စိတ်ကောင်းထားကြမယ်
သင်ခန်းစာ (၃၃)
စိတ်ကောင်းထားကြမယ်
[edit]စိတ်ထားမကောင်းသော ငှက်မ
ကြက်တူရွေးများသည် တောအုပ်တစ်ခုတွင် စုပေါင်းနေထိုင်ကြသည်။
လမ်းပေါ်တွင် ကျကျန်ခဲ့သော စပါးစေ့၊ ပဲစေ့များကို ပျော်ပျော်ပါးပါး စားသောက်လေ့ရှိကြသည်။
ကြက်တူရွေးမကြီးတစ်ကောင်သည် ပျော်ပျော်ပါးပါး စားနေကြသော ၊ အခြားကြက်တူရွေးများကို ကြည့်၍ မကျေမနပ် ဖြစ်နေသည်။ စားစရာများကို သူ တစ်ကောင်တည်း စားရန် ကြံစည်နေသည်။
“လမ်းမပေါ်မှာ အန္တရာယ်ရှိတယ်၊ မသွားကြနဲ့”ဟု မဟုတ်မမှန် ပြော၏။ အခြားကြက်တူရွေးများ မလာရဲတော့သဖြင့် သူတစ်ကောင်တည်း စားနေခဲ့လေသည်။
စပါးစေ့များကို လောဘတကြီး စားနေသော ကြက်တူရွေးမကြီးသည် လှည်းကြိတ်ခံရပြီး သေဆုံးသွားခဲ့လေသည်။
မနာလိုခြင်း ကင်းကြစေ
[edit]သူလိုအပ်တာ ကိုယ်ကပေးလို့၊
ကူညီပေးဖို့ တို့တစ်တွေ။
စိတ်ထားကောင်းကို ထူထောင်သွားလို့၊
ဖြူအောင်ထားဖို့ အမြဲပေ။
ကိုယ့်ထက်သာရင် သူငယ်ချင်းတို့၊
မနာလိုခြင်း ကင်းကြစေ။
ဝန်တိုစိတ်များ သတိထား၊
ရှောင်ရှားကြမယ်လေ။
အဲဒါမှ တို့လူငယ်များ
စိတ်ထားမြတ်မယ်လေ။ ။