ပျော်ရွှင်ဖွယ် မိသားစု (ဆရာ)
သင်ခန်းစာ (၂၁)
ပျော်ရွှင်ဖွယ် မိသားစု
သင်ယူမှု ဦးတည်ချက် ။ ။ မိမိအား ပြုစုစောင့်ရှောက်သောလူကြီးမိဘများ၊ မိသားစုဝင်များကို ရိုသေလေးစားစွာ ပြုမူဆက်ဆံတတ်စေရန်။
စာသင်ချိန် (၁) ။ ။ ၃ဝ မိနစ်
သင်ထောက်ကူပစ္စည်း ။ ။ မိသားစုအကြောင်း။
သင်ယူမှုလုပ်ငန်းစဉ်
֍ဆရာက “သားတို့၊ သမီးတို့ အိမ်မှာ ဘယ်သူတွေ ရှိသလဲ” ဟုမေးပါ။
֍ဆရာက သင်ပုန်းတွင် အောက်ပါစာလုံးများကို နေရာချဲ့၍ ရေးပါ။ စာလုံးတစ်ခုရေးတိုင်း စာလုံးအမည်ကို ဖတ်ပြပြီး ကလေးများအား လိုက်၍ ရွတ်ဆိုပါစေ။
| အဖေ | အဘိုး | ဘကြီး | အဘွား | အမေ |
| မောင်လေး | အစ်မ | အစ်ကို | ညီလေး | ကြီးဒေါ် |
| ညီမလေး | အဒေါ် | ဦးလေး |
֍ထို့နောက် ကလေးများအား သင်ပုန်းရှိ အမည်များမှာ အိမ်တစ်အိမ်တွင် အတူနေလေ့ ရှိသည့် မိသားစုဝင်များ၏ အမည်များဖြစ်ကြောင်းနှင့် တစ်ဦးစီ အတန်းရှေ့ထွက်၍ မိမိနှင့်အတူ နေထိုင်သော ကြိုက်ရာအမည်ကို ဝိုင်းပြပြီး ထိုသူ၏အကြောင်းကို ပြောပြရမည် ဖြစ်ကြောင်း ညွှန်ကြားပါ။
֍ဆရာက နမူနာတစ်ခုလုပ်ပြပါ။
ဥပမာ - ဆရာ့မှာ ညီမလေးရှိတယ်။ (ဝိုင်းပြပါ။)
သူ့နာမည်က ...
သူက ပုံပြင်ဇာတ်လမ်းတွေကြိုက်တယ် .... စသည်။
֍ကလေး ၄/၅ ဦးခန့် ပါဝင်ပြီးပါက အောက်ပါမေးခွန်းများ မေးပါ။
-သားတို့၊ သမီးတို့နဲ့ အတူနေတဲ့သူတွေက သားတို့၊ သမီးတို့ကို ဘာတွေ လုပ်ပေးသလဲ။
-ထမင်းဘယ်သူချက်သလဲ။
-ရေဘယ်သူခပ်သလဲ။ ပန်းကန်ဘယ်သူဆေးသလဲ။
-အဝတ်ဘယ်သူလျှော်ပေးသလဲ။
-ဘယ်သူ မီးပူတိုက်ပေးသလဲ။
-မိသားစုဝင်တွေနဲ့ စကားတွေ ပြောရရင်၊ ကစားရရင်၊ အတူထမင်းစားရရင်၊ လျှောက် လည်ရရင် စိတ်ထဲမှာ ဘယ်လိုနေသလဲ။
֍မိသားစုဝင်များ မရှိပါက အခက်အခဲများရှိနိုင်ကြောင်း ပေါ်လွင်စေရန် အောက်ပါ မေးခွန်းများ ဆက်မေးပါ။
-အိမ်မှာ ထမင်းချက်ပေးမယ့်သူ မရှိရင် သားတို့၊ သမီးတို့ ဘာဖြစ်မလဲ။
-အိမ်မှာ ရေခပ်ပေးမယ့်သူ မရှိရင် သားတို့၊ သမီးတို့ ဘာဖြစ်မလဲ။
-အိမ်မှာ အဝတ်လျှော်ပေးမယ့်သူ မရှိရင် သားတို့၊ သမီးတို့ ဘာဖြစ်မလဲ။
-အိမ်မှာ ပန်းကန်ဆေးပေးမယ့်သူ မရှိရင် သားတို့၊ သမီးတို့ ဘာဖြစ်မလဲ။
-ဒါဆိုရင် ထမင်းချက်ပေးတဲ့ သူ (မေမေ) ကို ဘာပြောကြမလဲ။
