Ai Ladins

From Wikisource
Jump to navigation Jump to search
Stóries e chiánties ladines  (1895)  by Jan Batista Alton
Ai Ladins
grafia moderna ladin da Colfosch

V. Ai Ladins.

Oh, prosc ladins, dʼ osc bel lingaz tignide cunt!
Tignide cunt plü che podëis dl tesur,
Chʼ é plü prezius de tröp co döt le lüch da Sompunt,
ʼCi plü co chël che rëgna le monn, arjënt y or!

Oh, bogn ladins, dʼ osc bel lingaz ciarede bëgn,
Chʼ ëis da ostes bones, prosses omes arpé!
Dʼ ester n lotrun y zënza cör me dá bur sëgn
Chi de süa oma le lingaz ne sá respeté.

Püri ladins, dʼ osc bel lingaz fistide aede!
Cun chël ves á les püres omes a perié
A Chël Bel Dî insigné; mai ne le desmentiede,
Scenó podess ʼci Dî dʼ os se desmentié!

Bravi ladins, stimede le lingaz granmënter,
Arpé da chi latins, popul tan studié,
Bëgn arlevé, potënt tres da vedlamënter,
Te vigni vera ausé dlunch a davagné!

Paziënc ladins, le lingaz ladin, dʼ onur gran dëgn,
Dandaldöt insignede a üsc pici mituns!
De tigní cunt de nosc lingaz tochera sëgn
Y de se stravardé dai gragn ciacoluns.

28 Rajonede, sce sëis de plü en adöm, ladin!
Vigni ater lingaz lascion a canchʼ an mëss;
Tan chʼ i sá, rajonâ i latins tra ëi latin,
Chʼ an dais ʼci spo ai ladins döt chël chʼ an dé i dess.

Y os, dl’ arpejunga de Cristo guardiagn,
Os, chʼ arëis n de da dé de chësta gran cunt,
Ciarede ʼci dlʼ arpejunga di Romagn,
Scenó me tëmi, ch’ osc dover ne sî arjunt!