A ti Seniëur Jan Batista Purger
div style="font-family:Georgia, Times New Roman, Times, serif;serif;">
A ti Seniëur Jan Batista Purger
Tu nosc gran uem, da duc amà
Da Gherdëina, ti jënt, per for laudà.
A ti sent grà la val de Gherdëina
Giaurida l' es tu, delibrà si pëina.
Purdenanza te prëia la jënt de ti val
Che teniva ti lëur mo for per n fal.
Tu sëul, Seniëur Purger, tu sëul es udù
Ce che mancia a la val, tu sëul cunesciù.
No mueies, no bries es tu tlo schivà
Mé la pitla jënt t' à te judà
De fier tu ies stat, tu nosc gran uem
Y suvënz rumpì tu ares ti suen.
Ce n' aral pa custà lauré ora n tel lëur?
La fadia fova granda y mé pitl l unëur.
Cun jënt da zanché, cun jënt da prihté
Tres for es abù, sce t' uloves passé.
L' idea che tu oves, ne fova da storjer,
La jënt si man messova te sporjer.
Y chëi che minova plu de la ntënder,
Cherdova che te muesses tosc te rënder.
De bel y de burt tlo messoven passé
Mujenëies y rotes ne pudoven schivé.
Cun l aiut de Die for jivela inant
Y no una na fadia ne fova debant.
L 26 d' utober dl 1856 ie stà
La festa plu granda che Gherdëina à fà
Urtijëi ne arà mei tan de jënt udù,
Da dlonch caprò, dala montes ju.
Truepes bradlova dala gran legrëza
A udëi ti lëur de na tel belëza.
Da Pruca tres ite nchin a Urtijëi,
N triunf de unëur pudoven udëi.
Danora i lauranc cun si massaries
Che ova laurà cun tan de fadies.
Mujighes y scizeri per ngrandì
Cun te la festa y l sandì.
Y po ti cumpanies su aut a ciaval,
Tu amez furnoves cuntënt per la val,
Ciofes, gherlandes d' uni culëur
Ntëur te ite per gran unëur.
Y canche sun plaza ies po ruvà,
Duc cun legrëza t' ai aspità.
Amez a ti jënt pudoves śën dì
L stradon de Gherdëina, śën iel giaurì.
L mumënt plu bel sarà bën stà,
Canche i t' à po sentì gra.
Y dla gran ciampanes si bel sonn
Ve cumpaniova la urazion
Su aut al ciel su a Idie,
L bel che ie grand, l merit che ie tie.
Do 65 ani, tu gran Seniëur,
Vën cunesciù mo for ti lëur.
Gherdëina resterà mo for debit
Uniun cunescerà ti gran merit.
Per chël te ons fat su chësc monumënt
Da nëus tu ncuei l rengraziamënt.