བཙན་པོ་རིམ་བྱུང་གི་ལོ་རྒྱུས།/ལེའུ་བརྒྱད་པ།

←ལེའུ་བདུན་པ།

བཙན་པོ་རིམ་བྱུང་གི་ལོ་རྒྱུས། ལེའུ་བརྒྱད་པ།

ལེའུ་དགུ་པ།→

366 ༇ བཙན་པོ་ཁྲི་སྲོང་ལྡེ་བརྩན་གྱྀ་རིང་ལ། །ཆོས་བཟང་སྲྀད་ཆེ་སྟེ། རྒྱལ་པོ་ནྀ་གནམ་གཉྀས་ཀྱི་བར་ཡུལ་དུ་

367 བརྣམ་ཞྀང་། །འགྲེང་དུད་གཉིས་ཀྱི་རྗེ་དང་བདག་མཛད་པ་འྀ་གཙུག་ལག་ཆེན་པོ་། མྱྀ་འི་དཔེར་རུང་བར་མཛད་དྰོ། །

368 ལེགས་ཀྱི་བྱ་དགའ་ནྀ་རངས་པར་བྱིན། ཉེས་ཀྱྀ་ཆད་པ་ནྀ་དམིགས་སུ་ཕོག་པར་མཛད་དོ། །འཛངས་པ་དང་དཔའ་

369 བོ་འི་རི་མོ་བསྐྱེད་དོ། །ངན་པ་མ་རབས་ནྀ་ཆིས(ཚིས་)ཀྱིས་གསོས་སོའ། །དེ་འྀ་ཚེ་བློན་པོ་སྲིད་བྱེད་པ་འྀ་རྣམས་ཀྱང།

370 བློ་མཐུན་གྲོས་གཆིག་སྟེ། །པྱྀ་འི་དགྲའ་བྱུང་བ་ལ། ཐབས་དང་ཡེ་མྱིག་ཆེར་བྱེད། ནང་གི་ཆོས་བྱ་བ་ལ་དྲང་ཞྀང་འགྲུས་

371 སུ་བྱེད། །འཕྲག་མྱྀ་དོག། །ཉེས་མྱྀ་བྱེད། །དཔའ་འཛངས་གཉྀས་ནྀ་རླག(རློག)་པ་བཞིན་བཙལ་ཏེ། འཛངས་པ་དཔྰ

372 བོ་ནི་ཆེ་ས་ཆུང་སར་བསྟོད་ནས་། ས་ས་ཡུལ་ཡུལ་དུ་བཀོད་དོ། །འབངས་འོག་མ་དལ་ཞྀང་ཡུལ་ན་འཁོད་པ

373 ནྀ་། །འཛངས་དྲང་གཉྀས་སློབ་བྰོ། །དམག་མྱི་སོ་ལ་འཁོད་པ་ནྀ་དཔའ་བ་འྀ་ཐབས་དང་། རྩལ་སློབ་བོ། །བློ་སྒྱུ་

374 གཉྀས་ཀྱི་རླབས་ཆེད་པོས་ཐུབ་པས། །སྡང་དགྲའ་སྡོ་བ་ཡང་མྱེད་དོ་། །སངས་རྒྱས་ཀྱྀ་ཆོས་བླ་ན་མྱེད་པ་བརྙེསྟེ་

375 མཛད་ནས། །དབུས་མཐའ་ཀུན་ཏུ་གཙུག་ལག་ཁང་བརྩིགས་ཏེ་། ཆོས་བཙུགས་ནས། ཐམས་ཤད་ཀྱང་སྙིང་

376 རྗེ་ལ་ཞུགས་ཤྀང་དྲན་བས་སྐྱེ་ཤི་ལས་བསྒྲལ་ཏེ། གཡུང་དྲུང་དུ་བཏོན་ཏོ། །རྗེ་བློན་མོལ་ཏེ་། ཞང་མཆིམྶ

377 རྒྱལ་ཟྀགས་ལ་སྩོགས་པས་རྒྱ་འྀ་མཁར་ཀིང་ཤྀ་ཕབ་སྟེ། རྒྱ་རྗེ་གྭང་བུ་ཧྭང་ཏེ་བསྐོས་སོ། །ལེགས་པ་ཞིན་

378 པ་འི་བྱ་དགའ་། གཡུ་འྀ་ཡི་གེ་ཆུ་ངུ་ནམ་ནམ་ཞར་ཞར་བྱིན་ནོ། །དབའས་སྐྱེས་བཟང་སྟག་སྣང་གིས། །

379 རྒྱ་འྀ་དམག་པོན་ཧོན་ཛེ་སངས་དང་། འགུའ་ལོག་སྒང་དུ་གཡུལ་སྤྲད་ནས། རྒྱ་མང་པོ་བཐུངས་སྟེ།

380 འགུའ་ལོག་རྒྱ་དུར་དུ་བཏགསྰོ། །སྦྲང་རྒྱལ་སྒྲ་ལེག་ཟིགས་ཀྱིས། སྟོད་ཕྱོགས་སུ་དྲངསྟེ། མུ་ཡུངསུ

381 གཡུལ་བཟློག་ནས། འུང་གྀ་རྒྱལ་པོ་ནུང་ཀོག་མན་ཆད་འབངས་སུ་བསྡུས། དབའས་བཙན་བཞེར་མདོ་

382 ལོད་ལ་སྩོགས་པས། མཁར་ཚན་ཡན་ཆད་དུ་དྲངསྟེ། མཁར་ཅུ་པ་བརྒྱད་ཕབ་ནས། དོར་པོ་བཏོན་ཏེ་

383 འབངས་སུ་བཞེས་སོ། །ཆབ་སྲྀད་ཆེ་སྟེ་ལོང་ཤན་ལ་རྒྱུད་ཡན་ཆད། །པྱག་དུ་བཞེས་ནས། མཐོང་ཁྱབ་

384 ཁྲྀ་སྡེ་ལྔ་བཙུགས། བདེ་བློན་ཁམས་ཆེན་པོ་གཆིག་གསར་དུ་བསྐྱེད་དོ། །བློན་ཆེ་སྣང་བཞེར་ཟླ་བརྩན་

385 འཛངས་ཤྀང་མཁས་ལ། བཀྲའ་ཤྀས་ཤིང་ཁ་དྲོ་བས། ནིར་བུ་རྀན་པོ་ཆེ་འི་ཡི་གེ་སྩལ་ཏོ། །འབངས་

386 ཀྱྀ་ནང་ན་། དོར་ཏེ་པྱུག་ཚམས་སྟེ་འཛོམ་དཔའ་བ་འྀ་མཚན་མར། སྟགྀ་ཐོག་བུ་སྩལ་ཏོ། །བཙན་

387 པོ་འི་ཞ་སྔོ་ནས། ཐུགས་སྒམ་པ་འྀ་རླབས་དང་། དབུ་རྨོག་བརྩན་པོ་འི་བྱིན་ཀྱིས། །ཉི་ངོག་རྒྱལ་

388 པོ་གཞན་དཔྱའ་ཕབ་པ་དང། རྒྱལ་པྲན་འབངས་སུ་བཀུག་པ་ལ་སྩོགས་པ་པྱིར། །ཆབ་སྲིད་མཐྰ་

389 བཞིར་བསྐྱེད། ནང་གྀ་བདེ་བ་ནྀ་སྙོམས་པར་མཛད་དེ། །བོད་འབངས་ཀྱི་ནང་ནས་ཞོ་ཤ་འབུལ་འབུལ་

390 བ་རྣམས་ཀྱང། ཡང་དག་པར་གཡུང་དྲུང་གྀ་བཀའ་དྲིན་མ་བྱིན་བ་མྱེད་དོ། །བཙན་པོ་འདྀ་ལས་ཆབ

391 སྲིད་ཆེ་བ། སྔོན་ཆད་གདུང་རབས་ཀྱིས་མཛད་པ་ལ་ནྀ་མ་བྱུང་ངོ། །རྒྱལ་པོ་འདྀ་འྀ་རིང་ལ་། འབྲོ་ཁྲི་གཟུའ་

392 རམ་ཤགས་ཀྱིས། སྟོད་ཕྱོགས་སུ་དྲངསྟེ། ལྀ་འབངས་སུ་བཀུག་ནས་དཔྱའ་ཕབ་བོ། །འུང་གྀ་འོག་

393 དུ་མྱྭ་དཀར་པོ་འབངས་སུ་མངའ་བ་ལས། གློ་བ་རྀངས་པ་འྀ་ཚེ་། དམག་ཕོན་འབྲོ་རམ་ཤགས། །

394 བཀའ་སྩལ་ནས། བྲག་རྩེད་ནོལ་ཐབས་བཀྱེ་བའི་ཚེ་། །འཇང་མང་པོ་བཀུམ་ནས། །སྤྱན་ཆེན་

395 པོ་ཉིང་རིམ་དང། སྣ་ལ་གཐོགས་པ་དང། དམངས་ཡན་ཆད་སུམ་བརྒྱའ་རྩ་བཅུ་གཉྀས་བཟུང་ནས།

396 འཇང་རྗེ་གོལ་གྱིས་ཀྱང་པྱག་འཚལ་ཏེ། འབངས་རྣལ་མར་བཀུག་ནས། དཔྱའ་ཕབ་སྟེ་སྔ་མཁོ་བཞིན་དུ་

397 བཀོད་དོ། །

(འདི་མན་གྱི་དུམ་བུ་དེ་སྲོང་བཙན་སྒམ་པོའི་མཛད་པ་ཡིན་ཞིང་། འདིར་བཅུག་ནོར་བ་འདྲ)

398 ༇ རྒྱལ་འདྀ་འི་རིང་ལ་། །ཞང་ཞུང་ལྡེ་བུ། །གཉེན་གྱྀ་ཡང་དོ། །འཐབ་ཀྱྀ་ཡང་སྐལ་ཏེ། །ཞང་ཞུང་བདག་དུའ། །

399 ། །བཙན་མོ་སད་མར་ཀར། །ལྀག་མྱི་རྷྱ་ལ་ཆབ་སྲྀད་ལ་གཤེགས་སོ། །སྔ་ན་ཤུད་ཀེ་ཟ་རྩལ་ཐྀང་ཤགས་མཆིས་སྟེ། །བཙན་མོ་དང་ནྀ་མྱི་

400 བནལ(མནལ)བར། ལྀག་མྱི་རྷྱ་ལ་ཤུད་ཀེ་ཟ་རྩལ་ཏིང་ཤགས་གནང་སྟེ། །བཙན་མོ་ཡང་ལྀག་མྱི་རྷྱ་འྀ་སོ་ནམ་དང་བུ་སྲྀད་མྱི་མཛད་ཆིང་ལོག་

401 ཤྀག་ན་བཞུགས་པར། །འདིར་དྲལ་གྱྀ་སྙན་དུ་གདའ་སྟེ། །བཙན་མོ་དེ་ལྟར་ལོག་པ་བགྱྀས་ན། །ཆབ་སྲིད་ཀྱྀ་དཀྲུགས་མར་འགྱུར་བས་

402 དེ་ལྟེ་བུ་མ་བགྱིད་པར། །ལྀག་མྱི་རྷྱ་འྀ་སོ་ནམ་དང་བུ་སྲིད་ཟུང་ཤིག་ཆེས་། །སྤུག་གྱིམ་བརྩན་རྨང་ཅུང་བཀའ་སྩལ་ཏེ། །མཁར་

403 ཁྱུང་ལུང་དུ་མཆིས་ན་། །བཙན་མོ་མྱི་བཞུགས་ཏེ་། །ཆབ་ཉ་ལ་རོལ་ཞིང་། །མཚོ་མ་པང་དུ་གཤེགས་ནས། །རྨང་ཅུང་མ་པང་དུ

404 མཆིསཏེ། །བཙན་མོ་ཞ་སྔར་པྱག་བགྱྀས་ན། །བཙན་མོ་ཞལ་ནས། །བཙན་པོ་དྲལ་གྱྀ་ཞ་སྔ་ནས། །ཐུགས་བདེ་འམ་མྱི་བདེ་

405 ཞེས་བཀའ་སྩལ་ཏོ། །ཐུགས་བདེ་ཞེས་གསོལ་ཏོ། །རྨང་ཅུང་གློ་བ་བདེ་འམ་མྱི་བདེ་ཞེས་རྨས་ན། །གློ་བ་བདེ་ཞེས་གསོལ་ཏོ། །

406 འུང་གྀ་རྗེས་ལ། བཙན་པོ་དྲལ་གྱིས་བཀའ་འདྀ་ཞེས་སྩལ་ཏོ་ཞེས་གསོལ་ཏོ། །བཙན་མོ་ཞལ་ནས། །རྨང་ཅུང་། བཙན་པོ་དྲལ

