᬶᬄᬦᬸᬭᭀᬦᬶᬦ᭄᭞ᬤᬸᬄᬫᬸᬭᬸᬩ᭄᭞ᬤᬾᬦᬶᬂᬳᬶᬤᬢᬦ᭄ᬲᬶᬦᭂᬫ᭄ᬩᬄ᭟ᬲᬂᬪᬶᬫᬦ᭄ᬬᬸ
[ ᭘ 8A]
ᬓᬢᭂᬫᬄ᭞ᬧᬫᬲ᭄ᬢᬸᬦᬾᬗᬺᬱᬶᬂᬳᬢᬶ᭞ᬲᬂᬳᬦᭀᬫ᭄ᬮᬯᬸᬢ᭄ᬗᬶᬜ᭄ᬘᭂᬕᬂ᭞ᬗᬸᬲᬄᬍᬫᬄᬫᬗᬜ᭄ᬚᬮᬶ᭞ᬳ᭄ᬬᬂᬭᬢᬶᬄᬫᬸᬳᬭᬳᬲᬶᬄ᭞ᬗᬯᬾᬧᬫᬸᬃᬡᬦᬶᬂᬧᬫᬲ᭄ᬢᬸ᭞ᬲᬂᬪᬶᬫᬦ᭄ᬬᬸᬓᬕ᭄ᬬᬢ᭄᭞ᬫᬳᬸᬗᬸᬮᬯᬸᬢ᭄ᬫᬫᬃᬕᬶ᭞ᬦᬾᬓᬚᬸᬚᬸᬃ᭞ᬧᬢᬸᬭᭀᬦ᭄ᬲᬂᬭᬢ᭄ᬦᬤ᭄ᬯᬶᬢ᭟ᬲᬋᬂᬢᬶᬕᬲᬶᬦᬋᬗᬦ᭄᭞ᬮᬸᬤᬶᬦ᭄ᬧᭂᬢᭂᬂᬢᬦ᭄ᬧᬲᬸᬦ᭄ᬤᬶᬄ
᭞ᬫᬕᬩᬗᬶᬸᬕᬦ᭄ᬫᬭᬶᬂᬚᬮᬦ᭄᭞ᬢᬦ᭄ᬳᬤᬳᬦᬓ᭄ᬫᬗ᭄ᬕᬶᬳᬶᬦ᭄᭞ᬚᬕᬩᬬᬦᬾᬭᬶᬂᬧᬸᬭᬶ᭞ᬗᬢᬸᬚᬸᬕᭂᬦᬄᬳᬢᬸᬭᬸ᭞ᬲᬸᬤᬃᬧᬡᬕᬕᬾᬲᭀᬦᬦ᭄᭞ᬗᭂᬤᭂᬂᬢᬗᬦ᭄ᬲᬂᬧᭂᬓᬶᬓ᭄᭞ᬦᬸᬮᬶᬫᬢᬸᬃ᭞ᬲᬤ᭄ᬬᬦ᭄ᬳᬶᬭᬢᬸᬧ᭄ᬭᬧ᭄ᬢ᭟ᬳᬶᬤᬳᬭᬶᬦ᭄ᬘᭀᬓᭀᬃᬳᬶᬤᬾᬯ᭞ᬳᬶᬤᬲᭂᬤᭂᬂᬗᬸᬦᬸᬲ᭄ᬓ᭄ᬭᬶᬲ᭄᭞ᬳᭂᬗ᭄ᬲᬧ᭄ᬳᬶᬗᭂᬢ᭄ᬤᬶᬲᬕᬾ
ᬦᬦ᭄᭞ᬕᭂᬮᬶᬲᬂᬭᬢᬸᬦᬫ᭄ᬩᬦᬶᬦ᭄᭞ᬢᬶᬢ᭄ᬬᬂᬳᬶᬭᬶᬓᬶᬗᭂᬩᬕᬶᬦ᭄᭞ᬭᬶᬂᬳᬫ᭄ᬩᬾᬦᬾᬗᬯᬾᬲᬭᬸ᭞ᬓᭀᬘᬧᬦ᭄ᬭᬶᬂᬧᬲᬭᬾᬦᬦ᭄᭞ᬓ᭄ᬭᬶᬲ᭄ᬳᬶᬤᬲᬂᬳᬧᭂᬓᬶᬓ᭄᭞ᬢᭂᬮᬲ᭄ᬜᬸᬤᬸᬓ᭄᭞ᬩᬜ᭄ᬘᬦᬲᬂᬭᬢ᭄ᬦᬤ᭄ᬯᬶᬢ᭟ᬧᬤᬳᭂᬗ᭄ᬲᬧ᭄ᬢᭂᬓᬾᬦ᭄ᬭᬕ᭞ᬢᬦ᭄ᬧᬯᬲ᭄ᬢᬫᬓᬓᬮᬶᬄ᭞ᬫᬕᬸᬍᬢ᭄ᬧᭂᬭᬂᬢᬦ᭄ᬤᬶᬗᬦ᭄᭞ᬢᬦ᭄ᬧ
ᬓᭀᬮᬶᬄᬓᬦᬦ᭄ᬓᬾᬭᬶ᭞ᬲᬶᬂᬩᬳᬦ᭄ᬦᬾᬗᭂᬦ᭄ᬤᬸᬲᬶᬦ᭄᭞ᬤᬾᬦᬵᬳᬶᬂᬭᬕᬩᬬᬮᬶᬬᬸ᭞ᬓᭀᬘᬧ᭄ᬲᬫ᭄ᬧᬸᬦ᭄ᬢᬢᬲ᭄ᬕᬮᬂ᭞ᬧᬋᬓᬦ᭄ᬭᬯᬸᬄᬫᬩᬺᬱᬶᬄ᭞ᬫᬕᬸᬭᬸᬤᬸᬕ᭄᭞ᬲᬕᬾᬢ᭄ᬬᬗᬫ᭄ᬧᬓ᭄ᬮᬯᬗᬦ᭄᭟ᬲᬂᬪᬶᬫᬵᬦ᭄ᬬᬸᬲᬾᬧᬦᬦ᭄᭞ᬫᬯᬲ᭄ᬢ᭄ᬭᬲᬶᬜ᭄ᬚᬂᬫᬮᬳᬶᬩ᭄᭞ᬲᬢᬶᬩᬧᬭᬦ᭄ᬮᬸᬫᬫ᭄ᬧᬄ᭞ᬓᭀᬘᬧ᭄ᬫᬗ᭄ᬕᬶᬄᬩᬾ [ 9 ][ ᭘ 8B]
᭘᭞
ᬚᬶᬮᬸᬯᬶᬄ᭞ᬳᬜᬸᬘᬶᬭᬕᬗᬭᬭᬶᬲ᭄᭞ᬭᬶᬂᬩᬮᬾᬧᬫᬸᬚᬦ᭄ᬫᬮᬸᬗ᭄ᬕᬸᬄ᭞ᬤᬾᬦ᭄ᬳᬧᭂᬦᭂᬤ᭄ᬫᬗᬲ᭄ᬢᬯ᭞ᬳᬶᬤᬤᬗᬭᬪᬝᬵᬭᬶ᭞ᬲᬕᬾᬢ᭄ᬭᬯᬸᬄ᭞ᬪᬝᬵᬭᬶᬤᬸᬃᬖᬤᬸᬫᬶᬮᬄ᭟ᬕᭂᬋᬂᬕᭂᬋᬂᬫᬦᬗ᭄ᬲᭂᬓᬂ᭞ᬧᬘᬂᬦᬤᬄᬲᬂᬳᬧᭂᬓᬶᬓ᭄᭞ᬢᬗᬦ᭄ᬲᬸᬓᬸᬫᬕᬩᬕᬦ᭄᭞ᬗᬦ᭄ᬤᬶᬓᬦᭀᬯᭀᬲ᭄ᬫᬦᭂᬮᬶᬓ᭄᭞ᬲᬂᬳᬦᭀ
ᬫ᭄ᬕᭂᬮᬶᬲ᭄ᬫᬜᬯᬶᬲ᭄᭞ᬦ᭄ᬤᬢᭂᬗᬂᬭᬢᬸᬧᬸᬓᬸᬮᬸᬦ᭄᭞ᬢᬶᬢ᭄ᬬᬂᬧᬸᬢ᭄ᬭᬦ᭄ᬲᬂᬅᬃᬚᬸᬦ᭞ᬯᬲ᭄ᬢᬦ᭄ᬢᬶᬢ᭄ᬬᬗᬾᬲᬸᬚᬢᬶ᭞ᬪᬶᬫᬵᬦ᭄ᬬᬸ᭞ᬲᬦ᭄ᬢᬦᬦ᭄ᬧᬜ᭄ᬘᬧᬡ᭄ᬥᬯ᭟ᬩᭂᬮᭀᬕ᭄ᬦᬶᬱ᭄ᬝᬦᬾ ᬓᬮᬶᬯᬢ᭄᭞ᬗᬯᬶᬦᬂᬫᬓᬤᬶᬫᬗ᭄ᬓᬶᬦ᭄᭞ᬫᬦᬫ᭄ᬧᭂᬤᬂᬮᬭᬩᬬ᭞ᬳᬶᬤᬸᬧᬾᬭᬸᬫᬲᬢ᭄ᬫᬢᬶ᭞ᬫᬫᬋᬓᬦ᭄ᬲᬓᬶᬂᬭᬶᬳᬶᬦ᭄᭞ᬭᬶᬂᬳᬶᬤ
ᬲᬂᬓᬺᬱ᭄ᬡᬭᬢᬸ᭞ᬓᬤᬸᬭᬸᬲ᭄ᬓᭂᬦᬾᬂᬩᬜ᭄ᬘᬦ᭞ᬲ᭄ᬫᬭᬦᬵᬮᬫᬗᬯᬾᬦᬶᬦ᭄᭞ᬳᬲᬸᬂᬮᬸᬮᬸᬢ᭄᭞ᬭᬶᬂᬧᬸᬢ᭄ᬭᬶᬦ᭄ᬳᬶᬤᬲᬂᬦᬣ᭟ᬢᬫ᭄ᬩᬶᬲ᭄ᬧᬥᭂᬫ᭄ᬭᬶᬂᬧᬸᬭ᭄ᬬᬦ᭄᭞ᬬᬦ᭄ᬢᬦ᭄ᬳᬕᭂᬮᬶᬲ᭄ᬫᬮᬳᬶᬩ᭄᭞ᬳᭂᬗ᭄ᬲᬧ᭄ᬳᬶᬗᭂᬢ᭄ᬭᬶᬂᬲᬶᬓᬶᬬᬦ᭄᭞ᬚᬕ᭄ᬢᬶᬢ᭄ᬬᬂᬭᬯᬸᬄᬳᬶᬭᬶᬓᬶ᭞ᬗᬺᬥᬦᬚᭂᬂᬪᬝᬵᬭᬶ᭞ᬤᬸᬫᬤᬓ᭄ᬳᬶᬭᬢᬸᬳᬲᬸᬂ᭞ᬗᬶᬘᬾᬦ᭄ᬢᬶᬢ᭄ᬬᬂᬓ
sᬳᬶᬤ᭄ᬬᬦ᭄᭞ᬓᬤᬸᬭᬸᬲ᭄ᬳᬯᭀᬃᬲᬭᬲ᭄ᬫᬶᬦ᭄᭞ᬢᬸᬃᬲᬮᬸᬗ᭄ᬮᬸᬂ᭞ᬭᬶᬂᬳᬶᬤᬲᬂᬭᬢ᭄ᬦᬤ᭄ᬯᬶᬢ᭟᭚᭜᭚ᬧᬸᬧᬸᬄᬕᬶᬦᬤ᭚᭜᭚ᬬᬦ᭄ᬳᬶᬭᬢᬸᬢᬦ᭄ᬲᬸᬯᬾᬘ᭞ᬧᬶᬲᬦ᭄ᬧᬸᬧᬸᬢᬂᬦᬾᬫᬗ᭄ᬓᬶᬦ᭄᭞ᬳᬶᬤᬪᬝᬵᬭᬶᬗᬦ᭄ᬤᬶᬓ᭞ᬗᬋᬕᭂᬄᬫᬓᬤᬶᬲᬸᬗ᭄ᬲᬸᬢ᭄᭞ᬤᬸᬄᬤᬾᬯᬮᬸᬯᬶᬄᬉᬢ᭄ᬢᬫ᭞ᬢᬸᬲᬶᬂᬤᬤᬶ᭞ᬫᬾᬫᬾᬫᬦᬤᬄ
[ ᭙ 9A]
ᬳᬶᬤᬾᬯ᭟ᬤᬾᬦᬶᬂᬤᬾᬯᬩᬲ᭄ᬓᬮᬭᬦ᭄᭞ᬧᬦ᭄ᬢᭂᬲ᭄ᬫᬾᬫᬾᬫᬶᬢᭂᬓᭂᬢᬶᬦ᭄᭞ᬗᭀᬭᬳᬶᬦ᭄ᬳᬶᬤᬾᬯᬚᬮᬦ᭄᭞ᬦᬾᬲᬶᬤᬧᬘᬂᬫᬶᬢᬸᬮᬸᬂ᭞ᬢᬸᬃᬳᬶᬲᬶᬦᬄᬫᬓᭀᬮᬶᬳᬂ᭞ᬦᬾ ᬓᬚᬸᬤᬶ᭞ᬓᬤᬶᬧᬫᬶᬤᬶᬦ᭄ᬳᬶᬤᬾᬯ᭟ᬢᭂᬤᬸᬂᬚᬕᬢ᭄ᬧᬭᬩᬬ᭞ᬫᬶᬲᬦ᭄ᬳᬶᬤᬾᬯᬧᬶᬢᬸᬯᬶ᭞ᬧᬸᬢ᭄ᬭᬦᬾᬲᬂᬤᬶᬫᬵᬲᬾᬦ᭞ᬲᬂᬖᬝᭀᬢ᭄ᬓᬘ
ᬓᬲᬸᬫ᭄ᬩᬸᬂ᭞ᬩᬯᬸᬤᬦ᭄ᬤᬦᬾ ᬫᬓᬢᬄ᭞ᬧᬤᬰᬓ᭄ᬢᬶ᭞ᬓᭂᬫᬳᬶᬤᬾᬯᬜᬭᬬ᭟ᬳᬧᬂᬳᭂᬤᬓᬧᬮᬶᬗᬦ᭄᭞ᬭᬾᬄᬳᬶᬤᬾᬯᬤᬸᬭᬸᬂᬳᬸᬦᬶᬂ᭞ᬧᬋᬓᬦ᭄ᬫᬾᬫᬾᬦᬾᬳᬚᬓ᭄᭞ᬳᬧᬂᬲᬶᬤᬳᬾᬗ᭄ᬕᬮ᭄ᬢᭂᬧᬸᬓ᭄᭞ᬲᬶᬪᬸᬢᬓ᭄ᬭᬸᬭᬭᬸᬧ᭞ᬧᬘᬂᬗᬶᬭᬶᬂ᭞ᬭᬶᬂᬳᬫ᭄ᬩᬭᬦᬾ ᬮᬸᬫᬫ᭄ᬧᬄ᭟ᬲᬂᬓᬮᬶᬄᬲᬫ᭄ᬧᬸᬦ᭄ᬲᬬᬕ᭞ᬧᬶ
ᬢᭂᬮᬲ᭄ᬧᬤᬲᬳᬶᬭᬶᬂ᭞ᬮᬯᬸᬢ᭄ᬫᬶᬩᭂᬃᬗᬯᬂᬳᬯᬂ᭞ᬚᭂᬚᭂᬄᬓᬬᬸᬦᬾᬫᬗᬫ᭄ᬩᬸᬦ᭄᭞ᬚᬸᬭᬸᬤᬾᬬᬓᭂᬲ᭄ᬬᬩ᭄ᬓᭂᬲ᭄ᬬᬩ᭄᭞ᬗᬸᬯᬲ᭄ᬗᬸᬯᬶᬲ᭄᭞ᬩᬸᬓᬢ᭄ᬯᬭᬫᬲᬳᬯᬓ᭄᭟ᬳᭂᬗ᭄ᬲᬧ᭄ᬳᬶᬗᭂᬢ᭄ᬢᭂᬓᬾᬦ᭄ᬳᬯᬓ᭄᭞ᬗᭂᬤᬢ᭄ᬗᬶᬤᭂᬫ᭄ᬫᬶᬭᬶᬩ᭄ᬳᬶᬧᬶᬢ᭄᭞ᬓᭂᬤᬾᬓ᭄ᬗᬯᬕ᭄ᬢᬦ᭄ᬓᬧᬶᬸᬭᭀᬯᬦ᭄᭞ᬤᬾᬦᬶᬂᬓᬢᬸᬫ᭄ᬩᬾᬦᬦ᭄ᬦᬫ᭄ᬩᬸᬂ᭞ᬓᬕᬾᬢᬵᬗᬤᭂ
ᬧ᭄ᬫᬗᬮᬬᬂ᭞ᬲᬫᬶᬗᬶᬮᬶᬲ᭄᭞ᬲᬳᬦᬾᬂᬢᬫᬦ᭄ᬓᬘᬶᬗᬓ᭄᭟ᬓᬵᬮᬯᭂᬗᬶᬲᭂᬧᬶᬲᬸᬦ᭄ᬬ᭞ᬲᬂᬪᬶᬫᬦ᭄ᬬᬸᬧᬭᬧ᭄ᬢᬶ᭞ᬚᬸᬭᬸᬤᬾᬬᬫᬗᬶᬭᬶᬗᬂ᭞ᬫᬓᬮᬶᬳᬦ᭄ᬢᭀᬂᬦᬯᬂᬳᬸᬦ᭄ᬤᬸᬓ᭄᭞ᬦᬾ ᬗᬶᬭᬶᬂᬲᬕᬾᬢ᭄ᬬᬳᬶᬮᬂ᭞ᬚᬕ᭄ᬮᬮᬶᬲ᭄᭞ᬫᬶᬭᬶᬩ᭄ᬳᬫᭀᬭᬶᬂᬅᬓᬰ᭞᭚᭜᭚ᬧᬸᬧᬸᬄᬕᬶᬦᬦ᭄ᬢᬶ᭚᭜᭚ᬲᬂᬪᬶᬫᬦ᭄ᬬᬸ [ 10 ][ ᭙ 9B]
᭙᭞
ᬗᬮᬮᬸ᭞ᬦᬾᬭᬶᬂᬢᬫᬦ᭄ᬳᬭᬸᬫ᭄ᬳᬲ᭄ᬭᬶ᭞ᬮᬸᬯᬶᬳᬾᬢᬦ᭄ᬧᬢᬦ᭄ᬤᬶᬗᬦ᭄᭞ᬢᭀᬬᬦ᭄ᬢᬮᬕᬦᬾᬫᬳ᭄ᬦᬶᬂ᭞ᬓᬳᬶᬤᭂᬭᬦ᭄ᬲᬃᬯᬲᭂᬓᬃ᭞ᬢᬸᬃᬳᬶᬂᬭᬶᬲᬓ᭄ᬲᬫᬶᬢᬶᬢᬶᬩ᭄᭟ᬫᬓᭂᬚᬂᬗᬯ?ᬳᬾᬳᬸᬮᬗᬸᬦ᭄᭞ᬳᬲᬶᬂᬓᬢᭀᬦ᭄ᬫᬗᬭᬯᬶᬢ᭄᭞ᬲᬂᬪᬶᬫᬦ᭄ᬬᬸᬘᬭᬶᬢ᭞ᬳᭂᬗ᭄ᬲᭂᬓ᭄ᬓᬳ᭄ᬬᬸᬦᬾᬢᬦ᭄ᬲᬶᬧᬶ᭞ᬢᬸᬫᬸᬮᬶᬳᬶᬤᬫᬲᬶᬭᬫ᭄᭞ᬭᬶᬂᬢᭂᬗᬄᬢᭂ
ᬮᬕᬦᬾᬲᬸᬘᬶ᭟ᬓᬯᬃᬡᬲᬫ᭄ᬧᬸᬦ᭄ᬗᬭᬗ᭄ᬲᬸᬓ᭄᭞ᬪᬸᬱᬡᬮᬯᬸᬢ᭄ᬜᬫᬤᬶ᭞ᬫᬶᬚᬶᬮ᭄ᬳᬶᬤᬳ᭄ᬬᬂᬪᬱ᭄ᬓᬭ᭞ᬫᭂᬢᬸᬰᬡᬗᬸᬱᬥᬦᬶ᭞ᬫᬸᬃᬡᬬᬂᬅᬗ᭄ᬕᬰᬭᬷᬭ᭞ᬓᬕᬾᬢᬵᬢᭂᬓᬭᬵᬓ᭄ᬱᬲᬮᬶᬗ᭄ᬲᬶᬃ᭞ᬗᬩᬓᬸᬜ᭄ᬘᬶᬫᬶᬯᬄᬲᬧᬸ᭞ᬓᬕ᭄ᬬᬢ᭄ᬫᬗ᭄ᬕᬶᬄᬯᬂᬳᬧᭂᬓᬶᬓ᭄᭞ᬯᬮᬸᬬᬲᬂᬳ᭄ᬬᬂᬲᬫᬭ᭞ᬲᬸᬢᬾᬚᬤᬸᬫᬶᬮᬄᬗᭂᬦ᭄ᬤᬶᬄ
᭞ᬢᬸᬫᬸᬮᬶᬭᬭᬶᬲ᭄ᬫᬜᬧ᭞ᬳᭂᬜᬾᬦ᭄ᬳᬶᬤᬾᬯᬦᬾᬚᬢᬶ᭟ᬢᬗᬸᬤᬤᬶᬦᬶᬫᬮᬸᬗ᭄ᬕᬸᬄ᭞ᬓᬸᬤ᭄ᬬᬗᬂᬳᬶᬤᬾᬯᬫᬳᬶ᭞ᬦᬶᬓᬶᬢᬫᬦ᭄ᬧᬧᬶᬗᬶᬢᬦ᭄᭞ᬢᭀᬂᬳᬤᬩᬦᬶᬫᬳᭂᬓᬶᬦ᭄᭞ᬲᬚᬯᬶᬦᬶᬂᬳᬶᬤᬲᬂᬦᬣ᭞ᬲᬂᬖᬝᭀᬢ᭄ᬓᬘᬧᬶᬦᬸᬚᬶ᭟ᬩᬧᬧᬘᬂᬫᬧᬶᬯᬸᬗᬸ᭞ᬗᬸᬦᬶᬗᬂᬳᬶᬦ᭄ᬤᬶᬓ᭄ᬧᬸᬦᬶᬓᬶ᭞ᬫᬦ᭄ᬢᬸᬓ᭄ᬭᬶᬂ
ᬳᬶᬤᬲᬂᬦᬣ᭞ᬓᬯᬾᬦ᭄ᬢᭂᬦᬦ᭄ᬲᬦᬾᬫᬗ᭄ᬓᬶᬦ᭄᭞ᬓᭂᬦᬶᬲᬫ᭄ᬧᬸᬦ᭄ᬳᬶᬤᬫᭂᬗ᭄ᬕᬄ᭞ᬢᭂᬓᬾᬦ᭄ᬩᬧᬤᬶᬦᬶᬗᬶᬭᬶᬂ᭟ᬫᬗ᭄ᬤᬤᬾᬯᬲᬓᬶᬂᬫᬸᬮᬸᬲ᭄᭞ᬦᬸᬢᬸᬭᬂᬲᬦᬾᬲᬸᬚᬢᬶ᭞ᬳᭂᬤᬧᭂᬲᬦ᭄ᬫᬗᬸᬩ᭄ᬤᬬᬂ᭞ᬲᬧᬭᬶᬢᬶᬗ᭄ᬓᬳᬾᬤᬶᬦᬶ᭞ᬲᬂᬳᬦᭀᬫ᭄ᬭᬭᬶᬲ᭄ᬫᬦᬶᬫ᭄ᬩᬮ᭄᭞ᬗᬦ᭄ᬤᬶᬓᬫᬤᬸᬮᬸᬃᬢᬗᬶᬲ᭄᭟ᬫᬦᬶᬭᬲᬂᬪᬶᬫᬦ᭄ᬬᬸ᭞
[ ᭑᭐ 10A]
ᬧᬸᬢ᭄ᬭᬦ᭄ᬳᬶᬤᬲᬂᬓᬶᬭᬶᬢᬶ᭞ᬫᬂᬓᬲ᭄ᬧᬘᬂᬫᬗᬲ᭄ᬭᬬ᭞ᬫᬦ᭄ᬢᬸᬓ᭄ᬭᬶᬂᬲᬂᬦᬵᬭᬧᬢᬶ᭞ᬩᭂᬮᬶᬅᬕᬸᬂᬲᬂᬖᬝᭀᬢ᭄ᬓᬘ᭞ᬫᬶᬲᬦ᭄ᬫᬦᬶᬭᬢᬸᬯᬶ᭟᭚᭜᭚ᬧᬸᬧᬸᬄᬧᬗ᭄ᬓᬸᬃ᭚᭜᭚ᬲᬂᬖᬝᭀᬢ᭄ᬓᬘᬓᬾᬫᬗᬦ᭄᭞ᬫᬶᬳᬃᬱᬬᬂ᭞ᬧᬶᬯᬸᬗᬸᬦ᭄ᬳᬶᬗᬓ᭄ᬱᬲᬮᬶᬗ᭄ᬲᬶᬃ᭞ᬲᬾᬧᬦᬦ᭄ᬮᬯᬸᬢ᭄ᬫᬘᭂᬩᬸᬃ᭞ᬧᬫᬃᬕᬶᬦᬾᬕᬕᬜ᭄ᬘᬗᬦ᭄᭞ᬲᬫ᭄ᬧᬸ
ᬦ᭄ᬧ᭄ᬭᬧ᭄ᬝᬶ᭞ᬭᬶᬂᬢᬫᬦ᭄ᬭᬭᬶᬲ᭄ᬫᬦ᭄ᬤᬸᬮᬸ᭞ᬗᬯᬲ᭄ᬧᬤᬢᬢᬸᬭᬶᬬᬦ᭄᭞ᬫᬜᬧᬫᬗᬲᬶᬄᬳᬲᬶᬄ᭟ᬳᭂᬜᬾᬦ᭄ᬲᬸᬚᬢᬶᬦᬾ ᬳᬶᬤᬾᬯ᭞ᬬᬾᬦ᭄ᬫᬦᬶᬭᬫᬶᬭᬶᬩ᭄ᬦᬯᬂᬫᬶᬭᬶᬩ᭄ᬢᬸᬲᬶᬂ᭞ᬬᬦ᭄ᬢᬍᬢᭂᬓᬂᬭᬶᬂᬳᬸᬦ᭄ᬢᬸ᭞ᬘᬘᬶᬗᬓ᭄ᬢᬸᬯᬶᬦ᭄ᬲᬫᬶᬢ᭞ᬢᬸᬯᬄᬲᬸᬫᬳᬶᬄ᭞ᬭᬶᬂᬲᬂᬤᬦᬦ᭄ᬚᬬᬢᬸᬳᬸ᭞ᬢᭀᬗᬸᬤᬤᬶᬦᬶᬓᬵᬮᬭᬦ᭄᭞
ᬮᬬᬸᬤᬸᬤᬸᬲ᭄ᬧᬳᬢᬗᬶᬲ᭄᭟ᬲᬂᬳᬦᭀᬫ᭄ᬧᬘᬂᬫᬜᭂᬫ᭄ᬩᬄ᭞ᬕᬕᭂᬮᬶᬲᬦ᭄᭞ᬲᬂᬖᬝᭀᬢ᭄ᬓᬘᬦᬫ᭄ᬧᭂᬓᬶᬦ᭄᭞ᬤᬾᬦᬶᬂᬳᬫ᭄ᬩᭂᬓ᭄ᬦᭀᬭᬧᬢᬸᬢ᭄᭞ᬲᬂᬪᬶᬫᬵᬦ᭄ᬬᬸᬫᬜᭂᬫ᭄ᬩᬄ᭞ᬤᬾᬦᬶᬂᬳᬤᬶ᭞ᬳᬶᬩᬸᬦ᭄ᬳᬶᬤᬾᬯᬦᬾᬢᬸᬳᬸ᭞ᬳᬫᬤᭂᬕ᭄ᬧᬭᬫᬾᬰ᭄ᬯᬃᬬ᭞ᬫᬾᬫᬾᬦ᭄ᬩᭂᬮᬶᬢ᭄ᬯᬄᬭᬵᬓ᭄ᬱᬲᬶ᭟ᬲᬂᬪᬶᬫ
ᬦ᭄ᬬᬸᬦᬸᬢᬸᬕᬂ᭞ᬗᬸᬦᬶᬗᬬᬂ᭞ᬗᬯᬶᬦᬂᬫᬦᭂᬫᬸᬓᬶᬂᬓᬶᬂ᭞ᬫᬧᬋᬓ᭄ᬭᬶᬂᬩᭂᬮᬶᬳᬕᬸᬂ᭞ᬦᬾᬧᬫᭂᬓᬲ᭄ᬦᬸᬦᬲ᭄ᬳᬶᬘ᭄ᬘ᭞ᬦᬸᬦᬲ᭄ᬳᬸᬭᬶᬧ᭄᭞ᬫᬗ᭄ᬤᬾᬦ᭄ᬢᬶᬢ᭄ᬬᬂᬩᬸᬯᬸᬂᬮᬫ᭄ᬧᬸᬲ᭄᭞ᬓᭂᬦᬾᬂᬩᬬᬲ᭄ᬫᬭᬦᬮ᭞ᬭᬶᬂᬤᬾᬯᬷᬲᬶᬢᬶᬲᬸᬡ᭄ᬥᬭᬶ᭟ᬧᬸᬢ᭄ᬭᬷᬦ᭄ᬳᬶᬤᬲᬂᬓᬺᬱ᭄ᬡ᭞ᬫᬶᬲᬦ᭄ᬢᬶᬢ᭄ᬬᬂ᭞ᬲᬮᬸᬂᬮᬸᬂᬳᬯᭀᬃᬲᬭᬲ᭄ᬫᬶᬦ᭄᭞ᬓᬾᬢᭀᬚ [ 11 ][ ᭑᭐ 10B]
᭑᭐᭞
ᬢᭂᬩᬶᬮᬶᬳᬕᬸᬂ᭞ᬦᬾᬫᬗ᭄ᬓᬶᬦ᭄ᬯᬾᬦ᭄ᬢᭂᬦ᭄ᬫᬦᭀᬫᬄ᭞ᬳᬬᬢ᭄ᬫᬗᬫ᭄ᬩᬶᬮ᭄᭞ᬧᬸᬢ᭄ᬭᬦᬾᬲᬂᬦᬣᬓᬸᬭᬸ᭞ᬲᬂᬮᬓ᭄ᬱᬡᬫᬭᬗᬭᬦ᭄᭞ᬲᬫ᭄ᬧᬸᬦ᭄ᬗᬢᬕ᭄ᬩᬮᬯᬃᬕᬶ᭟ᬳᬶᬗ᭄ᬕ᭄ᬬᬦ᭄ᬧᬸᬦᬶᬓᬶᬢᬶᬢ᭄ᬬᬂ᭞ᬲᬸᬚᬢᬶᬦ᭄ᬜ᭞ᬫᬮᬳᬶᬩ᭄ᬲᬗ᭄ᬓᬦᬶᬂᬧᬸᬭᬶ᭞ᬢᬫ᭄ᬩᬶᬲ᭄ᬢᬶᬢ᭄ᬬᬂᬲᬫ᭄ᬧᬸᬦ᭄ᬮᬫ᭄ᬧᬸᬲ᭄᭞ᬓᬋᬚᬶᬓ᭄ᬬᬭᬶᬂᬲᬭᬾᬦᬦ᭄᭞ᬲᬋᬂᬓ
ᬮᬶᬄ᭞ᬓᬵᬮᬯᭂᬗᬶᬳᬯᭀᬃᬮᬸᬮᬸᬢ᭄᭞ᬦ᭄ᬤᬯᭂᬕ᭄ᬩᭂᬮᬶᬫᬗ᭄ᬤᬮᬾᬤᬂ᭞ᬢᬸᬮᬸᬂᬳᬧᬂᬩᬸᬯᬸᬂᬫᬢᬶ᭟ᬲᬂᬖᬝᭀᬢ᭄ᬓᬘᬫᬦᬶᬫ᭄ᬩᬮ᭄᭞ᬳᭂᬦ᭄ᬢᭀᬳᬾᬮᬄ᭞ᬫᬳᬶᬚ᭄ᬯᬳᬤᬶᬓᬧᬸᬭᬶ᭞ᬳᬚᬓ᭄ᬩᭂᬮᬶᬤᬶᬧᬸᬭᬶᬳᬕᬸᬂ᭞ᬤᬶᬢᬸᬫᬮᬶᬄᬫᬧᬶᬢᬸᬗᬦ᭄᭞ᬧᬂᬤᬧᭂᬮᬶᬄ᭞ᬫᬮᬓ᭄ᬱᬦᬢᬦ᭄ᬧᬲᬸᬮᬸᬃ᭞ᬚᬮᬦ᭄ᬳᬤᬶᬫᬤᬩ᭄ᬤ
ᬩᬦ᭄᭞ᬗᬶᬜ᭄ᬘᭂᬧᬂᬲᬭᬶᬦᬶᬂᬩᬸᬤ᭄ᬥᬶ᭟᭚᭜᭚ᬧᬸᬧᬸᬄᬲᬶᬦᭀᬫ᭄᭚᭜᭚ᬭᬶᬂᬓᬭᬢᭀᬦ᭄ᬧᬸᬭᬩᬬ᭞ᬲᬂᬳᬦᭀᬫ᭄ᬘᬭᬶᬢᬫᬗ᭄ᬓᬶᬦ᭄᭞ᬩᬶᬦᬸᬱᬦᬦ᭄ᬲᬃᬯᬳᬾᬦ᭄ᬤᬄ᭞ᬧᬜᬫ᭄ᬩ᭄ᬭᬫᬲᬫᬶᬮᬸᬯᬶᬄ᭞ᬮᬶᬦ᭄ᬢᬗᬦ᭄ᬭᬶᬂᬢᬶᬕᬂᬯᭂᬗᬶ᭞ᬢᬦ᭄ᬧᬫᬗᬦ᭄ᬢᬦ᭄ᬳᬢᬸᬭᬸ᭞ᬢᬦ᭄ᬲᬄᬓᬳ᭄ᬬᬸᬦᬾᬓᬭᬯᬂ᭞ᬤᬾᬦᬶᬂ
ᬓᬢᬳᬢᬦ᭄ᬳᬲᬶᬄ᭞ᬧᬯᭀᬃᬲᬸᬗ᭄ᬲᬸᬢ᭄᭞ᬧᬲᬄᬭᬶᬂᬲᬂᬓᭂᬦᬾᬂᬭᬶᬫᬂ᭟ᬲᬂᬖᬝᭀᬢ᭄ᬓᬘᬗᬦ᭄ᬤᬶᬓ᭞ᬫᬯᬶᬭᬂᬫᬤᬸᬮᬸᬃᬳᬲᬶᬄ᭞ᬗᬢᭀᬦᬂᬲᬂᬧᬃᬣᬲᬸᬢ᭞ᬢᬦ᭄ᬧᭂᬕᬢ᭄ᬫᬲᬯᬂᬢᬗᬶᬲ᭄᭞ᬫᬲᬩᭂᬮᬶᬢᬦ᭄ᬲᬸᬢᬶᬦ᭄ᬤᬶᬄ᭞ᬫᬩᬾᬮᬭᬶᬂᬳᬶᬤᬩᬕᬸᬲ᭄᭞ᬬᬤᬶᬦ᭄ᬫᬧ᭄ᬭᬂᬢᬦ᭄ᬤᬶᬗᬦ᭄᭞ᬤᬸᬯᬸᬃ
[ ᭑᭑ 11A]
ᬢᬦᬄᬩᭂᬢᬾᬦ᭄ᬮᬗᬶᬢ᭄᭞ᬢ᭄ᬯᬭᬢᬓᬸᬢ᭄᭞ᬗᬋᬧᬶᬦ᭄ᬲᬢᬸᬲ᭄ᬓᭀᬭᬯ᭟ᬩᭂᬮᬶᬗᬶᬤᬶᬄᬯᭂᬸᬚᭀᬮᬲ᭄ᬧᬶᬲᬦ᭄᭞ᬢᭂᬓᬾᬦ᭄ᬳᬤᬶᬩᬸᬓᬚᬦᬶ᭞ᬫᬶᬭᬶᬩ᭄ᬳᬤᬶᬓᬓᬶᬸᬭᬭᬾᬬᬦ᭄᭞ᬢ᭄ᬯᬭᬳᬦ᭄ᬤᭂᬮ᭄ᬢᭂᬓᬾᬦ᭄ᬩᭂᬮᬶ᭞ᬫᬶᬭᬶᬩ᭄ᬩᭂᬮᬶᬢᬦ᭄ᬲᬸᬢᬶᬦ᭄ᬤᬶᬄ᭞ᬭᬶᬓᬵᬮᬦ᭄ᬳᬤᬶᬧᬓᬾᬯᬸᬄ᭞ᬯᬢᭂᬓ᭄ᬫᬦ᭄ᬢ᭄ᬭᬶᬩᬯᬸᬤᬦ᭄ᬤ᭞ᬩᬮᬧᬢᬶᬄᬢᭀᬘᬶᬗ
ᬓᬶᬦ᭄᭞ᬧᬕᬭᬸᬤᬸᬕ᭄᭞ᬓᬭᬶᬗᬦ᭄ᬢᭀᬲ᭄ᬧᬯᬘᬦ᭟ᬦᬾᬚᬦᬶᬩᭂᬮᬶᬘᬕᭂᬭᬂ᭞ᬲᬶᬦᬄᬧᬘᬂᬫᬧᬶᬓᭀᬮᬶᬄ᭞ᬢᬸᬯᬶᬤᬳᬢ᭄ᬫᬉᬢ᭄ᬢᬫ᭞ᬮᬶᬗ᭄ᬕᬶᬄᬲᬂᬲᬶᬢᬶᬲᬸᬡ᭄ᬥᬭᬶ᭞ᬩᭂᬮᬶᬲᬸᬫᬗ᭄ᬕᬸᬧ᭄ᬫᬗᬫ᭄ᬩᬶᬮ᭄᭞ᬭᬶᬂᬢᬫᬦ᭄ᬲᬂᬦᬣᬭᬢᬸ᭞ᬓᬕᬾᬢᬵᬳᬤᬲᬩ᭄ᬤᬫᬦ᭄ᬢᬭ᭞ᬗᬯᬂᬗᬯᬂᬦᬾᬭᬶᬂᬮᬗᬶᬢ᭄᭞ᬤᬸᬄᬲᬂᬧ᭄ᬭᬪᬸ᭞ᬳᬾᬗ᭄ᬕ
ᬮᬂᬚᬦᭂᬫᬚᬮᬦ᭄᭟ᬲᬂᬳᬬᬸᬤᬳᬢ᭄ᬲᬸᬗ᭄ᬓᬯ᭞ᬳᬶᬩᬸᬓ᭄ᬲᬮᬶᬂᬗᬕᭂᬫ᭄ᬓᭂᬭᬶᬲ᭄᭞ᬢᬫ᭄ᬩᬂᬲ᭄ᬲᬫ᭄ᬧᬸᬦ᭄ᬜᬸᬤᬸᬓ᭄ᬭᬕ᭞ᬢ᭄ᬯᬭᬤᬤᬶᬧᬶᬯᬸᬗᬸᬳᬶᬦ᭄᭞ᬢᭀᬂᬳᬤᬩᬦᬶᬫᬳᭂᬓᬶᬦ᭄᭞ᬳᬶᬭᬵᬓ᭄ᬱᬲᬧᬕᬭᬸᬤᬸᬕ᭄᭞ᬲᬂᬦᬣᬲᬳᬓᬕᬾᬢ᭞ᬫᬓᭂᬩᭂᬃᬗᬫ᭄ᬩᬸᬦ᭄ᬗᬮᬗᬶᬢ᭄᭞ᬲᬳᬤᬸᬮᬸᬃ᭞ᬲᬂᬳᬦᭀᬫ᭄ᬮᬜ᭄ᬚᬸᬭᬸᬤᬾ
ᬬ᭟ᬓᬵᬮᬯᭂᬗᬶᬲᭂᬧᬶᬲᬸᬦ᭄ᬬ᭞ᬫᬗᬶᬫ᭄ᬩᬂᬮᬸᬳᬸᬃᬳᬶᬂᬧᬸᬭᬶ᭞ᬗᬋᬕᭂᬧ᭄ᬲᬂᬳ᭄ᬬᬂᬅᬚᬶᬲᬸᬧ᭄ᬝ᭞ᬫᬯᬲ᭄ᬢᬸᬲᬤᬕᬶᬂᬧᬸᬭᬶ᭞ᬧᬍᬲᬼᬍᬄᬫᬓᬲᬫᬶ᭞ᬲᬚᬯᬶᬦᬶᬂᬲᬂᬓᭂᬦᬾᬂᬮᬸᬮᬸᬢ᭄᭞ᬓᬵᬮᬯᬦ᭄ᬲᬂᬲᬸᬤᬃᬧᬡ᭞ᬲᬂᬓᬮᬶᬄᬩᬸᬮᬲᬄᬧᬮᬶᬂ᭞ᬧᬢᬶᬳᭂᬦ᭄ᬢᬸᬮ᭄᭞ᬢᬦ᭄ᬲᬶᬤᬚᭂᬦᭂᬓ᭄ᬫᬦᭂᬕᬓ᭄᭟ᬲᬂᬪᬶᬫᬦ᭄ᬬᬸ [ 12 ][ ᭑᭑ 11B]
᭑᭑᭞
ᬓᭀᬘᬧᬦ᭄᭞ᬚᬸᬭᬸᬤᬾᬬᬲᬢ᭄ᬬᬗᬶᬭᬶᬂ᭞ᬜᬮᬶᬩ᭄ᬲᬶᬩ᭄ᬗᬮᬶᬄᬳᬮᬶᬗᬦ᭄᭞ᬦᬶᬲᬸᬤᬃᬧᬡᬫᬗᬶᬦ᭄ᬢᬶᬧ᭄᭞ᬜᬧᬢᬶᬦ᭄ᬲᬤᬜᬖᬕᬶᬦ᭄᭞ᬲᬤ᭄ᬬᬦ᭄ᬳᬶᬭᬢᬸᬦᬾᬭᬯᬸᬄ᭞ᬬᬦ᭄ᬓᬲᬾᬧ᭄ᬢᬦᬸᬭᬸᬂᬩᬬ᭞ᬳᬶᬤᬳᬶᬳᬭᬶᬗᭂᬫᬲᬶᬦ᭄᭞ᬤᬾᬦᬶᬂᬳᬶᬩᬸᬓ᭄᭞ᬳᭂᬗ᭄ᬲᬧ᭄ᬳᬶᬗᭂᬢ᭄ᬢᭂᬓᬾᬦ᭄ᬭᬕ᭟ᬮᬯᬸᬢ᭄ᬜᬕ᭄ᬚᬕ᭄ᬓᬲᬭᬾᬦᬦ᭄᭞ᬜᬦ᭄ᬢᭂ
ᬦᬂᬲᬂᬓᬤᬶᬭᬢᬶᬄ᭞ᬲᬂᬳᬬᬸᬜᬸᬤᬸᬓ᭄ᬫᬕᬮᬓ᭄᭞ᬲᬂᬳᬦᭀᬫ᭄ᬲᭂᬩᭂᬢ᭄ᬫᬓᬶᬭᬶᬕ᭄᭞ᬦᬶᬲᬸᬤᬃᬧᬡᬫᬜ᭄ᬚᭂᬭᬶᬢ᭄᭞ᬗᬸᬤᬓᬾᬢᭀᬭᬢᬸᬳᬬᬸ᭞ᬧᬸᬦᬶᬓᬶᬳᬶᬤᬳᬶᬭᬓ᭞ᬲᬂᬪᬶᬫᬦ᭄ᬬᬸᬧᬭᬧ᭄ᬝᬶ᭞ᬲᬶᬗᬓ᭄ᬭᬢᬸ᭞ᬲᬧᬩᬦ᭄ᬫᬦᬶᬲᬶᬂᬘᬶᬗᬓ᭄᭟ᬲᬶᬢᬶᬲᬸᬦ᭄ᬡ᭄ᬥᬭᬶᬜᬸᬮᬶᬗᬄ᭞ᬜᬮᬾᬫ᭄ᬧᭀᬄᬮᬯᬸᬢ᭄ᬫᬗᬜ᭄ᬚᬮᬶ᭞ᬲᬂ
ᬪᬶᬫᬦ᭄ᬬᬸᬦᬗ᭄ᬲᭂᬓᬂ᭞ᬗᬸᬲᬧ᭄ᬧᬶᬧᬶᬢᬗᬦ᭄ᬫᬮᬶᬄ᭞ᬗᬦ᭄ᬤᬶᬓᬫᬤᬸᬮᬸᬃᬢᬗᬶᬲ᭄᭞ᬲᬂᬖᬝᭀᬢ᭄ᬓᬘᬚᬕ᭄ᬭᬯᬸᬄ᭞ᬓᭂᬫᬚ᭄ᬯᬳᬤᬶᬕᭂᬮᬶᬲᬂ᭞ᬳᬚᬓ᭄ᬧᬢ᭄ᬧᬢ᭄ᬦᬾ ᬲᬫᬶ᭞ᬓᭂᬫᬫᬦ᭄ᬢᬸᬓ᭄᭞ᬭᬣᬦ᭄ᬩᭂᬮᬶᬳᭂᬦ᭄ᬢᭀᬩᬸᬯᬢ᭄᭟ᬩᭂᬮᬶᬤᬶᬦᬶᬤᬶᬧᬰ᭄ᬭᬫᬦ᭄᭞ᬫᬕᬸᬢᬶᬦ᭄ᬳᬲᬶᬂᬧᬭᬧ᭄ᬝᬶ᭞ᬫᬤᬓ᭄ᬳᬶᬮᬓ᭄ᬱᬡᬓᬸᬫᬭ᭞ᬲᬤ᭄ᬬ
ᬢᭂᬓᬳᭂᬦᬾ ᬚᬦᬶ᭞ᬗᬮᬯᬸᬢ᭄ᬜᬗ᭄ᬓᬸᬢᬶᬦ᭄ᬩᭂᬮᬶ᭞ᬩᭂᬮᬶᬜᬭᬢᬂᬗᬭᬸᬫ᭄ᬭᬸᬫ᭄᭞ᬳᬦ᭄ᬢᬸᬓ᭄ᬳᬲ᭄ᬢ᭄ᬭᬧᬧᬶᬗᬶᬢᬦ᭄᭞ᬢᬸᬫᬸᬮᬶᬗᬢᭂᬳᬂᬫᬸᬮᬶᬄ᭞ᬢᬸᬃᬫᬮᬸᬗ᭄ᬕᬸᬄᬭᬶᬂᬓᬯᬄᬘᬫ᭄ᬩ᭄ᬭᬕᭀᬄᬫᬸᬓ᭟ᬲᬂᬪᬓᬫᬗ᭄ᬓᬜ᭄ᬘᬭᬶᬢ᭞ᬓᬪᬶᬦᬯᬮᬸᬯᬶᬄᬰᬓ᭄ᬢᬶ᭞ᬲᬶᬤᬧᬕᭂᬄᬭᬶᬂᬳᬾᬓᬘᬓ᭄ᬭ᭞ᬳᭀᬮᬶᬄᬲᬂᬪᬮᬯᬗᬸᬦᬶ᭞ᬯᬾᬦ᭄ᬢᭂᬦ᭄ᬧᬶ
[ ᭑᭒ 12B]
ᬬᬦᬓ᭄ᬜᬮᬓᬶ᭞ᬲᬂᬩᬚ᭄ᬭᭀᬤᬦ᭄ᬢᬓᬲᬸᬫ᭄ᬩᬸᬂ᭞ᬓᬶᬦᬦ᭄ᬤᭂᬮ᭄ᬲᬂᬖᬝᭀᬢ᭄ᬓᬘ᭞ᬩᬦ᭄ᬧᬾᬦ᭄ᬢᭂᬭᬾᬤᬤᬶᬓᬸᬲᬶᬃ᭞ᬤᬶᬢᬸᬜᬭᬸ᭞ᬫᬫᬜ᭄ᬚᬓ᭄ᬫᬶᬭᬶᬩ᭄ᬲᬸᬲᬢ᭄ᬬᬚᬦᬶᬬᬫᬭᬲᬲᬤ᭄ᬬ᭞ᬜᬮᬦᬂᬫᬦᬄᬫᬲᭂᬗᬶᬢ᭄᭞ᬫᭂᬚᬄᬳᬶᬂᬲᬂᬖᬝᭀᬢ᭄ᬓᬘ᭞ᬭᬶᬂᬧᬸᬭᬶᬤ᭄ᬯᬭᬯᬢᬶ᭞ᬢᬸᬫᬸᬮᬶᬳᬾᬜ᭄ᬘᭀᬮ᭄ᬫᬫᬃᬕᬶ᭞ᬮᬓ᭄ᬱᬡᬓᬸᬫᬭᬓ
ᬚᬸᬚᬸᬃ᭞ᬓᬘᬸᬦ᭄ᬤᬸᬓ᭄ᬢᭂᬗᬳᬶᬂᬳᬯᬦ᭄᭞ᬲᬂᬩᬚ᭄ᬭᭀᬤᬦ᭄ᬢᬫᬦᬗ᭄ᬓᬶᬮ᭄᭞ᬫᬢᬸᬃᬳᬮᬸᬲ᭄᭞ᬭᬢᬸᬧᬘᬂᬮᬸᬗ᭄ᬳᬓᬶᬚ᭟ᬬᬦ᭄ᬳᬶᬭᬢᬸᬲᬭᬢ᭄ᬮᬸᬗ᭄ᬳ᭞ᬭᬶᬂᬧᬸᬭᬶᬤ᭄ᬯᬭᬯᬢᬶ᭞ᬢᬶᬢ᭄ᬬᬂᬫᬓᬤᬶᬲᬗ᭄ᬲᬬ᭞ᬯᬾᬦ᭄ᬢᭂᬜ᭄ᬘᬶᬳ᭄ᬦᬦᭀᬭᬲᬶᬗ᭄ᬕᬶᬄ᭞ᬦᬾᬫᬓ᭄ᬭᬦᬲᬃᬯᬯᬾᬘᬶ᭞ᬫᭂᬓᬲ᭄ᬗᬯᬾᬢᬦ᭄ᬭᬳᬬᬸ᭞ᬬᬦ᭄ᬯᬦ᭄ᬢᬄᬳᬶᬭᬢᬸᬮᬾᬤᬂ᭞ᬢᬶ
ᬢ᭄ᬬᬂᬗᬶᬭᬶᬂᬫᬗ᭄ᬭᬶᬳᬶᬦᬶᬦ᭄᭞ᬫᬯᬲ᭄ᬤᬸᬫᬸᬦ᭄᭞ᬳᬮᬳᬬᬸᬦᬾᬳᬶᬭᬶᬓ᭟ᬮᬓ᭄ᬱᬡᬓᬸᬫᬭᬗᬦ᭄ᬤᬶᬓ᭞ᬳᬾᬗ᭄ᬕᬮᬂᬓᭂᬫᬧᭂᬤᬲᬶᬦ᭄᭞ᬚᭂᬮᬾ ᬫᭂᬮᬄᬦᬾᬧᬂᬢᬯᬂ᭞ᬮᬯᬸᬢ᭄ᬳᬶᬜ᭄ᬘᭂᬕᬂᬫᬯᬮᬶ᭞ᬲᬂᬩᬚ᭄ᬭᭀᬤᬦ᭄ᬢᬫᬫᬃᬕᬶ᭞ᬕᬥᬦᬾᬮᬯᬸᬢ᭄ᬓᬢᬶᬓᬸᬮ᭄᭞ᬲ᭄ᬬᬕᬗᬼᬫ᭄ᬧᬕ᭄ᬲᬶᬭᬄ᭞ᬲᬂᬖᬝᭀᬢ᭄ᬓᬘᬭᬶᬂ
ᬧᬸᬭᬶ᭞ᬲᬫ᭄ᬧᬸᬦ᭄ᬭᬯᬸᬄ᭞ᬳᬤᬾᬂᬳᬮᬶᬸᬮᭀᬦ᭄ᬗᬫ᭄ᬧᬓ᭄ᬮᬯᬂ᭟ᬲᬂᬖᬝᭀᬢ᭄ᬓᬘᬫᬦᬶᬜ᭄ᬚᬓ᭄᭞ᬢᬦ᭄ᬧᬯᬶᬸᬗᬸᬘᬧ᭄ᬚᭂᬕ᭄ᬫᬢᬶᬕ᭄ᬢᬶᬕ᭄᭞ᬮᬯᬸᬢ᭄ᬜᬭᬸᬧ᭄ᬫᬫᬦ᭄ᬢᬶᬕᬂ᭞ᬮᬶᬫᬩᬢᬶᬲ᭄ᬤᭂᬓ᭄ᬤᭂᬓ᭄ᬲᬫᬶ᭞ᬲᬂᬩᬚ᭄ᬭᭀᬤᬦ᭄ᬢᬗᭂᬫᬲᬶᬦ᭄᭞ᬫᬢᬶᬦ᭄ᬜᬦᬾᬢᬦ᭄ᬧᬲᬸᬮᬸᬃ᭞ᬯᬲ᭄ᬢᬸᬳᬸᬬᬸᬢ᭄ᬭᬶᬂᬧᬸᬭ᭄ᬬᬦ᭄᭞ᬚᬕᬩᬬᬓᬢᬄᬫᬢᬶ᭞ [ 13 ][ ᭑᭒ 12B]
ᬲᬮᬶᬂᬢᬸᬲᬸᬓ᭄᭞ᬲᬫᬶᬕᬮᬓ᭄ᬓᬧᬸᬧᬸᬗᬦ᭄᭚᭜᭚ᬧᬸᬧᬸᬢ᭄ᬲᬶᬦᬸᬭᬢ᭄ᬭᬶᬂᬭᬳᬶᬦ᭞ᬰᬦᬶᬰ᭄ᬘᬭ᭞ᬉᬫᬦᬶᬲ᭄ᬯᬭᬫᭂᬤᬗ᭄ᬓᬸᬗᬦ᭄᭞ᬣᬶᬢᬶᬕᬗ᭄ᬕᬮ᭄ᬧᬶᬂ᭞᭑᭒᭞ᬰᬰᬶᬄ᭞ᬓᭂᬧᬶᬢᬸ᭞ᬇᬰᬓᬯᬃᬧ᭞᭑᭙᭑᭒᭞ᬓᬲᬸᬭᬢ᭄ᬳᬦ᭄ᬢᬸᬓ᭄᭞ᬳᬶᬫᬤᬾᬲᬸᬓᬦᬭ᭞ᬲᬓᬶᬂᬤᬸᬲᬸᬦ᭄ᬯᬦ᭄ᬫ᭄ᬭᬶᬓ᭄᭞ᬲᬪᬲᬪᬩᭂᬲᬶᬓ
ᬦ᭄ᬲᬶᬗᬭᬵᬚ᭚᭜᭚