غم نہیں ہوتا ہے آزادوں کو بیش از یک نفس

From Wikisource
Jump to navigation Jump to search
غم نہیں ہوتا ہے آزادوں کو بیش از یک نفس
by مرزا غالب

غم نہیں ہوتا ہے آزادوں کو بیش از یک نفس
برق سے کرتے ہیں روشن، شمعِ ماتم خانہ ہم

محفلیں برہم کرے ہے گنجفہ بازِ خیال
ہیں ورق گردانیِ نیرنگِ یک بت خانہ ہم

باوجودِ یک جہاں ہنگامہ پیرا ہی نہیں
ہیں “چراغانِ شبستانِ دلِ پروانہ” ہم

ضعف سے ہے، نے قناعت سے یہ ترکِ جستجو
ہیں “وبالِ تکیہ گاہِ ہِمّتِ مردانہ” ہم

دائم الحبس اس میں ہیں لاکھوں تمنّائیں اسدؔ
جانتے ہیں سینۂ پُر خوں کو زنداں خانہ ہم


This work was published before January 1, 1929, and is in the public domain worldwide because the author died at least 100 years ago.