کیا حال سُناواں دل دا
کیا حال سُناواں دل دا
کوئی محرم راز نہ مِلدا
مونہہ دھوڑ مٹی سرپایم
سارا ننگ نموز ونجایم
کوئی پُچھن نہ ویڑھے آیم
ہتھوں اُلٹا عالم کِھلدا
آیا بار برہوں سر باری
لگی ہو ہو شہر خواری
روندیں عمر گزاریم ساری
نہ پایم ڈس منزل دا
دل یار کیتے کُرلاوے
تڑپھاوے تے غم کھاوے
دکھ پاوے سُول نبھاوے
ایہو طور تیڈے بیدل دا
کئی سہنس طبیب کماون
سے پڑیاں جھول پلاون
میڈے دل دا بھید نہ پاون
پودے فرق نہیں ہک تل دا
پنوں ہوت نہ کھڑ مُکایا
چھڈ کلڑی کیچ سِدھایا
سوہنے جان پچھان رُلایا
کُوڑا عذر نبھایم گِھل دا
سُن لیلیٰ دھانہہ پکارے
تیڈا مجنوں زار نزارے
سوہنا یار تو نے ہک وارے
کڈیں چا پردہ محمل دا
دل پریم نگر ڈو تانگھے
جتھاں پینڈے سخت اڑانگے
نہ راہ فرید ، نہ لانگھے
ہے پندھ بہُوں مشکل دا
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse