ہُن کیتم برہوں تنگ سائیں
ہُن کیتم برہوں تنگ سائیں
دل نال اساڈی جنگ سائیں
غمزے سخت اویڑے
جھیڑے کرن بکھیڑے
نہ کجھ ترس نہ سنگ سائیں
عشق مریلے لُٹی آں
ہُٹی آں، مُٹھی آں، کُٹھی آں
تن من چُور چورنگ سائیں
گزرے ویلے سُکھ دے
جی جُکھدے پیا ڈُکھدے
رگ رگ تے انگ انگ سائیں
درد اندوہ پُرانے
جُھردی جھور جھورانے
یار علم دِل سنگ سائیں
عشق علامت ظاہر
سُول کیتے تن لاغر
ساوا پیلا رنگ سائیں
نینہہ نرالی ڈاتے
ملی فرید براتے
گیا ناموس تے ننگ سائیں
|
This work was published before January 1, 1929, and is in the public domain worldwide because the author died at least 100 years ago. |