ალნარკია
ათაქ ჯვეშოშე ზღვაში კვარკვაშის,
ინგირჲ ონირზჷდ პოპორიშ ტყვიათ,
თურქიშ სანდალიშ ტილოშ ფარფაშის
ბორია ორკინჷდ ნწარე მერქიათ.
მინშა პახოდი დობაჸჷნდ პულას
უჩათ მონირსჷნდ გვალო ელმოლუს,
ნავაჭრით ეფშა ქჷდიჭყანდ ულას -
მინუტის მიშუ საათიშ ოლუს.
თაქ ანთასობით გჷმიჩამუდუ
მოხანდეშ სქუა-ახალგაზრდობა,
მუჟამც დადია გილეცამუდუ,
კოჩიში შურით ორდ ვაჭარობა.
მარგალ მოხანდეშ ბაღაჭიჭუეფ
თურქიში სანდალც ინორსხიანდჷ,
პარახოდეფცჷ მეჸუნდ ჩქიჩქუეფ,
დო დიდალეფი ეკარკიანდჷ.
უჩა ზღვა პიცჷ, ათე არდგილცჷ,
ჩილამურეფი უშუმ მიარე,
დო გჷმოჩამილ ბაღანეფიში
მოხანდე დიდაშ ალნარკია რე.
მუჟამ მოხანდეშ კუნთიქ
ჩქინი დადია ტვერო გაჩქუნი,
მუჟამც ჩილამურც გითათირ უფიქ,
ჯვეში მოსოფუ გაკოჩქვაჩქვუნი.
მუჟამც ინგირიშ პოპორი ტყვია
მუში მოხვარეთ ქიგმირინუნი,
მუჟამც კოლექტივქ გოფაჩ ორგია,
ფაფრიკა-ზავოდ გეიორთინუნი.
მუჟამც უჩა ზღვაშ სანდალეფიშო
გვალო შხვანერი ირქენც ბორია.
თეწკმა მოხანდეშ ბაღანეფიშო
თაქ ეთმიგაფუ სანატორია.
თაქ ეთმიგაფუ სანატორია,
სოდეთ ურტუაფჷ დიხა ჩილამურც,
ათაქ ბარჩხალანც ამდღა ჩხორია
დო ოტიბუანც მოხანდეფიშ გურც.
დო დეკვირითჷ მუშ მაჯგირა რე
თაქ მოხანდეფი მირდუ მიარე,
ნგარაში გამათ ამდღა ბირა რე,
მარა ჯვეშოშე ალნარკია რე!
1931 წ.