کیا ریت پریت سکھائی ہے
کیا ریت پریت سکھائی ہے
سبھ ڈسدا حُسن خدائی ہے
ڈِسدی یار مٹھل دی صورت
کُل تصویر اتے کُل مورت
ہر ویلے ہے شگن مہورت
غیر دی خبر نہ کائی ہے
ناز نہورے یار سجن دے
عشوے غمزے من موہن دے
ہر ہر آن انوکھڑے ون دے
واہ زینت زیبائی ہے
نخرے ٹخرےنوکاں ٹوکاں
دلڑی جوڑ چبھیندیاں چوکاں
سوکاں سبز تھیاں ول جھوکاں
خوبی خنکی چائی ہے
نازک چالیں نور ازل دی
رمزاں بانکی طرز جدل دی
دھار کجل دی دھاڑ اجل دی
سرخی بھاہ بھڑکائی ہے
ڈکھ ڈوہاگ تے درد جدائی
رل مل ویندے ساتھ لڈائی
عشق فرید تھیوسے بھائی
عشرت روز سوائی ہے
|
This work was published before January 1, 1929, and is in the public domain worldwide because the author died at least 100 years ago. |