ہو چکی باغ میں بہار افسوس
Jump to navigation
Jump to search
ہو چکی باغ میں بہار افسوس
آہ اے بلبلو ہزار افسوس
قافلہ عمر کا ہے پا بہ رکاب
زیست کا کیا ہے اعتبار افسوس
مری راتوں کو دیکھ سوختگی
نہ کیا ایک دن بھی یار افسوس
شب سے پروانے کی لگن میں شمع
صبح تک روئی زار زار افسوس
سخت بے تابی سے کٹی کل رات
آج بھی دل ہے بے قرار افسوس
خال و خط کو سمجھ کے دانہ و دام
مرغ دل ہو گیا شکار افسوس
آہ دست جنوں سے اے ناصح
ہے گریبان تار تار افسوس
جان ہونٹوں پہ آ گئی ہم دم
لیکن اب تک پھرا نہ یار افسوس
عمر غفلت میں کٹ گئی ہے نصیرؔ
آہ افسوس صد ہزار افسوس
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse