پھل ہے اس بت کی آشنائی کا

by منشی دیبی پرشاد سحر بدایونی

پھل ہے اس بت کی آشنائی کا by منشی دیبی پرشاد سحر بدایونی

پھل ہے اس بت کی آشنائی کا
مجھ کو دعویٰ ہے اب خدائی کا

نہ لڑاؤ نظر رقیبوں سے
کام اچھا نہیں لڑائی کا

آسماں پر نہیں ہلال نمود
نعل ہے تیری زیر پائی کا

گل میں تھی اس قدر کہاں سرخی
عکس ہے پنجۂ حنائی کا

کس ستم گر سے تو نے اے کافر
طرز سیکھا ہے دل ربائی کا

چادر آسمان حاضر ہو
تو جو استر کرے رضائی کا

وقت کیا آ گیا ہے صد افسوس
بھائی دشمن ہوا ہے بھائی کا

گو برہمن پسر وہ قاتل ہے
دل ملا ہے مگر قصائی کا

کچھ مرا ہی نہیں وہ بت معبود
بخدا ہے خدا خدائی کا

سحرؔ کیا اس نے کر دیا جادو
مجھ کو دعویٰ تھا پارسائی کا