ہک دردوں دل آباد رہے
ہک دردوں دل آباد رہے
بیا کُل شے توں آزاد رہے
ایں عاجز جِندڑی ساڈڑی تے
نِت سوہنیاں دا بیداد رہے
ایہیں سوہنے دے ناز نواز کنوں
رگ رگ وچ لکھ فریاد رہے
نِت عشق اولڑا سانول دا
بھولی دلڑی دا استاد رہے
ایہدے برکت یمن کلام کنوں
سبھ فہم فکر برباد رہے
دل نانگھیں دی تلوین اندر
کڈیں شاد کڈیں ناشاد رہے
سُن سوہنا سانول یار سجن
تیرا حُسن زیاد و زیاد رہے
مینوں سونہہ ہے تیڈے وسارے دی
ہکا رمز تیری نِت یاد رہے
بھج فارس ہند کنوں جوگی
نِت سالک عشق آباد رہے
|
This work was published before January 1, 1929, and is in the public domain worldwide because the author died at least 100 years ago. |