An Kaduntan Han Bungto – ni Jose Rizal, 1962/2
kun pananglit nahauuyon ha kaburut'on han insik nga paraalog. Urusahon nga dinhi hini nga dako kaupay in pulos nga sapa, nga asya an maribhong nga pamaraligyaan ug makalilisang pagkit'an han taputapo ug ngadto-nganhi han mga tawo, tubtob ha may usa kakilometro kaantaw, upayda na la kay may uusa nga tulay nga kahoy nga ha sulod hin tunga hin tuig araydon la gihapon ha usa nga katapusan, ug ha luyo man diri naaagian hin kanan unom kabulan. Salit, usahay, kun mga magpaso nga panahon, danay an mga kabayo nga, dapit pagpahimulos han diri pag-ayda hinin tulay, nahanununong pag-ambak ngadto ha tubig, layon na man la an paghipuragwat hiton sumarakay nga ha sakob hiton sarakyan naghihingaturog o nagpipinamurubuot mahatungod han kauswagan hinin mga tuig.
An balay nga aton na hinnabihan dapit habubo ngan diri kaupay magtadong an mga lirik, waray sasabuta kun kadiri pagtutok hin maupay han panday, kun dara na ba adto han mga bagyo ug mga linog. Usa nga haluag nga hagdan nga mga lunghaw an rihas han alubaybayan ug ha latang-lat-ang hinanigan hin alkumbra, asya an sinasak’an ngadto ha igbaw tikang ha purtahan nga nag-aagi hin sirong nga binaldusahan, ngadto ha butnga hin mga rinumbay nga masitas nga ipinanunungtong ha mga pedestal nga pinggan ha China, nga magkalainlain an tina ug mga katingalahan an mga palupot nga sabong ha lawas.
Tungod kay waray bantay ha purtahan nga magsususi ha aton kun inabiabi ba kita, kun diri, tana kita, ikaw nga akon bumarasa, masangkay ko, makaaway!, tana kita pagkasaka, kun naiindig ka pamati hadin mga turunggon, kun nahihilig ka pagtan-aw hiton mga suga ngan kun naaaghat ka pagdungog hadin hinarantiyaw han mga pinggan ug mga kasangkapan ha pagkaon ngan buot ka kumita kun tiunano in usa nga panagtawo didto ha Mutya han Sidlangan.(2) Apit ko nala unta diri ta ikaw pag-asuyan han kahimtangan han sakob hinin balay, lugaring kay kasuruk’an gud kay kita an tawo sugadsugad kita han pawikan: dida ha kara kikilal'a an kahitaas o kahamubo han palit. Tungod hini ngan tungod hin iba pa nga mga hinangag nga pamatasan, masugadsugad man hin mga hangag an mga bumurungto didto ha Pilipinas. Kun sumaka kita say ta dayon sasangputan in usa nga haluag nga ruwang nga didto ginngangaranan nga caida, ambot kay ano, ug yana nga gab-i amo an ginagamit nga pangaraunan ngan hugpuan han namamagkapot han