| خانا شکار کەرد، خانا شکار کەرد
|
یەک ڕۆ نوفڵ شا عەزم شکار کەرد
|
| قەبیلەیێ جە قەوم عەرەب سوار کەرد
|
قیتال غەزاڵ ئاهووی تاتار کەرد
|
| یاسا دا قۆشەن، سپای بێ سامان
|
ڕەم ڕەم وەحش و تەیر ماڵا وە دامان
|
| فەرما قوشچیان هەرکەس پەی وێشان
|
کڵاوە جە فەرق شاهینان کێشان
|
| چاوشان داشان نە تەپڵ بازان
|
یوزان ڕاهی بین، بازان پەروازان
|
| دەستەی کەماندار ڕجل ڕاست خەمدا
|
قەوس قەزاح وەش ڕاست پەیی چەمدا
|
| هونەی باڵباز، پڕ تاف پای یووز
|
جە جووق ئەسپان ماهی خۆش ئامووز
|
| جە شاخەی شاهین، شەیدای ئاهووگیر
|
جە قاژەی پەڕ داڵ، شەققەی شەستتیر
|
| ماهی هەراسان جە تیپی ئاهوو
|
کێشان پەی جەبەل گوڵبانگ یاهوو
|
| نۆفەڵ بەو کومەیت ڕای مەنجوڵەوە
|
ڕکاب دا نە ئەسپ شی نە چۆڵەوە
|
| یاونا وە کاو هەردەی کۆهساری
|
لوا چەنی دەنگ زایەڵەی زاری
|
| دیش نیاس نەبەرز سای قوللەی کەمەر
|
مەیۆ سەدای شین چەمەری و چەمەر
|
| دوود شیوەنش گرتەن قوللەی کۆ
|
ها وەختەن کەرۆش بە خاک نەی کۆ
|
| تاودا وە کێلان خاسەی دیاری
|
ماهوور عەزیم سەخت ناچاری
|
| دیش شەخسێ نیشتەن، یەکتای لۆنگ لەکۆڵ
|
نە دێوەن نە جن نە ئادەم نە غۆل
|
| مووی سەرش ئامان باڵای سەر پۆشان
|
تەیران پەی سەهەند سایەش مەکۆشان
|
| ناخونش بییەن وە قوللابەی شێر
|
بێ پەروان جە قەتع مەودای ناخونگیر
|
| نە فەوق فەرقش چون سەهی سەروان
|
لانەشان بەستەن قومری و تەزەروان
|
| تەکیە دان وە سەنگ سەرد سیاهێ
|
خەیاڵ مەبەرۆش گاهێ وە ڕاهێ
|
| گاهـ نە شادی و زەوق، گاهـ نە گرینەن
|
گاهـ خاتر پەشێو مات و خەمینەن
|
| گاهـ خەندەی بێ وەقت، گاهـ شین بێ شوون
|
گاهـ چون ئەلف ڕاست، گاهـ چون حەڵقەی نوون
|
| گاهـ مەردەی بێهۆش، گاهـ نیمەگیانەن
|
گاهـ نە شوکر زات زیکر سوبحانەن
|
| گاهـ ئەحیا وە مەیل خەیاڵ یارەن
|
گاهـ مەلوول دەرد، گا دڵئەفگارەن
|
| نۆفەڵ نیگاهـ کەرد وە جەستەی حاڵش
|
ئاما وە تەقریر، پەرسا ئەحواڵش
|
| وات ئەی بەندەی زات زاهیر و باتن
|
هەردەی بێدی ماڵ بیابان وەتەن
|
| پەیچێش نیشتەنی نەی خەرابەی بەڕ
|
دامانت وە زووخ زامان کەردەن تەڕ
|
| بنچینەی هۆشت کێ کەندەن جە بن
|
ئەسڵت ئامادەن یا جە گرۆی جن
|
| گیرۆدەی تەڵسم کام ڕەنگ ڕێوی
|
جە نەسڵ ئادەم، یا جن و دێوی
|
| زاریت نە چێشەن پەی کێ تاسەتەن
|
سەرت سەرگەردان کام سیاسەتەن
|
| زاریت چون خەزان جەرگم ڕێزنان
|
پەشێویت پەرداخ شاهیم بێزنان
|
| زاریت پەی کێ هەن، بەی تەور گرفتار
|
ئەندام تەنت زەعیف زامدار
|
| ڕاست واچە پەرێم، نە سای سەنگەوە
|
جە داخت تەکم دان وە مەرگەوە
|
| زاریت نە چێشەن، پەی کێ تاسەتەن
|
سەرت سەرگەردان کام سیاسەتەن
|
| مەجنوون دیش مەوبەت شای فەرەیدوون فەڕ
|
والیی مەمالیک عارەبان بەڕ
|
| واتش ئەی نەجیب نەتیجەی شاهان
|
فەرمان فەرمای موڵک حوشمەت پەناهان
|
| جەی وەرتەر نامم مەوانان وە قەیس
|
نە چون ئیسە من بەرگ بەدەن لەیس
|
| شاهان کەس وە من مەقابڵ نەبی
|
هیممەتی حاتەم لێم حاسڵ مەبی
|
| کەیخوسرەو نەبیش چون من سایە و سام
|
سادەی ساقییان، دەور بادە و جام
|
| نەوڕەس غوڵامان، چابوک سواران
|
نیمچە کەنیزان، ناسک نازداران
|
| سپای سەهمگین، ڕەزمی و سەلەحشۆڕ
|
تەپڵ جەنگ کوبان، داوا و شەڕ و شۆڕ
|
| تەحسیل کەردە بیم هەر یەک نە جایێ
|
هەر یەکێ لایەق سەر کار شایێ
|
| جە سوب تا ئێوار دەست نە کار بی
|
جە بەخشای درهەم دانە دینار بی
|
| دانشم مافەوق دانشوەران بی
|
تەبعم باڵا تەبع سوخەنوەران بی
|
| لاڵ بام پەی نامش یەک لەیلێ نامێ
|
خاڵ دانەی فەرهەنگ و زڵف دەستە دامێ
|
| بینا کەرد غارەت سەرمایەی هۆشم
|
لونگ مەجنوونی شانا وە دۆشم
|
| ڕەقەم بەست بە نام نەرگسان مەست
|
دەروازەی نیشات کامەرانیم بەست
|
| بابۆم ناوەردش پەی من بە ڕەزا
|
بابۆی ئەویش شی بە قین و قەزا
|
| بابۆی من مەلووح، بابۆی ئەو مەهدی
|
هەردوو عامیری جە ڕای بەدعەهدی
|
| بێ لوتف بین پەی من خوڵاسەی کەلام
|
ئیستە قەوڵش دان وە ئیبن سەلام
|
| تەرک شاهیم کەرد، لۆنگم وەست نە کۆڵ
|
چۆڵم کەرد وە زێد، زێدم کەرد وە چۆڵ
|
| ئیسە هام وەی چۆڵ، بێدی هەردەوە
|
تەکیەم دان وەی سەنگ سیای سەردەوە
|
| یە بار لەبان خوشک و قاخمەن
|
یە ئاهـ ڕەنگ بەست سیا زاخمەن
|
| یە دوود دەروون تەوەن تاومەن
|
یە بەرگ و بۆشاک، خورد و خاومەن
|
| یە زیادی شەعر تەن جەی غەرقمەن
|
یە لانەی مەلان فەوق فەرقمەن
|
| یە جە بوڵەندی و لۆنگ، دەست وە عەسامەن
|
یە شێوەی ئادەم جە تەواسامەن
|
| یە موڵک و مەکان ماوای دەیرمەن
|
یە هامڕاز ڕاز وەحش و تەیرمەن
|
| یە بار خاتر جە خەم کەیلمەن
|
یە وێڵ وڵات پەرێ لەیلمەن
|
| نە جای خوراکات ئەغزییەی لەزیز
|
خۆراکم گیا و ئاوی شۆرەڕیز
|
| غەیر جە تەیر و توور، وەحش وەحشی
|
بەشەر نەپەرسان جە حاڵم ئەحواڵ
|
| ئارۆ تۆ نە شۆن سپی تەتاران
|
ڕات غەڵەت کەردەن چون ڕاو یاران
|
| مەعلوومەن جە خۆف خودا مەتەرسی
|
لوتفت شامڵەن ئەحواڵ مەپەرسی
|
| نام تۆ چێشەن بفەرما بەیان
|
دیارەن نەسەب نەتیجەی عەیان
|
| وات منم نۆفەڵ ئیبن مەساحیق
|
وەیسی ڕەئیسم پەی ەنی ماریق
|
| واتش بزانام حالی نژادی
|
نەوەی ئەمیران، هەم جە پاکزادی
|
| هەر سەلامەت بی، دەور بە کامت بۆ
|
جە شەرق تا بە غەرب، بەرزیی نامت بۆ
|
| نۆفەڵ وات ئەی قەیس بەرگ بەدەن چاک
|
سەوگەندم بە زات فەرد تەنیای تاک
|
| جەی وەر کەس جە بەخت بەد ئیقباڵ تۆ
|
نەکەردەن خەبەر من جە حاڵ تۆ
|
| تا من بە تەوفیق بینای لایەنام
|
پەرێت باوەردام لەیل جەمین جام
|
| حەرفێ پێت واچۆم، ئەر هەنی ڕازی
|
کۆتا کەر تەقریر ماجەرای مازی
|
| پەرێ تۆ عەیبەن ئی هەردە چۆڵە
|
ئی عەسا و کەشکۆڵ، کەڵپۆس نە کۆڵە
|
| هۆرێزە چەنیم بەرۆت وە دامان
|
قەسەم وە بارگای بەرزی ئیمامان
|
| هەر گاهـ دەوای زام نەسرەفتت لەیلەن
|
شاهی و موڵک و ماڵ نەڕات توفەیلەن
|
| مەجنوون وات نۆفەڵ پادشای عەرەب
|
تاسەر بۆت شاهی، بە شادی و تەرەب
|
| دڵداریم داشان فرە کەس پیسەو تۆ
|
گردوو نە گونبەد جاگیر نمەبۆ
|
| فرەکەس نە ڕای من ڕێحانی کاشتەن
|
حەرفشان پەرێم سوودێ نەداشتەن
|
| ستارەم داخڵ بورج مرێخەن
|
ڕەسم ئەعزەم و ئاخ و درێخەن
|
| دەلوەن تاڵعم ئاوێزان بییەن
|
فریشتەم جە من گورێزان بییەن
|
| بەختم گرفتار دێوی ڕەجیمەن
|
مەحبووس نە تەڵسم بەستەی قەدیمەن
|
| سەوای زات پاک، کار كن فيكون
|
هیچ کەس نەکەردەن دەوای دەرد من
|
| نۆفەڵ وات مەجنوون بەهانە وەسەن
|
سەوگەندم بەو کەس بێکەسان کەسەن
|
| جە گەنج قاروون گەنجم فزوونەن
|
فەوج قۆشەنم مەوج جەیحوونەن
|
| تەمام نەڕات تۆ توفەیلم کەردەن
|
یا مەبۆ مەردەن یا لەیل ئاوەردەن
|
| نیگاهـ کەر وە کار کەردەی ئەمیران
|
ڕەحمسان چۆنەن چەنی فەقیران
|
| ئەووەڵ بە مۆبەت بە میهرەبانی
|
وە ڕەسم قانوون پەی جانفشانی
|
| دووهەم وە قوماش نادرەی شاران
|
لایەق وە سەر کار سەلیقەداران
|
| سووەم وە پێشکەش سەگڵاوی سەعدان
|
واچانی مەنجووڵ جڵفای کەمیدان
|
| بەحری کەحێڵان، جەهینی ئەڕنەب
|
قەباڵەداران نەتیجەی عەرەب
|
| پانسەد چەنی زێن ئیرسال بۆ پەرێش
|
هەر ئەسپێ چەنی جڵەودار وێش
|
| ناقەی لاڵ پەشم جەرەس نە گەردەن
|
هەزار مەکیانۆم پەرێ بار کەردەن
|
| چوارەم وە یاقووت ئەڵماس ئابدار
|
مرواری بە سەنگ، گەوهەر بە خەروار
|
| قەومانش بەو تەور غەنی بان جە زەڕ
|
هیچکام نەکەران داوی حەرف شەڕ
|
| ئەر بە گەنج و ماڵ نەبۆ ڕازیشان
|
مەبۆ سەر بەروون پەی سەرفرازیشان
|
| ئەر حەق لەیل وە تۆ بوینۆ لایەق
|
ئینشاڵڵا سپام لێش مەبۆ فایەق
|
| مەکەرۆش وە پەند واتەی مانگ و ساڵ
|
ماوەرۆم پەرێت لەیل سۆسەن خاڵ
|
| غەرەز، شای نۆفەڵ بە میهرەبانی
