غم اٹھانے کے واسطے دم ہے
Jump to navigation
Jump to search
غم اٹھانے کے واسطے دم ہے
زندگی ہے اگر تو کیا غم ہے
کہتے ہو کچھ کہو کہوں کیا خاک
جانتا ہوں مزاج برہم ہے
گریہ بے اثر کی کچھ حد بھی
ہم ہیں اور آج چشم پر نم ہے
کیا نئے دوستوں سے بگڑی آج
دشمنوں کا کچھ اور عالم ہے
مجھ کو دیکھا تو غیر سے یہ کہا
عمر اس نوجوان کی کم ہے
گر خوشی ہے تو وصل کی ہے خوشی
غم اگر ہے تو ہجر کا غم ہے
سنتے ہیں داغؔ کل وہ آئے تھے
بارے اب تو سلوک باہم ہے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse