وہ فراق اور وہ وصال کہاں

From Wikisource
Jump to navigation Jump to search
وہ فراق اور وہ وصال کہاں
by مرزا غالب

وہ فراق اور وہ وصال کہاں
وہ شب و روز و ماہ و سال کہاں

فرصت کاروبار شوق کسے
ذوق نظارۂ جمال کہاں

دل تو دل وہ دماغ بھی نہ رہا
شور سودائے خط و خال کہاں

تھی وہ اک شخص کے تصور سے
اب وہ رعنائی خیال کہاں

ایسا آساں نہیں لہو رونا
دل میں طاقت جگر میں حال کہاں

ہم سے چھوٹا قمار خانۂ عشق
واں جو جاویں گرہ میں مال کہاں

فکر دنیا میں سر کھپاتا ہوں
میں کہاں اور یہ وبال کہاں

مضمحل ہو گئے قویٰ غالب
وہ عناصر میں اعتدال کہاں

بوسہ میں وہ مضائقہ نہ کرے
پر مجھے طاقت سوال کہاں

فلک سفلہ بے محابا ہے
اس ستمگر کو انفعال کہاں


This work was published before January 1, 1929, and is in the public domain worldwide because the author died at least 100 years ago.