مار کر تیر جو وہ دلبر جانی مانگے
Jump to navigation
Jump to search
مار کر تیر جو وہ دلبر جانی مانگے
کہہ دو ہم سے نہ کوئی دے کے نشانی مانگے
اے صنم دیکھ کے ہر دم کی تری کم سخنی
موت گھبرا کے نہ کیوں یہ خفقانی مانگے
خاک سے تشنۂ دیدار کے سبزہ جو اٹھے
تو زباں اپنی نکالے ہوئے پانی مانگے
مار پیچاں تو بلا ہے گا مگر تو اے زلف
ہے وہ کافر کہ نہ کاٹا ترا پانی مانگے
دہن یار ہو اور مانگے کسی سے دل کو
وہ جو مانگے تو بانداز نہانی مانگے
دل مرا بوسہ بہ پیغام نہیں ہے ہمدم
یار لیتا ہے تو لے اپنی زبانی مانگے
جلوہ اس عالم معنی کا جو دیکھے اے ذوقؔ
لطف الفاظ نہ بے حسن معانی مانگے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse