ہرگز کبھی کسی سے نہ رکھنا دلا غرض
ہرگز کبھی کسی سے نہ رکھنا دلا غرض
جب کچھ غرض نہیں تو زمانے سے کیا غرض
پھیلا کے ہاتھ مفت میں ہوں گے ذلیل ہم
محروم تیرے در سے پھرے گی دعا غرض
دنیا میں کچھ تو روح کو اس جسم سے ہے کام
ملتا ہے ورنہ کون کسی سے بلا غرض
وصل و فراق و حسرت و امید سے کھلا
ہم راہ ہے ہر ایک بقا کے فنا غرض
اک پھر کے دیکھنے میں گئی سیکڑوں کی جاں
تیری ہر اک ادا میں بھری ہے جفا غرض
دیکھا تو تھا یہی سبب حسرت و الم
مجبور ہو کے ترک کیا مدعا غرض
کیونکر نہ روح و جسم سے ہو چند دن ملاپ
اس کو جدا غرض ہے تو اس کو جدا غرض
الزام تاکہ سر پہ کسی طرح کا نہ ہو
اے شادؔ ڈھونڈتی ہے بہانے قضا غرض
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse