یا الٰہی مجھ کو یہ کیا ہو گیا
یا الٰہی مجھ کو یہ کیا ہو گیا
دوستی کا تیری سودا ہو گیا
دوستی کیا ہم سری کا دھیان ہے
قید سے آزاد اتنا ہو گیا
کیسی آزادی اسیری چیز کیا
جب فنا رنگ تمنا ہو گیا
جب تمنا اور ڈر جاتا رہا
تو ہر اک شے سے مبرا ہو گیا
یوں مبرا ہو گئی جب کوئی ذات
بند پھر نغمہ صفت کا ہو گیا
جب ہوا اوصاف سے کوئی بری
عیب کیونکر اس میں پیدا ہو گیا
خود پرستی اس کو یا جو کچھ کہو
اب تو یہ عالم ہمارا ہو گیا
بے خودی نے محو حیرت کر دیا
آپ میں اپنا تماشا ہو گیا
جس کو دیکھا آپ ہی آیا نظر
رنگ اب کیفیؔ یہ اپنا ہو گیا
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse