A Segneur Pluan da Ortisei Monsignore Francesco Anderlan

From Wikisource
Jump to navigation Jump to search
A Segneur Pluan da Ortisei Monsignore Francesco Anderlan  (1926)  by Engilbert Compploj
ladin badiot
grafia moderna

Cincant' ani bel deplën,
Mez n secul iust iel śën,
Che nosc Pluan, nosc Monsignor
Ie bel preve, for y for.

Cincant' ani, dit iel prësc,
Ma passei danz no tan riesc;
N tel di de rarità
Dëssa unì nce celebrà.

Y perchël śën sonse tlo
Cumparii duc dant a Vo,
Per rengrazië de dut l bën,
Y per mustré, che duc V' à gën.

Truep del bën ëis Vo bel fat
Da caplan y da curat;
Ma mo plu, do ch' sëis pluan
A Vosc popul, ann per ann.

Ala Chiesa y al Chemun,
Per nëus duc y uni un
Sëis Vo stat n bon pastor,
Sëis Vo stat benefator.

Per duc canc ëis Vo prià,
La santa Mëssa celebrà,
Cun dutrines nstruì,
Cun perdiches amunì.

Catechista te la scoles,
Cun esempi y paroles
Ëis Vo dat nseniamënc
Che restonse duc valënc.

Come pere di plu pueresc
Ëis Vo vënt bën duc i cueres
Col judé y fé del bën
A chël ch' ova de bujën.

Sc' un univa tribulà,
Po se n jivel cunsulà;
Sc' un univa dal cuer plën,
I fajais segur del bën.

Canch' un fova amalà,
S' ëis po ënghe for cruzià
De jì a l crì y l' cunsulé,
A si ana i judé.

I sc' un fova da murì,
Sëis Vo suvënz mo cumparì,
Ëis truep animes salvà
Cun devina potestà.

Chësc dut cant y mo deplù,
Vo ëis fat, ce ch' ëis pudù;
Cincant' ani s' ëis cruzià
Per nost' anes y laurà.

Co pudrons'a rengrazië?
Co pa auter, che prië,
Ch' Idie paie chël ch' ëis fat
Cun fertuna y sanità.

Die Ve debe si aiut,
Ch' ëis la grazia de viver giut,
Che restëis, o Monsignor,
Mo truep ani nosc pastor.