|
وە هەزار ئەفسوون شیرین زوبانی
|
| ڕازی کەرد مەجنوون بار میحنەتکێش
|
پۆشاک لۆنگ وە پشت بەرد چەنی وێش
|
| یاونا بە قەسر ئەیوان شاهی
|
فەرما قەیس وە عەزم حەمام بۆ ڕاهی
|
| نەدیمانی وێم ڕەفێق بان چەنیش
|
نەک خەیاڵ بەرۆش وە ڕاگەی هەنیش
|
| هەروەخت بەر ئاما نە گەرمایەی ساف
|
بپۆشان وە بەر زەڕتار و زەڕباف
|
| باوەران نە جەمع جەرگەی مەینۆشان
|
تا بەر شۆش نە سەر مایەی خامۆشان
|
| ئەلقسە، یاران مەجنوون بەردشان
|
داخڵ وە حەمام شاهی کەردشان
|
| بەدەن جە حەدەس کەردشان زاهێر
|
شێوەی ئادەمی وەنەش بی زاهێر
|
| شا یەکدەست خەلعەت خاسەی شاهانە
|
کیاست پەی مەجنوون نە جبەخانە
|
| پۆشا وە ئەندام لیباس شاهی
|
وە عەزم حزوور نۆفەڵ بی ڕاهی
|
| سەلام دا وە ڕەسم، قاعیدەی قەدیم
|
یاران مەجلس کەردشان تەعزیم
|
| نۆفەڵ وە قانوون بزورگان پێش
|
جاش دا نە جانب دەست ڕاست وێش
|
| نەڕای قەیس مەجلس بەزم مەی سازان
|
موتریبان سازان ڕەسمی نەوازان
|
| سەدای سەمتوران، چەنگ خۆش ئاهەنگ
|
ڕەقس ڕەققاسان، شەیدای شۆخ شەنگ
|
| کزەی مووکەشان ناڵەی نەوای نەی
|
سۆز مەقامات عارەبان تەی
|
| خۆشوانان سەرمەست بادەی عینابی
|
مەوانان مەقام ڕاح ڕەیاحی
|
| سەروەران مەسروور دڵ خاڵی جە خەم
|
ویاران بە عەیش تا بە سوبحدەم
|
| سەحەر فەڕاشان دارای جەهانگیر
|
هۆرپێچا تەناف خەیمەی سیاقیر
|
| سەدای تەپڵ کۆس شای خاوەر خێزا
|
سپای ستاران تەرسا و گورێزا
|
| جە مەکان وێش نەقڵوو مەکان کەرد
|
ئیرادەی سەفەر لای لامەکان کەرد
|
| سان سپای داج بینای فەرار کەرد
|
خەفیف بی جە سەف خەندەی شەفەق زەرد
|
| ساکنان بەحر، خاکییان خاک
|
ئافەریدەگان سونع تەنیای تاک
|
| بێدار بین جە خاو ئەحیای حەفت ئیقلیم
|
مەشغووڵ بین وە فیکر پادشای عەلیم
|
| مەجنوون بێدار بی جە خاو شیرین
|
شوکرش کەرد بە زات رَبٌّ الَعالمين
|
| شوکرانەم بە تۆن کان کۆی کەرەم
|
نوور بەخش حۆران گوڵباغچەی ئیرەم
|
| کێت کەردەن وە شا کێت کەرد وە دەروێش
|
هەرکەس سازیان چەنی بەخت وێش
|
| غەیر جە من فێشتەر حاڵم پەشێوەن
|
ڕۆحم گرفتار تەڵسم دێوەن
|
| گاهـ چای بابڵ، گاهـ شەهر دەرد
|
گاهـ زەلیل زام، گاهـ هەناسەی سەرد
|
| جار جار جەفای دەرد، تاو تاو زوخ زام
|
دەم دەم بار غەم بپێچۆ نە پام
|
| دەسگای دەرد و گاز مەینەت مەدۆم لوول
|
مەکێشۆم نە حەلق هەتیتەی مەفتوول
|
| سەوای زات پاک بەسیر و بینا
|
نیگارەندەی نەقش نەو تاق مینا
|
| ئاگا بن جە گرد دەرد حاڵ من
|
ویەردەی ئەوقات ماهـ و ساڵ من
|
| هیچ ئەحیای تۆمار دەردم نەوانان
|
مەخفیم چون مەزموون مەلفووفەی خانان
|
| هەر شوکرانەمەن زات لایەزال
|
الحمد للله علي كل حال
|
| ئەلقسە، نۆفەڵ واناش دەبیرێ
|
دانای هونەرمەند، نوکتەپەزیرێ
|
| واتش ئەی دەبیر نامەی ئینشاکەر
|
ئیبتدا بە نام موشکڵ گوشادگەر
|
| ڕەقەم کەرد بەنام فەساحەت فەرجام
|
بە نام مەهدی عامیری ئەنجام
|
| وە موهر نۆفەڵ ئیبن مەساحیق
|
ئووەیسی ئەمیر پەی بەنی ماریق
|
| نامەی خۆش مەزموون بە جەواهیر کەیل
|
بکیانە وە لای عارەبان لەیل
|
| بنویس ئەی عیزام نەتیجەی عیزام
|
ئەسڵ مەنسەب خاس نیکزادەی نیکنام
|
| تا دنیا دنیاس دەور بە کامت بۆ
|
دوشمنان مەجرووح زەدەی زامت بۆ
|
| تا دنیا دنیان هەر تۆ بمانی
|
وە عەیش و نشات وە کامەرانی
|
| گوڵزار عومرت چون ڕشتەی ڕەزان
|
دوور بۆ جە ئافەت حادیسەی خەزان
|
| دمای شەرح شەوق ئارەزووی دیدار
|
جۆیای هەواڵم وە گیان خەریدار
|
| موکشووف مەعلووم زاکیرەی عالی بۆ
|
موزموون نامەم وەنەت حاڵی بۆ
|
| مەکشووف زەمیر حاڵ مەزهەر بۆ
|
مەشهوود مونیر قەلب ئەنوەر بۆ
|
| تەزکار خاتر عاتر عالی بۆ
|
مەزموون نامەم سەرکار حاڵی بۆ
|
| نە پەردەی حیجاب کناچێت بەندەن
|
ماچان ضوء جە شەوق ئافتاب سەندەن
|
| حۆری تەلعەتەن، عولیا جەنابەن
|
قەمەر ئیجتیناب، خورشید نەقابەن
|
| باڵاش سیم ساف، سێوی ساوانەن
|
نەوتۆڵ نەوخێز یانەی باوانەن
|
| شێوەش کەردەن باج هومەیلای پەری
|
بێ شەوقەن جە لاش لیقای موشتەری
|
| گیسووش سونعێوەن کە نەزان چێشەن
|
حوکم عەسای دەست مووسەوی پێشەن
|
| ماچان مەگێڵۆ ساتێ بە سەد لەون
|
بەتاڵ کەردەن سیحر باتیڵەی فیرعەون
|
| پێشانیش وە جام جەمشید مەوانان
|
جەهان نمای دەست نامی کەیانان
|
| ئەبرۆ و موژانش سیای قەترەتەن
|
کەشیدەی پەڕگار ئوستای قودرەتەن
|
| دیدەش دیدەی چەرخ ماڵ جە موغارەن
|
بێ سورمە سێونگ، بێ مەی خومارەن
|
| زڵفش لوول وەردەن چون لوول لەولاو
|
کڵفەن چون کڵاف خەیاتەی خام تاو
|
| بەلقیس مەقامەن، فریشتە خامەن
|
دووهەفتە کامڵ بەدر تەمامەن
|
| خاڵش زمڕڕود دانەی تێ نشان
|
ئەفعا کۆر مەبۆ جە دیدەنشان
|
| ئاسیبش وە قەیس ناموراد یاوان
|
چون ڕێزەی ئەڵماس جەرگش شکاوان
|
| دەست جە تەخت بەخت ئەیالەت کێشان
|
ها جە تەریقەی ڕاگەی دەروێشان
|
| تەنیا و بێ ڕەفیق مات سەرگەردان
|
ئینە چەند ساڵەن وێڵەن نە هەردان
|
| من یەک ڕۆ بە عەزم سەید شکاران
|
ڕام کەفت نە کۆی نەجد نە پەی تەتاران
|
| قەیسم دی چ قەیس دێوانەی بەدڕەنگ
|
مووی سەر باڵاپۆش، فەرش باڵای سەنگ
|
| ڕەحمم ئەسەر کەرد، دێوییان چەنێش
|
پەنەم ئێزهار کەرد دەرد حاڵ وێش
|
| ڕاستی دوودنەفەرق کەللەم جۆش ئاوەرد
|
نە جەفای مەجنوون ڕوخ نە هیجران زەرد
|
| وە سەد دەلالەت سەد دڵنەوازی
|
وە هەزاران ئەفسوون کەردەنم رازی
|
| لێم قەبووڵ نەکەرد عوزر و بەهانە
|
چەنی وێم ئاوەرد بە دەوڵەتخانە
|
| هەرگاهـ لوتف شاهـ چەنیمان یار بۆ
|
حەرف خەیر خاس هەر ئاشکار بۆ
|
| حەیفەن شەهزادە عالی نژاد بۆ
|
ساحێب ئەرکان بێخ و بونیاد بۆ
|
| پەری خاڵ لەیل وێڵ بۆ نە کاوان
|
قەیس نە کاوان بۆ لەیل نەباوان
|
| ئیستعدام ئێدەن وە ئیشفاق شا
|
وە عەین ئەڵتاف کەرۆ تەماشا
|
| قەیس کەرۆ وە عەبد موخلیس دەرگا
|
وێنەی فەرزەندان پێش کەرۆ نیگا
|
| قوفڵ بەستەی بەند بەختش باز کەرۆ
|
سەرش جە مەینەت سەرئەفراز کەرۆ
|
| شەرتبەستەی دۆستیمان جە باڵای ئێدەن
|
جای ئومێدەنی وە تۆم ئومێدەن
|
| جەوابم وە عوزر موعەتتەڵ نە بۆ
|
شەفەق وە دەیجوور موبەددەڵ نە بۆ
|
| ئەر نەبۆت سەلاح خولاسەی کەلام
|
عەزمم وە ڕەزمەن، باقی وەسەلام
|
| نامەش دا وە پەیک سیرین خەرامێ
|
گەردەن کەشان تەور، نەسیمی فامێ
|
| وات بە زبانی هەم واچە پێشان
|
نەبان وە باعیس بەدبەختیی وێشان
|
| حەرف خەیر واچان هەرتا مەتاوان
|
بەڵکە لەیل و قەیس بە هەم بیاوان
|
| وەر نە وە مەعبوود بێ زەوج و فەرزەند
|
بێ خورد و بێ خاب بێ مسل و پەیوەند
|
| هەرتا نە جای وێم کەردەنم ئاخێز
|
سەر مەبۆ وە نرخ ڕێزی گەڵاڕێز
|
| قاسید سەرئەگراز پەیغام شاهـ بی
|
سوجدەی زەمین بەرد ڕەوانەی ڕاهـ بی
|
| مەدارا نەکەرد، یەڵغار دا وە جەخت
|
مەنزڵان تەی کەرد بە وەقت و بێ وەقت
|
| یاوان بەو مەکان بادییەی بێدی
|
دیش سەحرا پۆشان سورخی و سفیدی
|
| چەتر و چادران، خەیمە و خەرگاهان
|
کێشان وە قانوون قاعیدەی شاهان
|
| خەیمەی عەزیمێ دوورەن جە یانان
|
تێدا بییەن جەمع نامی جەوانان
|
| بەعزێ نیشتەجان، بەعزێ سەف کێشان
|
عالی نەژادێ ها نە دڵێشان
|
| قاسید نە زاناو و بێ سەلام سەف
|
نامەش بەراوەرد نیاش نە ڕووی کەف
|
| مەهدی جەو قاسید نامێش ستانا
|
مەنشی تەڵەب کەرد سەرانسەر وانا
|
| مەفهووم بێ تەستیر مەزموون نامە
|
مەجلیس بی وە عەشر يوم القيامه
|
| واتشان نۆفەڵ فکری خام کەردەن
|
بەهانە پەی وێش سەرئەنجام کەردەن
|
| قەومیشان چێشەن نۆفەڵ چەنی قەیس
|
قەیس عامیری و نۆفەڵ بەنی وەیس
|
| ئەڵبەت بە نیرووی سپای وێش نازان
|
تەمای لەیل کەردەن ئی حیلەسازان
|
| تەڵەب کەرد دەبیر پەری جەوابش
|
هەر ئێد نەزانوم پەری سەوابش
|
