کیوں کر نہ لائے رنگ گلستاں نئے نئے
کیوں کر نہ لائے رنگ گلستاں نئے نئے
گاتے ہیں راگ مرغ خوش الحاں نئے نئے
شاعر نئے نئے ہیں سخنداں نئے نئے
پیدا ہوئے ہیں اب تو غزل خواں نئے نئے
دلبر متاع دل کے ہیں خواہاں نئے نئے
کرتا ہے حسن عشق کے ساماں نئے نئے
آسیب عشق سر سے اترتا نہیں مرے
لکھتا ہے نقش روز پری خواں نئے نئے
بہکا کے تم کو کوئی لگا لے نہ راہ پر
نکلے ہو آج گھر سے مری جاں نئے نئے
زوروں پہ ہیں جنوں کی بدولت ہمارے ہاتھ
ہوتے ہیں تار تار گریباں نئے نئے
ہر روز ایک وادیٔ نو سیرگاہ ہے
وحشت دکھا رہی ہے بیاباں نئے نئے
کس درجہ تنگ ہوں ترے ہاتھوں سے اے جنوں
لاؤں کہاں سے روز گریباں نئے نئے
غم کا گزر ہے گاہ گہے خرمی کا دخل
آتے ہیں روز گھر مرے مہماں نئے نئے
صورت سے اک پری کی ہمیں عشق تازہ ہے
دیوانے ہم ہوئے ہیں سلیماں نئے نئے
ہر مرتبہ زمانے کو ہوتا ہے انقلاب
لاتی ہے سوانگ گردش دوراں نئے نئے
ملک عدم ہے یا کوئی ننگوں کا شہر ہے
ہر روز واں سے آتے ہیں عریاں نئے نئے
اک تازہ گل کا سامنا ہوتا ہے ہر برس
دیتا ہے داغ دل پہ گلستاں نئے نئے
پابند اک مقام کے ہوتے نہیں ہیں مرد
شیروں کے واسطے ہیں نیستاں نئے نئے
اس زلف کے خیال میں آنکھیں تو بند کر
دکھلائی دیں گے خواب پریشاں نئے نئے
کس کس طرح سے چہرے پہ لہرا کے آتی ہے
کرتی ہے ناز زلف پریشاں نئے نئے
آٹھوں پہر ہے اب تو تباہی کا سامنا
اٹھتے ہیں روز اشک کے طوفاں نئے نئے
روئے گا کہنہ سالی میں عہد شباب کو
جب ٹوٹ کر نہ نکلیں گے دنداں نئے نئے
پھرتا نہیں وہ دست نگاریں کسی طرح
کرتا ہے زور پنجۂ مرجاں نئے نئے
کر سیر چشم غور سے جو ذوق شعر ہے
مضموں دکھائے گا مرا دیواں نئے نئے
ہنس ہنس کے بار بار نہ کیوں کر دکھائیں آپ
نام خدا نکالے ہیں دنداں نئے نئے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse