Al dottor Lombroso
E d'alter, ei? Gh'è pù nagott de dì?
Ma.... bravo lù, me pias la tiritera....
Inanz inanz.... el me par nanca vera
Che sul pù bell.... «eccetra» el pienta lì!
Donca i donn hin bosard? − E in che manera −
E tucc e semper? − Ma sigûr de sì −
− Ma nanca vœuna la pò vess sincera?....−
«Ma nanca vœuna, mai,.... natura inscì»
Oh pover omm! Ma cont sta fissazion
Che vita bolgironna l'ha de fà!
El me mett, ch'el me scusa, compassion.
E quand ona donnetta che ghe và,
La ghe dis, propi a lù «l'è on talenton»
Ej, coss'el cred?... L'è propi de cattà!
(*) Il chiaro medico pubblicava nella Vita Moderna un
articolo: − La menzogna nella donna −