407 གྱི་ཞལ་དང་འདྲའ་སྟེ་། མགྲོན་ཀྱིས་པྱག་ལ་འཚོལ་ཆིག་ཆེས་པྱག་ལ་སྩལ་ནས། །བཙན་མོས་། མགུར་བླངས་པའ། །

408 ཡུལ་གྱི་(ནི)་སྐལ་པོག་པ་། ཁྱུང་ལུང་ནྀ་རྔུལ་མཁར་ཞིག་། །མུ་སུ་ནྀ་གཞན་ན་རེ་། པྱི་བལྟས་ནྀ་ངམ་དང་བྲག། ནང་བལྟས་ནྀ་གསེར་དང་དབྱིག།

409 བདགྀ་ནི་གཡར་སྔ་རུ། མཆིས་སུ་ནི་མ་ཐོ་འམ་། སྐྱ་མོ་ནི་བསེང་བསེང་མོ། བྲན་གྱི་ནྀ་སྐལ་པོག་པ་། གུ་གེ་ནྀ་རྐང་པྲན་ཞིག།

410 འཁོལ་དུ་ནྀ་མ་ཐོ་འམ། །གུ་གེ་ནྀ་བདྲིས་ཤིང་སྡང། །ཟས་ཀྱྀ་ནི་སྐལ་པོག་པ་། ཉ་དང་ནྀ་གྲོ་མཆིས་ཏེ། འཚལ་དུ་ནི་མ་ཐོ་འམ། །

411 ཉ་གྲོ་ནྀ་བཆའ་ཞིང་ཁའ། །པྱུགས་ཀྱི་ནྀ་སྐལ་པོག་པ་། །ཤ་དང་ནྀ་རྐྱང་མཆིས་སྟེ། །འཚོ་རུ་ནྀ་མ་ཐོ་འམ། །ཤ་རྐྱང་

412 ནི་བཙའ་ཞིང་རྒོད། །ཀྱེ་བྱང་འབྲོག་ནི་ཡ་བྀ་ན་། །ཕོ་མའི་ནྀ་འབྲོང་གཆིག་པ་། །བྱང་འབྲོག་ནི་འབྲོང་དགུམ་ན་། །པུ་ནས་

413 ནྀ་ཁུས་འདེབས་པའ། །ལྡོང་ཐོང་ནྀ་འཕན་གྱིས་ཐོབ། །མདའ་ནས་ནྀ་གཡབ་འདོར་བ་སྐྱི་འྀ་ནྀ་ཤ་དང་སྤུག། །དབུས་

414 ནས་ནི་དཔོར་འཕེན་བ། །ཡར་ཀྱྀ་ནི་ལྷོ་དང་རྔེགས། །པུ་ནས་ནྀ་ཁུས་བཏབ་ཆིང། །མདའ་ནས་ནྀ་གཡབ་བོར་ནས། །

415 དེ་འི་ནི་བར་བར་དུ་། ཕོ་མ་འྀ་ནི་(འབྲོང)བཀཾུ་ཞིང། །ཐུར་ཐུར་ནྀ་པྱིང་བ་འྀ་བཅུད། །རུ་རྒྱུས་ནྀ་ལྡོང་ཏོང་སྩལད། ཤ་ལྐོ་ནི་ལྷེ(ལྷོ)རྔེགས་

416 སྩལད། ལྭོ་ཤོག་ནྀ་ཤ་སྤུག་སྩལད། །མཆིལ་པ་འྀ་ནི་རུ་སྲུབས་ལ། སྟགི་ནྀ་ཤ་བཏགས་ཤིང་། གཡས་སུ་ནྀ་མ་ཡོ་ཤིག།

417 གཡོན་དུ་ནྀ་མ་རྡལ་ཆིག། །གཡས་སུ་ནྀ་ཡོ་བ་ན། སོ་བྱ་ནྀ་གྲེ་བོ་ཆུང། །གཡོན་དུ་ནྀ་རྡལ་བ་ན། སྲམ་བུ་ནྀ་གོང་ཏེ་དངུལ། །

