کیا کاسۂ مے لیجئے اس بزم میں اے ہم نشیں
کیا کاسۂ مے لیجئے اس بزم میں اے ہم نشیں
دور فلک سے کیا خبر پہنچے گا لب تک یا نہیں
یہ کاسۂ فیروز گوں ہے شیشہ باز پر فنوں
جتنے حیل ہیں اور فسوں سب اس کے ہیں زیر نگیں
ہو اعتماد اس کا کسے ہے شیشہ بازی یاد اسے
رکھتا ہے شاد اک دم جسے کرتا ہے پھر اندوہگیں
کل دامن صحرا میں ہم گزرے جو وقت صبح دم
اک کاسۂ سر پر الم آیا نظر اپنے وہیں
بولا بہ فریاد و فغاں کیا دیکھتا ہے او میاں
تھے ہم بھی سر بر آسماں گو اب تو ہیں زیر زمیں
گلبرگ سے نازک بدن سر پاؤں سے رشک چمن
زریں و سیمیں پیرہن دل کش مکانوں کے مکیں
دن رات ناز و نعمتیں مہ طلعتوں کی صحبتیں
عیش و نشاط و عشرتیں ساقی قراں مطرب قریں
باغ و چمن پیش نظر بزم طرب شام و سحر
ہر سو بہ کثرت جلوہ گر حسن بتان نازنیں
ایک آسماں کے دور سے اک گردش فی الفور سے
اب سوچیے گا غور سے در لحظہ آں در لحظہ ایں
سنتے ہی جی تھرا گیا رخسار پر اشک آ گیا
دل عبرتوں سے چھا گیا خاطر ہوئی بس سہمگیں
اس میں سر اپنا ناگہاں ہر مو ہوا مثل زباں
بولا نظیرؔ آگہ ہو ہاں من نیز روزے ہم چنیں
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse