Al filosof poêtta Gaetann Negri
Ma donca coss'el serv tutt sto pensà,
Sto vardà in sù, in giò, inanz, indree,
Se dopo, in conclusion, emm de trovà
Che anca a corr se resta sui duu pee?
Ma cossa serv fa tucc el lampedee,
Per fà ciar a sto prossim, s'emm de andà
Tucc al scur anmò insèmma? E pœu, vardee,
Per dessedass bisogna anmò creppà!....
Lasséla buj!.... Andemm, tiremm inanz
Col catechismo frust di noster vecc;
Lì de sapienza che n'è anmò d'avanz.
Voremes ben, guardemm dessora ai tecc,
Pagand, de galantomm, el fitt di stanz,
E col penser.... pensemm nagott.... ven frecc!....
19 Aprile 1892
(*) L'illustre Senatore così chiudeva l'eletto discorso di
inaugurazione del nostro nuovo Museo di Storia naturale:
Chi mai, chi mai svegliandomi
Mi riporrà nel vero?
Sicura è la mia sorte,
Mi sveglierà la morte!
Nota dell'autrice