غم اس پر آشکار کیا ہم نے کیا کیا
Jump to navigation
Jump to search
غم اس پر آشکار کیا ہم نے کیا کیا
غافل کو ہوشیار کیا ہم نے کیا کیا
ہاں ہاں تڑپ تڑپ کے گزاری تمہیں نے رات
تم نے ہی انتظار کیا ہم نے کیا کیا
اترا رہا ہے نقد محبت پہ دل بہت
اچھے کو مال دار کیا ہم نے کیا کیا
کہتے ہیں وہ شکایت بیداد و جور پر
تجھ کو خدا نے خوار کیا ہم نے کیا کیا
ناصح بھی ہے رقیب یہ معلوم ہی نہ تھا
کس کو صلاح کار کیا ہم نے کیا کیا
رسوا کیا جو دل نے تو اب کہہ رہے ہیں داغؔ
دشمن کو رازدار کیا ہم نے کیا کیا
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse