عشق میں اول فنا درکار ہے
Jump to navigation
Jump to search
عشق میں اول فنا درکار ہے
دل سیں ترک ماسوا درکار ہے
ترک مقصد عین مقصد ہے اسے
جس کوں دل کا مدعا درکار ہے
دل بتنگ آیا ہے اب لازم ہے آہ
غنچۂ گل کوں صبا درکار ہے
زخمیٔ غم کیوں نہ کھینچے آہ درد
حلق بسمل کوں صدا درکار ہے
وصف زلف یار کا آساں نہیں
رشتۂ فکر رسا درکار ہے
ہے لب ساقی میں چشمہ خضر کا
گر تجھے آب بقا درکار ہے
رنگ میرا کان زر ہے اے صنم
مجھ سیں آ مل گر طلا درکار ہے
گوشۂ ابرو دکھا اے قبلہ رو
مجھ کوں محراب دعا درکار ہے
دل رقیبوں کا جلانے اے سراجؔ
آتشیں رو دل ربا درکار ہے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse