مەم و زین/25
Jump to navigation
Jump to search
| زاڤا ب ئەدەب کو چوو ژ دەردان | شەمعا کو ل پشت حجاب و پەردان |
| ڕابوو کو ژ پێشڤە چو خرامان | کێشا ل زەمین ب ناز دامان |
| زولفێ د خوە کرنە پایێ ئەنداز | دەستێ د خوە کرنە فەرقێ پەرداز |
| دێما کو ب نوورێ بیت الأقصی | قەندیلێ فەلەک ب وی تەییسا |
| مەخموورێ غەبووقێ دەردێ هجران | موشتاقێ سەبووحێ وەسلێ جانان |
| ژەووەل ڤە ل عادەتێ موباحی | دەستێ خوە درێژ کرە سوراحی |
| نووشی ژ سوراحیا شەکەر لەب | نووشین قەدەحەک ژ مەی لەبالەب |
| مەخموور کو دەفع کر مەیا ناب | بهن کر گول و سونبولێ د تێر ئاب |
| گەهـ نەرگس و لالە گاهـ سۆرگول | رەیحان و بنفشە گاهـ سونبول |
| تێک تێکڤە ددان و تێک دبەستن | هن بووسە ددان وهن دگەستن |
| ئەو چەندە ب پێکڤە ڕادمووسان | نەوبەت نە ددانە هەڤ ل بووسان |
| ئەلماس و گوهەر جەبین و دندان | تەبدیل بوویین ب لەعل و مەرجان |
| دەریایێ مەحەببەتێ وە کر جووش | دەست گەردەن و لەب ب لەب هەم ئاغووش |
| مەدهووش بوویین ب وێ مودامێ | بێهش وە کەتن ژ سەر قیامێ |
| قادر نە دبوون بکن قوعوودێ | گێڕ بوونە ب پێکڤە بۆ سوجوودێ |
| تەکرار ژ سەجدەئێ کو ڕابوون | ئەو چەند ب یەک ڤە هەردو شابوون |
| شەککەر ژ لەبێ د یەک ڕەڤاندن | سۆرگول ژ روخێ د یەک جڤاندن |
| تەرکیب کرن ژ بۆ خوە گولقەند | تەزویج کو بوون ب یەک ڤە دلبەند |
| سێ ڕۆژ و شەڤان ب دل پەیاپەی | وان تەشنە لەبان ڤەخوارن ئەو مەی |
| موستەسقیێ شەربەتا مەیا ناب | ئاخر کو نەبوون ب شوربێ سیراب |
| کەیفییەتێ نەشئەیا شەرابێ | کێشانە کەمالێ ئزترابێ |
| سافی زقەن و بەدەن شەفافێ | کر مەیل و مەحەببەتا زەفافێ |
| سەرمەست ب دەست تێک هەرستن | بوو گەلتە و گەلج و دابرستن |
| دەم لێک بچیان و دەم جودا بوون | گەهـ تێک هـ ژیان و گەهـ دبا بوون |
| دەم ئەو ددو بوون و گاهـ یەک بوون | گەهـ جۆت و ب یەکڤە گاهـ تەک بوون |
| تیرا کو ژ عاجێ بەر هەدەف بوو | ئاماج ب سەفوەتا سەدەف بوو |
| ئاماج کو بوو مەحەللێ پەیکان | دوڕدانە بەدەل کرن کرن ب مەرجان |
| نەبل هاتەڤە نەسل ما د وێ دا | نەسلا خوە ژ جان و دل ب وێ دا |
| پەیوەستە ب ڕۆ ژ ئەگەر ب شەڤ بوون | وان پوڕ ژ مەحەببەتێ ب هەڤ بوون |
| هەموارە دو سەرخوەشێ د سەرکش | ڤالا دکرن ل یەک دو تەرکش |
| گەر ڕۆ ژ ئەگەر شەڤێ د ڕەش بوون | ئەو هەردو مەلەک وە پێک د خوەش بوون |
| گۆیا تە دگۆ دو کیمیاگەر | مەشغوول بوویین ب عقدێ جەوهەر |
| ئەو رووح و جەسەد ب یەکڤە مونزەم | نەفسەین ب یەک ڤە بوونە مودغەم |
| ئنزالێ لەگەن نزوولێ ئبریق | تەسعید کرن ب قەرع و ئەنبیق |
| مەمزووج شەبیهی شیر و شەککەر | مەخلووت وەکی حەیات و کەوسەر |
| قەتعا چو نەبوو نە خور نە خوابەک | وان بیر نە دهات نان و ئابەک |
| ئەو هەفتە تەمام بوویە گەردەک | ئاگاهـ نەبوون ژ حالێ فەردەک |
| غالب گەڕیا ل دەردی سححەت | غەم چوون ڤەشرین ژ کەربێ وەسلەت |
| ناگەهـ سەحەرێ ژ ڕۆ ژێ حەشتێ | رزوان مەشیا ژ نیڤ بەحەشتێ |
| مەم هێژ وسا ل بەر دەری بوو | دائم ئەوی سەر ل سەر بەری بوو |
| هێژا ئەوی مەسکەن ئاستان بوو | ڕۆ ژان و شەڤان وە پاسبان بوو |
| تاجدین کو ژ گەردەکێ بدەرکەت | ڕۆ ژەک تە دگۆ مەمێ ب سەرکەت |
| في الحال وە ڕەنگە شادمان بوو | هەم ئەفسەرێ ئەوجێ ئاسمان بوو |
| یارەک تە هەبت مەگەر وە بیتن | گەر دێ وە نەبت مەگەر نەبیتن |
| یارێ ب تە ڕا بتن موافق | سەد خزمێ د خائن و مونافق |
| قوربان بکە قەت مەبێ مخابن | چ دکی ب کەسان کو بێ وەفا بن |
| قوربان بدە قەت مەبێژە کینە | بێ کێرە برا ئەگەر ب کینە |
| یارێ تە ژ بۆ تە ڕا برایە | هەم چاڤە ژ بۆ تە هەم چرایە |