(ကျေးဇူးတင်ပါတယ်... ဟု ပြောလာသည်အထိ မေးပါ။)
֍ထိုနည်းအတိုင်း အခြားဆောင်ရွက်မှုများအတွက် ဆက်မေးပါ။
စာသင်ချိန် (၂)
သင်ထောက်ကူပစ္စည်း ။ ။ သရုပ်ဆောင်ခြင်း။
သင်ယူမှုလုပ်ငန်းစဉ်
֍ကလေးများကို ပြိုင်ပွဲပြုလုပ်၍ အောက်ပါခေါင်းစဉ်များကို သရုပ်ဆောင်ကြပါစေ။
-“နေမကောင်းဖြစ်နေတဲ့အဘွားကို ပြုစုနေပုံ”
-“ညအိပ်ရာဝင်ခါနီးရင် ဖေဖေနဲ့ မေမေကို ကန်တော့နေပုံ”
-“မောင်လေးက ငိုနေရင် ချော့ပြီးမုန့်ကျွေးနေပုံ”
-“မေမေက ထမင်းချက်နေရင် ဝိုင်းကူညီနေပုံ” စသည်ဖြင့်။
֍ကလေးများကို သင့်လျော်သလို အုပ်စုဖွဲ့၍ “ပိုကောင်းအောင်လုပ်နိုင်တဲ့အုပ်စုက နိုင် တယ်”ဟုပြော၍ သရုပ်ဆောင်ကြပါစေ။
စာသင်ချိန် (၃)
သင်ထောက်ကူပစ္စည်း ။ ။ မရှိ။
သင်ယူမှုလုပ်ငန်းစဉ်
֍“ကိုယ့်ကို ပျော်ရွှင်အောင်၊ ကျန်းမာအောင် ကူညီပြုစုပေးကြတဲ့ မိသားစုဝင်တွေကို ကျေးဇူးတင်ရမယ်။ ရိုရိုသေသေလည်း ပြောဆိုဆက်ဆံရမယ်။ အခု မိသားစုဝင်တွေကို ဘယ်လို ရိုရိုသေသေ ပြောဆိုဆက်ဆံကြမလဲဆိုတာ စဉ်းစားကြမယ်ဟု ပြောပါ။
֍ကလေးများကို သင့်လျော်သလို အုပ်စုဖွဲ့ပြီးလျှင် ရိုသေတဲ့အပြုအမူတွေက ဘာတွေလဲနဲ့ မရိုသေတဲ့အပြုအမူတွေက ဘာတွေလဲ”ဟုမေးပြီး ဆွေးနွေးကြပါစေ။
֍အုပ်စုတွင်းဆွေးနွေးပြီးပါက ပြန်လည်ပြောပြကြပါစေ။
စာသင်ချိန် (၄)
သင်ထောက်ကူပစ္စည်း ။ ။ မိသားစု ကဗျာ။
သင်ယူမှုလုပ်ငန်းစဉ်
֍ဆရာက တစ်နေ့တာအတွင်း ကလေးများ၏ လှုပ်ရှားမှုကို ပြောပြပါ။ ကလေးများအား ထိုလှုပ်ရှားမှုသည် မိမိတို့ ပြုလုပ်မည့် အပြုအမူဖြစ်ပါက မတ်တတ်ရပ်ပြရန် ညွှန်ကြားပါ။
ဥပမာ - ဒီနေ့ အိပ်ရာစောစောထမယ်။ (အိပ်ရာစောစောထချင်သော ကလေးများ မတ်တတ်ရပ်ပါ။)
-ဘုရားရှိခိုးမယ်။
-ဘိုးဘိုး၊ ဘွားဘွားတွေကို ရှိခိုးကန်တော့မယ်။
-မိဘတွေကို ကူညီမယ်။
-မောင်လေး/ညီမလေးတွေကို ကူထိန်းပေးမယ် စသည်ဖြင့်။
֍ထိုနည်းအတိုင်း ထလိုက်၊ ထိုင်လိုက် ဖြစ်နေစေရန် ဆောင်ရွက်ပါ။
֍နောက်ဆုံးတွင် အောက်ပါကဗျာကို ရွတ်ဆိုပါ။
မိသားစု
အမေကြီးက ထမင်းချက်၊
တို့မိသားစု တွက်။
ဖေကြီးဝတ်တက် အမျှဝေသံ၊
သာဓုခေါ်ရပြန်။
စာအံသံ ဆူညံသွား၊
ညီပု စာကြိုးစား။
ဈေးသွားတော့မယ့် မမဟန်၊
နေ့စဉ် အချိန်မှန်။
အပြန်အလှန် ကျေးဇူးပြု၊
ငါတို့ မိသားစု။