1913 n salut a Seniëur Pluan 1938 n ucajion de ti mëssa nevela d' arjënt
1913 n salut a Seniëur Pluan 1938 n ucajion de ti mëssa nevela d' arjënt.
Cie iel pa che s' à abinà tan de jënt adum
Da uni pert dla val y for majer vën l grum
Duc furnii cun si plu bel guant
Che l fova da giaté te cassabanch.
Sce ëise pazienza uei pa bën v' l dì
Ciuldì che duc ie furnii ncuei da sandì
Che da giut nca s' onse bel ncunfertà
Sun chësc bel dì da duc dejidrà.
A Santa Crestina audiven sunan
La gran ciampana trajian mo a man
Dan 25 ani ie chësc suzedù
Y per chël ulëssi mo ve dì velch de plu.
L fova de nosc Seniëur Pluan la mëssa nevela
Y cie festa ie pa mo tan bela
Che canche n preve l prim iede sun auter l va
Per celebré la santa mëssa y la benedescion nes dà.
Cie nes dà pa n preve, ulëssi damandé
Ie crëie che sce à cunté su un ulëssa scumencé
La trajëss ora lonch, l ne foss bon de firé
Che tan truep de bën n preve nes po fé.
Chël pudonse dì de nosc bon Seniëur Pluan
A udëi si lëur ch' l à for fat ann per ann
Che sce dut l lëur che l à fat te n iede n l' udëss
Me nfidi a mëter pën', che truepes se sperdëss.
De di y suvënz mo de nuet al per nëus laurà
Zënza damandé da valguni n sentigrà
O per ulëi da chësc mond unì laudà
Ma n di o l auter uniral da Idie premià.
L à suvënz abù mueies, festidesc y crëujes
De scola cun chi pitli mëures
Ma nce suvënz cun nëus granc
Sambën, nëus ne son mefun endeno degun sanc.
Tl Confescional iel stà truepiscima ëures
A nes tò ju l pëis a nëus puere piciadëures
Y uni di pro la santa mëssa ne al cunedì
Dut cie ch' l à fat de bën l ne n' ie da descrì.
Y śën ve bincions mo che restëis for nton
Y sun vosc lëur da Idie la benedescion
Che a vosta mëssa nevela d' or mo vivëis
Y che robust y sann mo nlëuta sëis.
Per chël ulons ncuei rengrazië
Chël bel Idie y da nuef l perié
Che l nes lasce nosc bon Pluan mo truep dis
Che pudon l saludé n di o l auter sun Paravis.
Y śën ve preii vo duc adum
nce chëi che ne n' ie de chësta chemun
De fé na viva a nosc Seniëur Pluan
Che i po audì magari nfin te Plan.