شیرین و خوسرەو/98

by خانای قوبادی

نیکیسا چەنگیی ساز بۆ عەبیرین	جە قوفڵ ڕۆمی، جە باخ شیرین
جە لەفز شیرین شۆخ دڵپەسەند	هۆرگرت چەنگ و عوود، بەی تەور شیرین ژەند
واتش: ئەرێ هەی شای یۆسف لەقا	ئەی دنیا پەی کەس نەدارۆ بەقا
ئەجەل نەزادەن، مروەت نەدارۆ	پەی ئینسان عومریچ فراوان مارۆ
ئەگەر عاشقی، ئەر شەهریاری	ئەر شێر غوڕڕان، ئەر شەهسواری
ئاخر بە باغچەی دنیای بەد ئاهەنگ	مپێکۆ چون خار نە دامانت چەنگ
سا چون بەی دەستوور دنیا بێ وەفان	عەجووز ڕا جەفت، شوم پڕ جەفان
بۆ با جەنی هەم جامێ بنۆشیم	بە یەکدا چون شیر شەکەر بجۆشیم
ئارەزووم ئێدەن ئەر مبۆ حاسڵ	شەوێ یا ڕۆیی بە دڵواز دڵ
چون شەوبۆی بەهار بە شاهۆ کۆوە	بکەروون سەوزەی خەتت وە بۆوە
دەستەی کاکۆڵت بگێروون بە دەست	تا بە ڕۆی مەحشەر جە بۆش ببوون مەست
پشتان بوون وە بەژن باڵای تووڵ نەی	شەو وێنەی لاولاو پای نەمام نەی
پەیاپەی پەیوەست چون ساقی سادە	بنۆشوون جە لەعل مەیگوونت بادە
وەختێ بەی دەستوور باڵات کردم سەیر	ئەر بەیۆ ئەجەل وەس ئاما بە خەیر
خاس وەشەن وەختێ وەرتەر جە مەردەن	جارێ دەس تۆم بشۆ نە گەردەن
چون لەولاو دەمێ پەشتانش مەست مەست	بگێروون مەمان مێخەک بۆش نە دەست
جە ڕای دۆستداریی زەریف نەوازیش	دڵ شاد مەکەری بە پەنجەبازیش
منۆشی چەنی هەر شەو تا بە ڕۆ	بادەی نازەنین عەتر نەرگس بۆ
متەرسوون بمروون بەی ئارەزۆوە	نەکەروون سەوزەی خەتت وە بۆوە
ئەر بگنیم بە دەس سەوگەند بە گێسووم	مەواچە، خوسرەو، من کەیخوسرەو خووم
بە حەڵقەی زوڵفان بۆ عەبیرەوە	مکەرووت پەی وێم بە زنجیرەوە
مەر پەیم هۆرنەگنی ڕۆڵەکەی خۆش تۆر	شەو پشتان وێم بکەروت بە زۆر
بەڵێ کۆن ئەو بەخت خودا بدۆ پێم	ڕوێ بیاوون بە مراد وێم
خوسرەو تا شنەفت ئەی شیعر دێرین	کەفت نە دەروونش ئاهیر شیرین
ناڵا وێنەی نەی، چەفت بی وێنەی چەنگ	ڕێزا جە نەرگس ئەسر لالە ڕەنگ
نە باغچەی دەروون زەوق ئاوارە کەرد	یەخەی وێش چون گوڵ پارە پارە کەرد
نیکیسا بەی نەزم نادیرەی نایاب	کزەش دا نە جەرگ چون کزەی کەب

</div<