418 མར་གྱྀ་ནི་ཆང་ཆང་ལ་གྱུར(ཁྱུར)གྱིས་ནྀ་མ་བནབས་ན་། །སང་པྱི་ནི་གནངས་སླད་ན་སྲམ་གྱིས་ནྀ་འཚལ་ཏ་རེ། །ཉ་མོ་ནི་མཐོང་

419 རྒོལ་ཞིག་། །མཐོང་རྒོལ་ནི་མཐོང་ལ་རྒོལ། མཆིལ་པ་འྀ་ནི་སྣང་ཐོགས་ཤིག། སྣང་ཐོགས་ནྀ་སྣང་ལ་ཐོགས། །རིང་གི་

420 ནྀ་གོད(གོང)ལན་དང། ས་འྀ་ནི་ཤེལ་མྱྀག་གཉིས་ག་མྱྀ་ནི་གྱྀ་གོ་ལྟ། །ཇེ་ཉེ་ནྀ་ཇེ་ཉེ་ན་། ཡར་པ་ནྀ་དགུང་དང་ཉེ་། དགུང་སྐར་ནྀ་སི་

421 ལྀ་ལི། །རྗེ་ཉེ་(ནི)་ཇེ་ཉེ་ན་། གླ་སྐར་ནྀ་བྲག་དང་ཉེ་། བྲག་དཀར་ནི་སི་ལི་ལི། །སྔུར་བ་ནྀ་ཆབ་དང་ཉེ་། གྱུར་སྲམ་ནྀ་པྱོ་ལ་ལའ། །

422 ཉེན་ཀར་ནྀ་དོག་དང་ཉེ་། འབྲས་དྲུག་ནི་སི་ལྀ་ལི་། །མལ་ཏྲོ་ནྀ་ཀླུམ་དང་ཉེ་། སྐྱེ་བསེར་ནི་སྤུ་རུ་རུ། །རྗེ་ཉེ་ནི་ཇེ་

423 ཉེ་ན། ར་ཉེ་ནི་ཤུག་པ་ཐུ། །ཡར་གྱི་ནི་བྱེ་མ་ལ་། ལྷན་ལྷན་ནྀ་འགྲོས་མོ་འདི། །སྐྱི་འི་ནྀ་པུར་ཐབསུ་། ཟ་དུར་ནྀ་བཏབ

424 ཀྱང་རུང་ཞེས། མགུར་བླངས་པ་འྀ་རྗེས་ལ། རྨང་ཅུང་མཆིད་ཕྱག་བགྱིས་པ་ལས། །བཙན་པོ་དྲལ་ལ་། བཀའ་ལན་ཡྀ་གེར་

425 གསོལ་བ་ནྀ་ཆང་མ་མཆིསོ། བཙན་པོ་དྲལ་གྱི་ཞ་ལྔ་ནས་ཐུགས་བདེ་ཞིང་བཞུགས་པ་གློ་བ་དགའ་ཞིང་མཆིས་སོ།

426 བཙན་པོས་བཀའ་སྩལ་པ་ནྀ་། གུམ་ཆད་གཉིས། རྔོ་ཇྀ་ཐོག་གིས་འཚལ་ཞིང་མཆིས་སོ། །བཙན་པོ་འི་པྱག་དུ་

427 འདྀ་པུལ་ཆིག་ཆེས་། ཞུ་གཡག་ཞུ་གཆིག་པྱག་རྒྱས་བཏབ་ནས་བསྐུར་རོ། །གྱིམ་བརྩན་རྨང་ཅུང་སླར་། །

428 བཙན་པོ་སྤྱན་སྔར་མཆིས་ནས། །བཙན་མོས་བཀའ་ལན་ཡྀ་གེར་གསོལ་པ་ནྀ་ཆང་མ་མཆིས། །མགུར་བླངས་པ་

429 འྀ་ཚིག་ནི་འདྀ་ཞེས་མཆི་། པྱག་རྒྱས་བཏབ་སྟེ་སྐུར་བ་འདྀ་ལགས་ཤེས་གསོལ་པ་ལས། །ཞུ་པྱག་རྒྱ་པྱེ་སྟེ།

430 གཟིགས་ན། གཡུ་རྙིང་བཟང་པོ་སུམ་ཅུ་ཙམ་ཞིག་བྱུང་སྟེ། །བཙན་པོ་དགོངས་དགོངས་ནས། ཡུ་བུས་ལིག་

431 མྱྀ་རྷྱ་ལ་རྒོལ་ཕོད་ན་ནྀ་གཡུ་ཐོགས་ཤིག། །རྒོལ་མ་ཕོད་ན་ནྀ་བུད་མྱེད་དང་མཚུངས་ཞུ་གྱོན་ཆིག་ཟེར་

432 བ་ལྟ་ཞེས་བཀའ་སྩལ་ནས། །རྗེ་བློན་བློད་བློད་དེ་། །ལྀག་མྱི་རྷྱ་འྀ་སྲྀད་བརླག་གོ་། །

433 ༇ རྒྱལ་འདྀ་འི་རིང་ལ། །ཞང་ཞུང་གྀ་རྒྱལ་པོ་ལ་དྲངས་སྟེ་། ཆབ་སྲིད་མཛད་ནས། །ཞང་ཞུང་གྀ་རྒྱལ་པོ་ལྀག་མྱི་རྷྱ་སྲིད་བརླག་སྟེ། །

434 ཞང་ཞུང་ཐམས་ཆད་འབངས་སུ་བཀུག་གོ། །འུང་གྀ་རྗེས་ལ་། །བཙན་པོ་རྗེས་འབངས་དགྱེས་སྐྱེམས་སྟོན་མོ་གསོལ་ཏེ། །

435 བཙན་པོ་ཁྲི་སྲོང་བརྩན་གྱིས་མགུར་བླངས་པ། །ཀྱེ་རྗེ་འི་ནྀ་མཚན་བ་འདི། །ཁྲྀ་འི་ནྀ་སྲོང་བརྩན་ཞིག། །བློན་གྱྀ་ནི་མྱིང་བ་

436 འདྀ། །སྟོང་རྩན་ནི་ཡུལ་ཟུང་ཞིག། །ཆིབས་ཀྱྀ་ནི་མྱིང་བ་འདྀ། །རྔུལ་བུ་ནྀ་གཙང་གཙང་ལྟ(རྟ)། །གཙང་གཙང་ནི་ཡང་ཡང་ལྟ།

437 ཡུ་བུ་ནྀ་རྗེ་དང་བློན་། །ཡར་མོ་ནི་ཆུ་ཐུངས་ཀྱིས་། །མདོ་ནས་ནྀ་རྩང་དུ་བསྲིང། །ཡར་མོ་ནྀ་ཞེང་ཆུངས་ཀྱིས་ལྷོ་ནས་ནྀ་བྱང་

438 དུ་བསྐྱེད། །མ་བྲུན་ནྀ་མཐའ་བཞི་རྒྱལ་། །ཡུ་བུ་ནྀ་རྗེ་དང་བློན་། །རྗེ་འིས་ནྀ་འབངས་མ་གཏང་། རྗེ་འིས་ནྀ་འབངས་བཏང་

439 ན་། གནམ་མཐའྀ་ནི་སྲུང་དུ་རུང་། །འབངས་ཀྱིས་ནྀ་རྗེ་མ་གཏང་། འབངས་ཀྱྀས་ནི་རྗེ་བཏང་ན། ངས་པོ་ནི་རྨད་དུ་རུང། །མགུར་

440 དེ་ཞེས་གསུངས་སོ། །མགུར་གྱི་ལན། །བློན་སྟོང་རྩན་གྱིས་གསོལ་པ། རྗེ་འྀས་ནི་བཀའ་སྩལ་པ་གཞའ་པྱྀ་ནི་ཡུན་ཀྱི་

441 སྲྀང་། བྱ་འྀས་ནི་ཞུ་པུབ་པ། ལ་པྱི་ནྀ་གདང་སུ་དྲོ་། །གློ་བོ་ནི་མང་(མར)ཀུ་རྒྱ། ནམས་ཀྱང་ནི་ཡར་མྱི་པོ། གད(གར)་ཀྱྀ་ནི་གསེར་པོ་ཆེ། །

442 ནམས་ཀྱང་ནྀ་པྱིང་བ་འྀ་བཅུད། རྗེ་འིས་ནྀ་འབངས་མ་གཏང་། །རྗེ་འྀས་ནི་འབངས་བཏང་ན། བྱ་བང་ནྀ་ཐང་ལ་ཐས། འབངས་ཀྱིས་

