ہم رہے یاں تلک ترے غم میں
ہم رہے یاں تلک ترے غم میں
کہ ترا غم سما گیا ہم میں
کیوں نہ ہو عشق حسن گندم گوں
میں بھی آخر ہوں نسل آدم میں
ہے عرق میں بھی اس کے نکہت عطر
گل کی بو آ گئی ہے شبنم میں
میرے اشکوں کے روبرو دریا
ہے بڑا فرق قطرہ و یم میں
جیسا جام جہاں نما ہے دل
سیر وہ کب ہے ساغر جم میں
دل کا ناسور دل کے ساتھ چلا
کیے مرہم تلاش مرہم میں
جو پھنسا پھر کبھی رہا نہ ہوا
ہے یہی پیچ زلف کے خم میں
نزع کے وقت بھی فریب رہا
وہ جو آیا دم آ گیا دم میں
اس میں بیم ہلاک اس میں ہلاک
ہے یہی فرق ہم میں اور غم میں
شمع سے رات یہ کہا میں نے
کہہ تو روتی ہے کس کے ماتم میں
بولی اے فخر عاشقان جہاں
کیا کہوں میں کہ دم نہیں دم میں
ہو گیا خاک جل کے پروانہ
رہی میں آہ بزم عالم میں
شب جو اک دوست اپنا یعنی دل
پھنس گیا اس کی زلف پر خم میں
اپنا کچھ بس نہ چل سکا لیکن
اشک بھر آئے چشم پر نم میں
تو چراغ مزار غیر رہا
ہم گھلے شمع ساں ترے غم میں
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse