ہے دل میں خیال گل رخسار کسی کا

by سراج اورنگ آبادی

ہے دل میں خیال گل رخسار کسی کا
داغوں سیں محبت کے ہے گل زار کسی کا

جاتا ہے مرا جان نپٹ پیاس لگی ہے
منگتا ہوں ذرا شربت دیدار کسی کا

سب پر ہے کرم مجھ پہ ستم کیا ہے دو رنگی
دل دار کسی کا ہے دل آزار کسی کا

زنجیر بھلی قید بھلی موت بھی جیوں تیوں
پن حق نہ کرے کس کوں گرفتار کسی کا

میں ہوں تو دوانہ پہ کسی زلف کا نئیں ہوں
واللہ کہ رکھتا نہیں یک تار کسی کا

یک دم تو ہم آغوش کرو اے گل خوبی
ہو جاؤں گا اب نئیں تو گلے ہار کسی کا

جھکتا ہے ذرا باد کے چلنے میں زمیں پر
نرگس ہے مگر باغ ہے بیمار کسی کا

لاتی ہے خبر یار کی موج دم شمشیر
کاری ہے مگر دل میں مرے وار کسی کا

ہر رات سراجؔ آتش غم میں نہ جلے کیوں
پروانۂ جاں سوز ہے بلہار کسی کا