وہ حسیں بام پر نہیں آتا
وہ حسیں بام پر نہیں آتا
چاند اپنا نظر نہیں آتا
ہوک اٹھتی نہیں ہے کب دل سے
منہ کو کس دن جگر نہیں آتا
کون اس بیکسی میں پرساں ہے
ہوش دو دو پہر نہیں آتا
یہ بھی سننا تھا واے ناکامی
مرتے ہیں اور مر نہیں آتا
تھی کبھی بات بات میں تاثیر
اب دعا میں اثر نہیں آتا
کھیل ہے کیا مزاج داں ہونا
کام یہ عمر بھر نہیں آتا
سادگی کا ہوں اس کی دیوانہ
ابھی جس کو سنور نہیں آتا
بے خودی ہے کہ چھائی جاتی ہے
ہوش آتا نظر نہیں آتا
یہ حسیں اور التجائیں حفیظؔ
رحم تم کو مگر نہیں آتا
|
This work was published before January 1, 1929, and is in the public domain worldwide because the author died at least 100 years ago. |