443 ནྀ་རྗེ་མ་གཏང་། འབངས་ཀྱིས་ནྀ་རྗེ་བཏང་ན། འཇོན་མོ་ནི་ཤིང་ཀ་རེབས། །སང་པྱི་ནི་གནངས་སླད་ན་ནམ་ནམ་ནྀ་ཞ་ཞ

444 རུ(ཞར)། །རི་གང་ནྀ་ཁུས་བཏབ་ཀྱང་། བྱ་པུ་ནི་ཁུས་མ་གདབ། ལུང་གང་ནྀ་རྟས་བཆགས་ཀྱང། གསེར་གད་ནྀ་རྟས་མ་བཆག། །

445 མོལ་མོལ་ནྀ་འཆམ་འཆམ་ན་། བཀའ་མཆིད་ནྀ་མྱྀས་མྱྀ་མཉན། །འཆམ་འཆམ་ནྀ་འདྲུལ་འདྲུལ་ན་། ཆགས་

446 ལམ་ནྀ་ཆུས་མྱི་སྦང་། ཀླུ་དེ་ཞེས་བླངས་སོ། །བླ་ན་རྗེ་སྒམ་ན་། ཁྲི་སྲོང་བརྩན། འོག་ན་བློན་འཛངས་ན་སྟོང་རྩན་ཡུལ་ཟུང།

447 རྗེ་འྀ་གནམ་རི་པྱྭ་འྀ་ལུགས། །བློན་པོ་ནི་ས་འྀ་ངམ་ལེན་གྱི་ཚུལ། །མངའ་ཐང་ཆེན་པོ་འི་རྐྱེན་དུ། ཇྀ་དང་ཇྀར་ལྡན་དེ། པྱི་འི

448 ཆབ་སྲིད་ནི་པྱོགས་བཞྀར་བསྐྱེད། །ནང་གྱྀ་ཁ་བསོ་ནི་མྱི་ཉམས་པར་ལྷུན་སྟུག། འབངས་མགོ་ནག་པོ་ཡང་མཐོ་དམན་ནྀ་

449 བསྙམས། དཔྱའ་སྒྱུ་ནྀ་བསྐྱུངས། དལདུ་ནྀ་མཆིས། སྟོན་དཔྱིད་ནྀ་བསྐྱལ། འཁོར་བར་ནྀ་སྤྱད། འདོད་པ་ནྀ་བྱིན།

450 གནོད་པ་ནྀ་པྱེ། བཙན་བ་ནྀ་བཅུགས། སྡོ་བ་ནི་སྨད། འཇིགས་པ་ནྀ་མནན། བདེན་པ་ནྀ་བསྙེན། འཛངས་པ་ནྀ་བསྟོད།

451 དཔའ་བོ་ནྀ་བཀུར། སྨོན་པར་ནྀ་བཀོལ། །ཆོས་བཟང་སྲྀད་མཐོ་སྟེ། །མྱྀ་ཡོངས་ཀྱིས་སྐྱིད་དོ། །བོད་ལ་སྔ་ན་ཡི་གེ་

452 མྱེད་པ་ཡང། །བཙན་པོ་འདི་འྀ་ཚེ་བྱུང་ནས། །བོད་ཀྱི་གཙུག་ལག་བཀའ་གྲིམས་ཆེད་པོ་དང། བློན་པོ་འི་རིམ་པ་དང། ཆེ་ཆུང་

453 གཉིས་ཀྱྀ་དབང་ཐང་དང་། ལེགས་པ་ཟིན་པ་འྀ་བྱ་དགའ་དང། ཉེ་ཡོ་བ་འི་ཆད་པ་དང། ཞིང་འབྲོག་གི་ཐུལ་ཀ་དང་དོར་ཀ་དང། སླུངས་ཀྱི་གོ་བར་བསྙམས་

454 པ་དང་། བྲེ་པུལ་དང། སྲང་ལ་སྩོགས་པ། བོད་ཀྱི་ཆོས་ཀྱི་གཞུང་བཟང་པོ་ཀུན། །བཙན་པོ་ཁྲི་སྲོང་བརྩན་གྱི་རིང་ལས་བྱུང་ངོ་། མྱི་ཡོངས་

455 ཀྱིས་བཀའ་དྲིན་དྲན་ཞིང་ཚོར་བས། །སྲོང་བརྩན་སྒམ་པོ་ཞེས་མཚན་གསོལ་ཏོ། །