သိမ်မျိုးစုံမဟာဋီကာ/ဝိသုံဂါမသိမ်အမိန့်စာခံပုံပြခန်း (ပုံစံ)
| ←၄၁။ ရေနိမိတ် ပြခန်း | သိမ်မျိုးစုံမဟာဋီကာကျမ်း by ၄၂။ ဝိသုံဂါမသိမ်အမိန့်စာခံပုံပြခန်း (ပုံစံ) |
၄၃။ အင်္ဂလိပ်မင်းတို့ ဝိသုံဂါမပေးပုံ ပြခန်း→ |
ပရိသာသမ္မတ္တိယာ ယုတ္တာ နာမ သဗ္ဗန္တိမေန ပရိစ္ဆေဒေန စတူဟိ ဘိက္ခုဟိ သန္နိပတိတွာ။လ။ သမ္မတာ-
ဟူသော ကင်္ခါဝိတရဏီ အဋ္ဌကထာ (၈၉)နှင့်အညီ သီမသမ္မုတိကံသည် စတုဝဂ္ဂကရဏီယကံ ဖြစ်၍ နောင်အရှည်သဖြင့် သာသနာတော်ထွန်းခြင်းကိုငဲ့ကွက်၍လည်းကောင်း၊ ဘုရား သာသနာကို ပူဇော်လို၍လည်းကောင်း ယခုကာလ သမုတ်အပ်သော ဗဒ္ဓသိမ်တို့ကဲ့သို့ သိမ်သမုတ်လိုသော ပညာရှိ သူတော်ကောင်းတို့သည် လိုက်နာ ကျင့်သုံးရန် ဝိသုံဂါမမြေ အမိန့်စာ ခံယူပုံကစ၍ သိမ်သမုတ် ပြီးသည်တိုင်အောင် ရှေးရိုးလမ်းကျ ငါတို့ကျေးဇူးရှင် ဆရာတော် ဘုရားကြီးများနှင့် တကွ ငါတို့ပါ အဆက်ဆက် သိမ်သမုတ်ပုံ နည်းလမ်းအတိုင်း ရေးလိုက်ပေအံ့။
ဝိသုံဂါမသိမ်အမိန့်စာခံပုံပြခန်း (ပုံစံ)
တောင်သာမြို့ ကျွန်းရွာကလေးနေ စာရေးကြီး မောင်ချစ်ပေါက တောင်သာမြို့အုပ်မင်း ရုံးတွင် လျှောက်ထားသည့် လျှောက်လွှာစာ လက်ခံ။
တောင်သာမြို့ -မြို့အုပ်မင်း ရုံးတော် ၌ ( -----) ခု။
လျှောက်လွှာနံပါတ် ၊(------)
ဘုရားကျွန်တော်မျိုး တောင်သာမြို့ ကျွန်းရွာကလေးရွာနေ စာရေးကြီး မောင်ချစ်ပေါ ရှိခိုး အစီရင်တော် ခံပါသည်။
အကြောင်းမှာ ကျွန်တော်မျိုးတို့မှာ ဗုဒ္ဓဘာသာ မြန်မာလူမျိုးတို့မျှမက ဂျော့ဘုရင် မင်းမြတ်ကြီး လှူဒါန်းအပ်သော အဂ္ဂမဟာပဏ္ဍိတ ဘွဲ့တံဆိပ်တော် နှင့် မဟာသံဃရာဇာ သာသနာပိုင် ဆရာတော်ဘုရားကြီးသည် ချီးမြှင့်အပ်သော ၄- မြို့ ဂိုဏ်းချုပ်၊ မြစ်ကွေ့ခရိုင် သုဓမ္မာဝင် ကျွန်းရွာတောရ ဆရာတော်ဟူသော ဘွဲ့တံဆိပ်တော်၊ ဤသုံးတန်သော ဘွဲ့တံဆိပ်ကို အလှူတော်ခံရသော ကျွန်းရွာတောရ ဆရာတော် ဦးအဂ္ဂဝံသပိုင် ကျောက်ဆောက်ကျွန်းရွာ ကျောင်းတိုက်ထဲတွင် အောက်ပုံစံပါ နယ်လေးရပ် သတ်မှတ်လျက်ရှိသော ကျောင်း,ဝတ္ထုကံ မြေပေါ်တွင် ရဟန်းသံဃာတော် အရှင်မြတ်များ ဥပုသ်သီတင်း လပြည့် လကွယ် စသော နေ့များ၌ ကျင့်သုံး ဆောက်တည် ကံကြီး ကံငယ် ပြုလုပ်ရန် သိမ်သမုတ် လှူဒါန်းလိုပါကြောင်း၊ အထက်ပါ ကျွန်းရွာတောရ ဆရာတော် ဦးအဂ္ဂဝံသကလည်း သဘောတူ ပါကြောင်း။ အဆိုပါ နယ် လေးရပ် သတ်မှတ်လျက်ရှိသော ဝတ္ထုကံ အလျား အနံလေး ထောင့် ပေ(၂၅) ပေခန့်ကို သာသနာမှု သာသနာရေးအတွက် ဝိသုံဂါမ မြေစား ပေးသနားတော် မူပါမည့်အကြောင်း၊ ဘုရင်ခံမင်း အမိန့်တော်ကို အလိုရှိပါကြောင်း ရှိခိုးအစီရင်တော်ခံပါသည်ဘုရား။
မောင်ချစ်ပေါ
ကျောက်ဆောက်ကျွန်းရွာ-စာရေးကြီး