پھوٹی بھلی وہ آنکھ جو آنسو سے تر نہیں

From Wikisource
Jump to navigation Jump to search
پھوٹی بھلی وہ آنکھ جو آنسو سے تر نہیں
by قائم چاندپوری

پھوٹی بھلی وہ آنکھ جو آنسو سے تر نہیں
کس کام ہے وہ سیپ کہ جس میں گہر نہیں

منعم ہے کیا کہ جس سے کوئی بہرہ ور نہیں
کس کام کا وہ نخل کہ جس میں ثمر نہیں

بندہ ہوں بے خودی کا میں اس مست کی جسے
آشوب روز حشر سے اصلاً خبر نہیں

یارب خلش سے آہ کی ہو جو نہ بہرہ مند
جس دل کا تکیہ گاہ سر نیشتر نہیں

اے دل برنگ غنچہ نہ مل گل رخوں سے تو
اپنی گرہ میں ان کے کھلانے کو زر نہیں

ساقی ہے شب کی دست درازی کا کیا گلہ
پیارے جو بے خودی میں ہوا معتبر نہیں

نالاں نہ ہوں گلی میں تری میں تو کیا کروں
مرغ چمن میں نالہ سوا کچھ ہنر نہیں

جوں اشک ایک لغزش پا میں گئے ہیں پار
ہستی سے تا بہ نیستی چنداں سفر نہیں

قائمؔ جو اس طرح تو پھرے ہے خراب و خوار
اے خانماں خراب مگر تیرے گھر نہیں


This work was published before January 1, 1929, and is in the public domain worldwide because the author died at least 100 years ago.