کیا ترے دل میں اے بت ہوں دل و جاں محفوظ
کیا ترے دل میں اے بت ہوں دل و جاں محفوظ
نہ کوئی دین ہے محفوظ نہ ایماں محفوظ
بند دروازے بھی اس کے لئے کھل جاتے ہیں
موت کے واسطے ہے کاخ نہ ایواں محفوظ
چشم کافر نے تری کھو دئے سب کے ایمان
کیا زمانے میں رہے کوئی مسلماں محفوظ
موسم گل میں قسم ہے تجھے اے دست جنوں
رہنے پائے نہ کوئی جیب و گریباں محفوظ
اشک کیوں محفل اغیار میں برباد کئے
تیرے موتی نہ رہے دیدۂ گریاں محفوظ
موسم گل میں ہم اے باد خزاں سمجھے تھے
تیرے جھونکوں سے رہے گا نہ گلستاں محفوظ
ان کے دیوانوں کی وحشت کا جو عالم ہے یہی
رہنے پائے گا نہ دامان بیاباں محفوظ
دے گئی باد صبا ہم سے پریشانوں کو
تیری نگہت نہ رہی گیسوئے جاناں محفوظ
ہم سے دیوانے بھی آئے ہیں خدا خیر کرے
اے قیامت نہ رہے گا ترا داماں محفوظ
اے خدا تیری خدائی میں یہ کیا کیا کرتا
موت کے خوف سے ہوتا اگر انساں محفوظ
نام رہ جائے گا نوشادؔ جہاں میں کچھ دن
بعد میرے جو رہے گا مرا دیواں محفوظ
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse