کتاب پیدائش: باب نمبر 6

پَیدائش باب 6
(1) جب رُویِ زمِین پر آدمی بہت بڑھنے لگے اور اُن کے بیٹیاں پَیدا ہوئیں۔(2) تو خُدا کے بیٹوں نے آدمی کی بیٹیوں کو دیکھا کہ وہ خوب صورت ہیں اور جِن کو اُنہوں نے چُنا اُن سے بیاہ کرلِیا۔(3) تب خُداوند نے کہا کہ میری رُوح اِنسان کے ساتھ ہمیشہ مُزاہمت نہ کرتی رہے گی کِیُونکہ وہ بھی تو بشر ہے تَو بھی اُس کی عُمر ایک سَو بیس کی ہوگی۔(4) اُن دِنوں میں زمِین پر جبّار تھے اور بعد میں جب خُدا کے بیٹے اِنسان کی بیٹیوں کے پاس گئے تو اُن کے لِئے اُن سے اَولاد ہوئی۔ یہی قدیم زمانہ کے سُورما ہیں جو بڑے نامور ہُوئے ہیں۔(5) اور خُداوند نے دیکھا کہ زمِین پر اِنسان کی بدی بہت بڑھ گئی اور اُس کے دِل کے تصوُّر اور خیال سدا بُرے ہی ہوتے ہیں۔(6) تب خُداوند زمِین پر اِنسان کو پَیدا کرنے سے ملُول ہُؤا اور دِل میں غم کِیا۔(7) اور خُداوند نے کہا کہ مَیں اِنسان کو جِسے مَیں نے پَیدا کِیا رُویِ زمِین سے مِٹا ڈالونگا۔ اِنسان سے لے کر حیوان اور رینگنے والے جاندار اور ہوا کے پرندوں تک کِیُونکہ میں اُن کے بنانے سے ملُول ہُوں۔(8) مگر نُوح خُداوند کی نظر میں مقبول ہُؤا۔(9) نُوح کا نسب نامہ یہ ہے ۔ نُوح مَردِ راست باز اور اپنے زمانہ کے لوگوں میں بے عَیب تھا اور نُوح خُدا کے ساتھ ساتھ چلتا رہا۔(10) اور اُس سے تین بیٹے سم حام اور یافت پَیدا ہُوئے۔(11) پر زمِین خُدا کے آگے ناراست ہوگئی تھی اور وہ ظُلم سے بھری تھی۔(12) اور خُدا نے زمِین پر نظر کی اور دیکھا کہ وہ ناراست ہوگئی ہے کِیُونکہ ہر بشر نے زمِین پر اپنا طریقہ بگاڑ لِیا تھا۔(13) اور خُدا نے نُوح سے کہا تمام بشر کا خاتمہ میرے سامنے آ پہنچا ہے کِیُونکہ اُن کے سبب سے زمِین ظلم سے بھر گئی۔ سو دیکھ مَیں زمِین سمیت اُن کو ہلاک کرونگا۔(14) تُو گوپھر کی لکڑی کی ایک کشتی اپنے لِئے بنا۔ اُس کشتی میں کوٹھریاں تیار کرنا اور اُس کے اندر اور باہر رال لگانا۔(15) اور اَیسا کرنا کہ کشتی کی لمبائی تین سَو ہاتھ۔ اُس کی چَوڑائی پچاس ہاتھ اور اُس کی اُنچائی تیس ہاتھ ہو۔(16) اور اُس کشتی میں ایک روشن دان بنانا اور اُوپر سے ہاتھ بھر چھوڑ کر اُسے ختم کردینا اور اُس کشتی کا دروازہ اُس کےپہلُو میں رکھنا اور اُس میں تین درجے بنانا۔ نِچلہ۔ دُوسرا اور تِیسرا۔(17) اور دیکھ مَیں خود زمِین پر پانی کا طُوفان لانے والا ہُوں تاکہ ہر بشر کو جس میں زندگی کا دم ہے دُنیا سے ہلاک کر ڈالوں اور سب جو زمِین پر ہیں مرجائے گے۔(18) پر تیرے ساتھ میں اپنا مَیں اپنا عہد قائم کرونگا اور تُو کشتی میں جانا۔ تُو اور تیرے ساتھ تیرے بیٹے اور تیری بیوی اور تیرے بیٹوں کی بیویاں۔(19) اور جانوروں کی ہر قِسم میں سے دو دو اپنے ساتھ کشتی میں لے لینا کہ وہ تیرے ساتھ جیتے بچیں۔ وہ نر و مادہ ہوں۔(20) اور پرندوں کی ہر قِسم میں سے اور چرندوں کی ہر قِسم میں سے اور زمِین پر رینگنے والوں کی ہر قسم میں سے دو دو تیرے پاس آئیں تاکہ وہ جیتے بچیں۔(21) اور تُو ہر طرح کی کھانے کی چیز لے کر اپنے پاس جمع کر لینا کِیُونکہ یہی تیرے اور اُن کے کھانے کو ہوگا۔(22) اور نُوح نے یُوں ہی کِیا۔ جَیسا خُدا نے اُسے حُکم دیا تھا وَیسا ہی عمل کِیا۔