چار عنصر سے بنا ہے جسم پاک

From Wikisource
Jump to navigation Jump to search
چار عنصر سے بنا ہے جسم پاک
by ساحر دہلوی

چار عنصر سے بنا ہے جسم پاک
ہیں یہ چاروں باد و آتش آب و خاک

از پے تکمیل تحقیقات علم
ہو گیا لازم خلی کا اشتراک

عقل و دل ایزاد ہو کر ہو گئے
شش جہات و ہفت منزل تابناک

جب ارادت سے ہوا اس کا ظہور
آ گیا پندار کا گردش میں چاک

روح اعظم سے ہویدا ہو گئی
وہ ارادت جس نے دم کی روح پاک

روح اعظم کیا ہے وہ ذات قدیم
ہے زبان علم میں جو جان پاک

وحدت و کثرت میں ساحرؔ ہے عیاں
جان یا نور قدم یا ذات پاک


This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.